الحل النهائي لمكيف الفورد الالكتروني (اللمس)منقول

السلام عليكم و رحمة الله و بركاته

اليوم جايب لكم الموضوع اللي هز شبكة الانترنت

الكثير جالس ينتظر هذا الموضوع

وهو بعنوان


الحل النهائي لمشكلة قسام مكيف الفورد الاليكتروني


الكثير يعاني من هذي المشكلة التي وردت بالكراون فيكتوريا

والقراند ماركيز من موديل 98 الى 2009 للاسف هي عيب مصنعي

ولم تحل شركة فورد موتر هذه القضيه لاكثر من 10 سنوات

والكثير منا لجأ لتغيير وحدة التحكم وسعرها تقريبا 2000 ريال بالوكاله

وياليت تدوم معك فترة قصيرة وترجع نفس المشكله ومن التشليح تكلف تقريبا 800 ريال

ونفس المشكله

واليوم حليتها لكم بتكلفه اجماليه حوالي 4 ريال

اول شيء ابي اذكر لكم سيرتي الذاتيه ليتعرف علي اعضاء هذا المنتدى الاعزاء

حاصل على شهادة البكالوريوس في هندسة الاجهزة الطبية و طبعا الهندسة الطبية

ملمه بكل اقسام الهندسة من ميكانيكية و كهربائية و اليكترونيه وحاسب الي ومع الخلفية الطبية

لان كل الاقسام هذي تجتمع في كل جهاز طبي

وخبرتي في مجال العمل حوالي سنتين

و من ايام المتوسطة وانا اشتغل بالسيارات يعني افك واربط لين اخذت الخبرة الكافية والحمدلله

اول مكينه وضبتها كنت بالثانوية

اول سيارة غيرت ظفيرتها من الصدام للصدام كنت باول سنه بالجامعه

والحمد لله اليوم لقيت الفرصة اني انقل خبرتي بالمنتدى واعضاءه المميزين

و اتمنى الفائدة للجميع ولا خير في كاتم العلم

واليوم اعطيكم اقوى حل عجز عنه مهندسين شركة فورد موترس

وافتخر بصراحة بهذه النتيجه

نتركم من الهياط و ندخل بالثقيل


الفورد سيارة ما عليها كلام لكن وجد فيها بعض العيوب المصنعيه

والحمدلله كل الحلول في متناول اليد

وسبق وطرحت انا موضوع عن هذه العيوب وعدتكم اني باحلها

والحمدلله بقدرة القادر قدرت احله مشكله المكيف والباقي بالطريق جايه ان شاء الله

بعد البحث عن المشكله والاستكشاف حصلت مشكلتين تواجهنا بالمكيف

وحده منها ضعف الكهرباء على القسام فحصت الكهرباء وحصلت فيه نقص بمقدار 3 فولت تقريبا

وهذا حله سهل ولكن ماهي هذي مشكلتنا لانك لو حطيت عليه ال14 فولت وهذا هو الفولت الطبيعي

ماراح يشتغل معك القسام شغله الصحيح


اول شيء اكثركم عارف ان مبدأ عمل توزيع الهواء عن طريق القسام واللي هو موجود بداخل الشاشه حقت المكيف

ويشتغل القسام عن طريق سحب الهواء وعندك انت اربع اماكن تحتاج انك تتحكم فيها وهي

الهوايه الخارجيه

فتحة تهويه الطبلون العلويه

فتحة تهوية الطبلون الامامية

فتحة تهويه القدمين وانتم بكرامه

و كل هذي تحتاج لضغط سالب علشان تشتغل واللي هو عن طريق الهوز الاسود اللي يجي من المنظم الخارجي

طبعا الهوز الاسود مشبوك بالقسام بوحد التحكم وويسحب هوا ويسبب ضغط سالب والقسام وظيفته يوزع الهواء بين الاربع

فتحات عن طريق التحكم بالازرار بالشاشة وهذي صورة للشاشة اللي هي وحدة التحكم




والقسام عبارة عن قطعه بلالستيك سوداء راكب فيها اربع صمامات مثل بالصورة





والصمام هذا وظيفته اذا شبكت الكهرباء عليه يسكر واسمه العلمي Solenoid Valve وهو صمام مغناطيسي يسحب قلب

بداخله ويسكر واذا فصلته الكهرباء عنه يفتح وينسم الهواء


الحين انتم فهمتوا مبدا العمل نبي نشرح لكم طريقه الفك والتصليح

الخطوة الاولى فك الديكور اللي بالصورة



اسحبه من بدايته بالجهه اليسرى وهو راكب كبس بس بشويش عليه وانتبه للاسلاك المشبوكه فيه اذا فكيته افصلها


وراح تكون بالصورة هذي




فك اربع مسامير للشاشة 7 ملم وطلعها

بالصورة هذي






ومن الخلف تلقى صامولتين 10 ملم مثبتين الاهواز فكها وافصل الافياش

من خلف الشاشه تلقى مسمارين سكروب امريكي فكها بالشكل هذا





واقلب الغطاء اللي فكيته وتسوف القسام بالشكل هذا




مثل مانت شايف فيه اربع صمامات راكبه ببلاستيكه سوداء توزع الهواء عليهم

انت لازم تعرف الاتجاه للغطاء يعني مثلا مقلوب مثل بالصورة

وفيه نقطه مهمه لازم تسويها حط علامه على كل صمام علشان بعدين تعرف مكانه يعني مثلا حكه بسكروب ورقمهم ارقام

تسلسليه من اليمين ا و بعدين اليسار فوق 2 وبعدين اليمين تحت ثلاثة واليسار تحت اربعه

واحفظ اماكنهم

فك المسامير الصغيرة كلها وعددها 10 مسامير

فك الصمامات من القسام وانتبه للحديدة والسبرينق اللي داخله لاتطير وتجلس تدور عليها

وتشوفها بالشكل هذا




تلقى الصمام مكبوس من الخلف بكلبسين مثل بالصورة انا فاك كلبس واحد





وفك الكلبس الثاني بنفس الطريقه






وراح ينفك معك الصمام لاربع اجزاء مثل بالصورة





حنا يهمنا القلب اللي بالصورة



مثل ما شفتوا فيه جلده موجوده وهذي هي سبب التنسيم

الجلدة صغير حجمها بالنسبة للقسام الاسود وتنسم الهواء ويروح علينا الضغط

وهذ صورة للمقارنه بين الجلدتين






رح لقطع الغيار وخذ معك القلب والقسام الاسود علشان تدور على مقاسها

الجلدة تاخذها بريال يعني عندك اربع جلد باربع ريال لكن خذ جلدة تسكر التنسيم زين يعني ما يكون فيه فضاوة ابد

مثل بالصورة هذي




بعد ما تجيبهم اقطع الجلد القديمه و ركب الجلد الجديدة وحط كريم خفيف على الجلدة علشان تدخل بالقسام بسهوله و بعدين تسكره صح

ركب الصمام مثل ماكان اول و ارجع اكبس الكلبس عليه مع ملاحظة وزن المجرى للحديدة مثل بالصورة





ركب الاربعه كلهم واكسبسهم وبعدين ركبهم بالقسام بالترتيب اللي كانوا عليه اول

وارجع طبق كل شيء مثل ما كان

والنسبة لضعف الكهرباء اللي قلت لم عليه هو ان الكهرباء ينزل على الصمام يعني تعطيه 14 فولت

واذا اشتغل الصمام تنزل بفارق جهد 3 فولت بسبب ضعف التيار الكهربائي ويصير الجهد على الصمام

وهو شغال من 11 الى 12 فولت وهذي المشكله نقدر نحلها بس الافضل نتركها مثل ما هي لاني انا جربت

ورغم ضعف الكهرباء المكيف عندي اوكيه لان اذا زودنا الجهد عليه مثلا الى 14 فولت يزيد التيار عليه ومنها تزيد

حرارته نتيجه لمرور التيار و بعدين يقل عمره الافتراضي ومن الصعب الحصول عليه

وطبعا هو طبيعي الحين ترتفع حرارته مثل ما قلت لكم نتيجة لمرور تيار عالي بداخله لتكوين المجال المغناطيسي

علشان كذا نخليه يتغذى ب 11 فولت افضل

وفيه نقطه مهمه لازم تعرفها

الهوايه الخارجيه ما راح تسكر زين معك وهذا تصميم الوكاله كنوع من الامان علشان يتغير الهواء

داخل السيارة

وانصحك انك تقفلها يديويا سكرها زين وثبت الذراع حقها بسيم ولا باي شيء

لانه راح يفرق معك التبريد لان الهواء اللي داخل السيارة يبرد ويرجع لك

والنقطه الثانيه تفتك من ريحة الديزل كل مريت من جنب تريله المكيف الريحة كلها عندك

وكذا تكون حليت المشكله للابد انشاء الله

واتمنى منكم الدعاء

واي استفسار انا جاهز