تقرير وطرح إستفسارات عن Caprice LTZ 2008 V6

السلام عليكم ورحمة الله وبركاتة

حياكم الله جميعاً ..

أحببت أن أفيدكم بتجربتي للكابرس وفنفس الوقت سأحاول طرح إستفساراتي علّي أن أستفيد منكم إن شاء الله

،

بداية سيارتي Caprice LTZ 2008 v6

ماشيه لحد الآن 130000 كم ولله الحمد حتى الآن لم أواجه معها مشاكل تصل الى حد الإزعاج .. برغم من إستخدامي الوحشي لسيارة :smile:

بنسبة للمطبات أحاول نوعاً ما أتفادها بشكل شبه مقبول ، وبنسبة للقيادة على الطرق السريعة .. الممشى يتفاوت مابين سرعة 180 الى 210 والله الحافظ :smile:

وحتى الآن سافرت عليها أكثر من ثمان مرات ..

مزايا السيارة كثيرة وانتم اعلم منّي بها .. ولكنّي هنا أحببت أن أتطرق للإستخدام العملي لسيارة .. من مشاكل واجهتها .. سواءاً التي استطعت حلّها أو التي لم أوفق لحلها .. والله الموفق ..

*أول مشكلة واجهتها ..

هي مشكلة تكرر إنطفاء التراكشن ( مانع الإنزلاق ) وكانت بسبب حساس الهواء ونظفته بقيمة 200 ريال ..

*ثاني مشكلة ..
أذكر اني قرأت في هذا الموقع موضوع يتمحور حول صوت المطبات بالكابرس ( مع ان الصوت شبه طبيعي ) .. وكان الحل تغيير جلد عمود التوازن ( بقيمة خمسين ريال ) .. فـ توكلت على الله وقلت ليش ما أغيرهن ..
لكن لما جيت اغيرهن قالي صاحب الورشة لازم تغير ( كرسي المساعد والرمان اللي فوقه ) << وليتني ماطعته ..
لما غيرتهن ( أصلي ) تورطت .. طلع عندي صوت مع لف الدركسون ، وكان تحليل صاحب الورشة ان كرسي المساعد الي انا جايبه من ( الوكاله ) غير أصلي !
وحسب كلامه يقول انا متأكد وسبق فكيت عدة كوابرس .. وكرسي المساعد الأصلي يختلف تماماً عن الي انت جايبه من الوكالة !
وبالأخير طنشت المشكلة .. لأن الصوت مو مزعج الى ذاك الحد .. والى الآن لم ابحث الموضوع من جديد ..

*ثالث مشكلة ..
عندي صوت رمان السير اظاهر ( اظاهر بسبب مياه الأمطار )
يجي صوت عندي لما أمشي من 50 الى ستين .. وعلى حسب كلام كهربائي يقول ممكن المشكلة من رمان طرنبة الماء ..


ولله الحمد هذه هي المشاكل الي واجهتن حتى الآن .. إن استحضرت شيء آخر سأذكره ..

غيرت لسياره حتى الآن مرتين فحمات وغيرت زيت القير عند الوكالة وغيرت كفرات بعد ما مشيت عليهن 120000 كم بعد ثلاث سنوات من الخدمة ولله الحمد ..

والآن غيرت لسيارة كفرات يوكوهاما لكن إختلافهن عن كفرات الوكالة ان ارتفاعهن اقل ( 45 ) أما كفرات الوكالة فكان ارتفاعهن ( 55 ) ..

لكن سلبية كفراتي الجديدة ( 45 ) ان المطبات صارت أكثر حدّه ، لكن بالمقابل بعد ماركبت الكفرات الجديدة اختفى عندي رجه كانت في الدركسون ..
وكان السبب لأن كفرات الوكالة بعد المده الطويلة ( ايبسن ) وبتالي سببن رجه بالدركسون ..

الي يجعلن حقيقة متمسك بالسيارة حتى الآن جماله الداخلي والخارجي حقيقة ، إضافة على ذلك موصفاته الرائعة حقيقة ..

كـ التكييف لمقعدين منفصلين أو إمكانيت التحكم الإلكتروني بكل شيء بالسيارة كتقفيل الأبواب او التحكم بفلسفة الأنوار أو أيضاً إمكانيةحفض السيارة لإعدادات منفصلة لكل مفتاح على حده .. أو أو إلخ ..

فالسيارة رائعة حقيقة كما أن تماسكه على الطريق السريع فريد من نوعه ..

انا كثير اطلع على سيارة اخوي كامري 2009 .. وبالتالي لما انزل من الكامري للكابرس اجد فرق شاسع يجعلن اتمسك بسيارتي أكثر وأكثر !
لكن يبقى ان سيارات تايوتا متماسكه بدرجة تحسسك انك لورميته من فوق الجبل ماراح يصير له شيء .. ماشاء الله !
أذكر .. على طريق (الرياض- القصيم) بعض المنعطفات إذا كنت على الكامري لا اجزم اني آخذه على سرعة 150 اما الكابرس حقيقة بإمكانك انك تاخذه حتى على 210 !


إجمالاً الكابرس رائعة .. لكني الى الآن أواجه مشكلتين لا أعلم ما هو الحل الأمثل لهما ..

( مشكلة صوت الدركسون وصوت الرمان ) ..

الله يعين ويوفق الجميع ..