السلام عليكم ورحمة الله وبركاته
مساكم الله بالورد
واتمنى تكونوا بصحة وعافية
اخواني الكرام ما لي الا الله ثم انتوا وودي بنصيحتكم وشوركم خصوصا مستخدمي وملاك سنتافي 2013 و 2014
بصراحة نويت على شراء هالسيارة بالتحديد بعد ما مليت من الكامري 2010 اللي معي
الكامري قصتها بدأت قبل سنتين شريتها مكدودة وماشية 150 الف
بعد ما شريتها بفترة صلحت التروس وبعدها بفترة كراسي المساعدات
وقبل 4 اشهر كان فيه تدقير في القير وقالوا ركب طقم كلتش ويضبط
وركبناه صحيح صار الكلتش خفيف بس التدقيرة موجودة في اكثر من نمرة
المهم يبي لها فك قير وتركيب تروس
ويبي لها كراسي مساعدات وفيها طقطقة بالدركسون
وبيني وبينكم مليت من السيارة وكرهتها .. وحلفت ما عاد اخذ مستخدم
المهم طلبت قرض ونويت اشتري سيارة .. بالقرض + مبلغ بيع الكامري
تقريبا يطلع المبلغ حول 120
واول ما طبيت على هونداي واول سيارة خقيت عليها السنتافي
شكل وفخامة ورزة
المهم جلست اقرا بعض المواضيع والردود .. اللي يمدح واللي يسب واللي يشتكي من بعض المشاكل
بصراحة تخوفت وقلت خلني اشوف غيرها .. وبالفعل لفيت على السيارات سواء بالوكالات او المعارض او حتى النت ولكن اتفاجأ اني متعلق فيها وشكله كان حب من اول نظرة هههههههههه
كان هدفي من السيارة تكون جديدة وشكلها انيق وخدومة وفيها دبل ( من موقف صار لي بنساح مع الكامري ههههه) وتكفيني لمدةلا تقل عن 5 سنوات واطمح للاكثر
فحاليا ودي اخذها بس متخوف وخصوصا من عيوبها وتوفر القطع واسعارها
فعندي عدة استفسارات واتمنى الاجابة بكل صراحة بعيدا عن التعصب واعتبروني اخوكم وتحبون لي الخير
خصوصا للي شرا السيارة وجربها وتحديدا موديل 2013 و 2014
1 هل اختياري للسنتافي موفق ؟
2 هل السنتافي قوية وتتحمل وتكفي ل 5 سنوات بدون ما تطلب قطع ؟
3 كيف اسعار القطع وهل هي متوفرة ؟
4 ما افضل وكيل لها وخصوصا بالرياض ؟
5 ما افضل وكالة او معرض اقدر اخذ منه السنتافي باقل سعر ؟
6 ما افضل فئة .. الفل والا النص فل ؟
7 كيف محركات السيارة هادئة والا مزعجة خصوصا في الخطوط والسفر ؟
وكيف رساوتها في السفر والخطوط الطويلة ؟
8 كيف صرفية البنزين ؟
9 هل بها عيوب ؟ اتمنى ذكرها
واي اضافة اخرى ممكن تفيدني ..
الف شكر اخواني واسف على الاطالة
بانتظار رايكم على احر من الجمر
وتقبلوا اجمل تحية
