ابو اسد
اعتقد نيسان تختلف عن تويوتا
تويوتا وضعت محرك البرادو قص لزق 4 لترات بنفس قوة الاحصنة ( 270 حصان ) ولا زيادة تذكر في عزم السيارة .
لكن النيسان لو افترضنا انها ستستخدم محرك مثل محرك اكستيرا مطور جدا ( محرك الاكستيرا 270 حصان ) وبذلك تستطيع باستخدام تقنيات الحقن المباشر والتحكم المتغاير برفع الصمامات وبدون استخدام التيربو ان ترفع من قدرة المحرك بحدود 50 حصان على الاقل ليصل لـ 320 حصان مثلا علما بأن قوة محرك اللانكروزر 4.6 لتر ذو الثمان سلندرات هو 304 حصان فقط ..
والفرق بين محرك 317 و 400 من باترول اكثر من 80 حصان رغم ان سعة المحرك نفسها .
والماكسميا الحالية بسعة 3.5 لتر والتي تستخدم تقنية الحقن المباشر قوة محركها 300 حصان بدون تيربو .
والفيديو الذي انتشر في اليوتيوب لبعض مختصي شركة نيسان وهم يجربون الباترول 6 سلندر توضح ان عزم السيارة لا بأس بها
https://www.youtube.com/watch?v=1YsElXdIXZo
انا شفت الفيديو سابقا من بداية ظهوره وأنا غير مقتنع بتاتا فيه
حتى مع تبيين قوة محرك 6 سلندر على أنه أقوى من اللاندكروزر 6 سلندر مجرد عذر قبيح أن أخراج هذا المحرك لأجل مسألة أستهلاك الوقود وهذي طبيعة المسوقين بشكل عام لازم يحطون خدعة لأجل تسويق أي شيء
الامريكان هم أحرص منا على مسألة معدلات أستهلاك الوقود ولا شفت عندهم أرمادا أو لاندكروزر أو سيكويا أو أكسبدشن أو تاهو أو يوكون بمحرك 6 سلندر تنفس طبيعي رغم أهتمامهم الشديد المصحوب بالهوس بمسألة استهلاك الوقود لدرجة بعضهم ماعنده مشكلة يشتري نسخة هايبرد من هذه الفئة رغم الفرق الكبير بالسعر لكن لأجل معدلات أستهلاك الوقود
أنا جربت اللاندكروزر 6 سلندر
فعلا الموتر مضحكة في الاستخدام! الموتر أشبه مايكون خاص للمدينة وعساه يقوم بالواجب!
في البر والمراقي والتحميل بالعفش والعائلة مايقارب السلحفاة لواحد متعود على 8 سلندر بنفس الفئة
وأعرف كثيرين مقتنعين جدا بهذا الحجم من المحرك ولا ألومهم لأن بالاغلب أول جيب يركبونه بعد ماكان يسوق سيدان 4 سلندر على الأغلب فبيشوفه مرضي بالنسبة له
مسالة ان محرك 6 سلندر الجديد حق الباترول أنه يوصل فوق 300 حصان بتنفس طبيعي علشان نظام الحقن المباشر فهذا شيء مستبعد جدا بالنسبة لي بالأخص من نيسان
صحيح فيه محركات 6 سلندر توصل أو تعدت حاجز 300 حصان وممكن بسعات أقل بدون تيربو أو سوبرشارج لكن لأن المحرك لم يخصص للاستخدامات الشاقة كما يحتاجها سيارات الدفع الرباعي من جيوب وبيك أب, فهي تتطلب العزم العالي عند الدورات المنخفضة فهذا ماراح يعطي أمكانية أن المحرك يوصل أرقام أحصنة عالية إلا أن كان المحرك مهيئ من البداية للأستخدام المدني فقط وليس للأعمال الشاقة
للمعلومية علشان تكون بالصورة
اللاندكروزر على مستوى عالمي مافي منه 6 سلندر إلا على مستوى الشرق الأوسط فقط!
وكذلك الحال للباترول عالمياً مايجي منه أصلا محرك 5.6 لتر الخاص بالأرمادا بقوة 317 حصان! بس عندنا ولا بالخارج ماعندهم إلا 400 حصان فقط!
استشداه بكلام زميلينا كومبو المتخصص مبيعات السيارات أن 80% من مبيعات الباترول على مستوى عالمي هي بالخليج فقط! وهذي نسبسة مرعبة جدا
ولا استغرب نفس الحال للاندكروزر ما أقول نفس النسبة لكن حصة المبيعات عندنا للاندكروزر عالية جدا والسبب عادي نشوف عزوبي شاري لاندكروزر وهو يداوم ويروح ويجي عليه! والشركة الأم عارفة بهالشيء!
لذلك بديهي جدا الشركات مثل تويوتا ونيسان تخصص محركات أصغر ليس لخضار عيون محبين هذي السيارتين لاندكروزر وباترول بل لأجل زيادة شريحة المستهلكين فقط لاغير علشان عدد المبيعات يكون أعلى
فأذا كان الفرق من 15 ألف ويوصل 20 ألف بين محرك 6 سلندر و 8 سلندر شيء طبيعي صاحب الدخل البسيط راح يشتري 6 سلندر لانه مايقدر يشتري 8 سلندر لكن يبي نفس السيارة
لو قارنا محركين 6 سلندر الجديد للباترول ومحرك السابق 8 سلندر الخاص بالارمادا قد نرى فرق مايقارب 42 حصان فقط وقد يرى البعض أن الفرق ليس كبيرا لكن لما نجي للأهم وهو معدل العزم بين المحركين لنلاحظ ان الفرق يصل إلى 95 رطل/قدم! وهذا فرق مو بسيط ابدا وبديهئ بيكون لصالح المحرك الاكبر سبب سعة المحرك
مسألة الاشاعة الي طالعة من فترة بألغاء محرك الارمادا على الباترول ذا القوة 317 حصان أعتقد أنها خطة تسويقية قذرة كعادة المسوقين لجعل الأتجاه الناس مبدئيا وذهنيا لمحرك 6 سلندر سواء كان فعلا راح يوقفون محرك 8 سلندر الخاص بالأرمادا والأكتفاء بمحرك 6 سلندر ومحرك 8 سلندر ذو قوة 400 حصان
وأذا كان مسألة ألغاء هذا المحرك بسبب كفائة الوقود فهذا عذر أقبح من ذنب بالنسبة لي ففيه محركات أعلى استهلاك وقود سواء على مستوى نفس السيارة أو على قوة أكبر ومع ذلك ماتوقفت وش معنا الباترول؟
أنا للمعلومية أمتلك باترول ذا محرك 317 حصان والي يقولي أن الموتر يصرف يسمحلي أقوله أن ماعنده سالفة!
موتري يمشيني أستخدام مدينة فوق 600 كيلو كحد متوسط! وساعات تتجاوز 650 كيلو ماشاء الله تبارك الله والسبب بس طريقة القيادة بالمدينة طبعا الكثير ماراح يتقبلها او ماراح يعجب بها وهو أني ما أخلي ضغط المحرك يتجاوز 2000 دورة بالدقيقة! إلا في الحالات الطارئة فقط (يازين نظام الهداوة في القيادة بالاخص أنك اصلا ماتحتاج دائما لكامل القوة إلا بأوقات الحاجة فقط تجاوزات, طلعات, تطعيس وماشابه ... الخ) وللمعلومية يمدي تجيب سرعة 120 كيلومتر/ساعة على نفس عدد الدورات هذي, الفرق الي بيدعس طول الوقت على أتفه سبب علشانه معجب بعزم السيارة لا يجي يلوم الباترول أنه زين يمشي 550 أو 500 بالمدينة! ونفس الشيء أذا مركب كفرات أكبر أو أعرض أو حجرية أو بوالين ويشتكي من الصرفية على أنه مايعرف السبب!
وأتمنى عدم مقارنة الباترول باليوكون والتاهو والاكسبدشن وماشابه بمعدلات أستهلاك الوقود لأن النظام الدفع يختلف تماما عنهم فالباترول Full time 4WD وكذلك اللاندكروزر بينما بقية المنافسين من نفس الحجم نظام Part time 4WD فبديهئ هذي أقل صرفية لكن مستوى رساوة أقل بمراحل بالطرق المعبدة كذلك أوزان الباترول والاند اعلى من بقية المنافسين من الدرجة الثانية لقدرات الطرق الوعرة.
