السلام عليكم ورحمة الله وبركاته
انا معي جراند ماركيز 2005 حاليا بعد الفكتوريا الاسبورت والله له وحشه الاسبورت
بس يالله كل شي مقدر خلاص كبرنا على السيارات الرياضيه :c008:
ماعلينا خلونا نقولكم القصه مع المكيف وان شاء الله تفيد الاعضاء بشكل كبير لاني اسمع
كثير عن هالمشكله
القصه ياطويلين العمر قبل امس طفيت السيارة ونزلت عند محل وجلست تقريبا نصف ساعة
ورجعت وشغلت السيارة واشغل المكيف الا والمكيف يطلع هواء حار مره كاني حاطه على اعلى
درجه على الحراره وارجع و اطفيه واشغل مره ثانيه واغير درجة الحراره من 15 الى 30 وارجع
واغيرها الى 15 مافيه فايده الهواء حار مره طبعا للمعلوميه المكيف الاكتروني
المهم قلت مالي الا اوديها للكهربائيين نشوف وش يقررون وديتها للكهربائي الاول وقال :
عندك المنظم حق البارد والحار خربان وهي قطعه اكترونيه داخل الطبلون ولاتقدر تغيرها الا
تفك الطبلون ويكلفك فك وتركيب 400 ريال والقطعه ب 200 ريال قلت مافيه حل ثاني قال : نلغي لك خط
الحار ونخليه بارد وقلت طيب بالشتاء مافيه حار قال : لا نرجع نشبك الحار ونلغي البارد
قلت بكم ؟ قال : ب 100 ريال قلت اوكيه شكرا يعطيك العافيه ورحت لستة كهربائيين ونفس
الكلام واروح ورشة البيان ويكشف عليها قال نفس الكلام ولكن التكلفه 600 ريال شغل يد
بعد الخصم والقطعه ب 200 ريال والمجموع 800 ريال وتقعد السيارة يومين عشان يفكون
الطبلون كامل المهم قلت يعطيك العافيه وطلعت من عندهم
المهم احترت افك الطبلون واغير القطعه بس المشكله فكت الطبلون صراحه تخوف شوي من
ناحية الاصوات وتبي تكلف .. ولا الغي الحار واريح راسي من التكلفه العاليه .. طبعا الغاء الحار هو
الاقرب واذا جاء البرد الغي البارد .
المهم رنت براسي فكرة بما ان القطعه اكترونيه والموضوع له علاقه بالاكترونيات واحيانا
الاكترونيات والكمبيوترات تعلق قلت ياولد خلني افصل البطاريه واشوف ومو خسران شي
رحت ووقفت بعيد شوي عن الكهربائيين وفتحت الكبوت وطلعت مفتاح 8 وفكيت الاصبع
وجلست تقريبا 5 دقائق البطاريه مفصوله وبعدها ركبت البطاريه وشغلت السيارة وقلت
بسم الله على بركة الله نضغط على زر المكيف واضغط عليه توقعو وش النتيجه
النتيجه ياشباب اشتغل المكيف وصار يبرد زي الحلاوه والحمدلله
ارجو انكم استفتدو من المشكله هذي والحل اللي ماكلف ولا ريال
ودائما اذا صارت مشكله بالسيارة في الاكترونيات او الكمبيوتر افصل البطاريه
قبل ماتروح للمتخصصين وشوف اذا صلحت الحمدلله واذا ماصلحت الشكوى لله
ودائما لازم تروح لااكثر من متخصص خاصة اذا كانت المشكله مكلفه ماديا
والله الموفق
