السلام عليكم اخواني
هذي تجربه مختصره بسيطه للكزس جي اس 350 يمكن تفيد احد
لي فتره وانا ادور على سياره بحدود ال 200 الف بما اني قررت اعطي الامبالا لاخوي لانه صدع راسي عندها
المهم انا جربت الجنيسس 2016 وما ناسبتني في عزلها ومشاكلها اللي مذكوره في كذا موقع
قلت ياولد خل نجرب اللكزس مع اني مااحب شركه عبداللطيف جميل واستغفالها للناس
الموهم استاجرت وحده موديل 2015 والعجيب انها كانت فل الفل زماشيه حول ال 25 الف لكن المشكله ان الهيداب ديسبلي عطلان وواحد من جساسات الكفرات عطلان بس قلت يالله مشي نجرب ونشوف.
الانطباع والمزايا:
السياره مره رايقه وقيادتها فيها متعه عجيبه
تسارعها وصوت الاقزوز يطرب على نظام سبورت بلس وسبورت وهاديه على نظام توفير الوقود ايكو.
الزينون العالي فيها قوي ماحد يقدر يكشح عليك العالي لو كشحت في وجهه يمكن تسبب له عمى مؤقت ههههه.
وفيها صراحه كل مميزات اللكشري اللي ودك من شاشه كبيره ونفقيشن وتبريد الخ الخ
العيوب
النظام الصوتي مو ذاك الزود يمكن لاني متعود على نظام بوس في الامبالا مدري
السياره ضيقه حيل من الداخل مايله للاسبور اكثر
استغرب سياره فخمه وبذاك السعر وباقي تفتح غطا فتحة السقف بيدك
استغرب عدم وجود نظام البليند سبوت النقطه العميا الله يعمي من شلحها ههههههههههه
يعني حاط رشاشات مويه للانوار وشايل النقطه العميا عجيب والله
وبس الله يحفظكم الزين مايكمل وسلامتكم السياره ما تصلح للي عنده عايله السياره شبابيه