مشكووووور عالموضوع الرائع اخوي
انا عندي بعض المشاكل واتمنى تساعدني القى حلول لها
انا شريت قراند ماركيز موديل 2010 ماشي 17 الف كم
والموتر جا فيه حادث
المهم دخلته الورشه وسويت سحب شاصي وغيرت مقصات وصلت اشياء ثانيه
والحين سيارتي مازالت فيها مشاكل كثيره وهي :
1 - الدريكسون صاير ثقيل ولفته تاخذ مجهود تقول اني سايق تريله
2 - اذا كسرت الطاره لليمين الكفر يحك بالشاصي وما تتحرك السياره .
3 - اللفه صايره قصيره يعني عشان اخذ فوق تحت اضطر اني ارجع ريوس مع ان فيه مساحه كافيه ادور
4 - اذا شغلت السيارة طبيعي واذا عشقت لل D احيانا تطفي واحيانا لا بس يكون في ضعف في صوت المكينة واذا مشيت وبدلت التعشيقه من الاول للثاني تنتع السيارة
5 - اذا دعست بنزين تكون بطيئه السياره تقول انها 2 سلندر مو ب 8 واحس انها مكتمه واضطر اني اوقف وافضيها وادعس بنزين لفتره
6 - المكيف يشتغل ويكون بارد وبعد فتره يصير مافيه هوا رغم انه شغال وصوته شغال
واذ فتحت الكبوت احصل الليات مثلجه
7 - المكينه ترج دائما واذا طفيت السياره صوت المحرك يرج
8 - السياره طبعا بعد الحادث طلعت الاير باج والحين مافيها وانا ابي استفسر بخصوص تركيب اير باج جديد
9 - حزام الامان مرتخي ولو ربطته يكون راخي يعني مو مشدود
10 - اللمبه الداخليه فالسياره صارت ما تشتغل والسويتش حقها اللي جمب الدريكسون ما يشتغل
11 - ديكور السياره الداخلي يطبع اصوات ابي اربطه ويخف الازعاج اش احسن طريق تنصحني فيها
12 - السياره عادة اذا حطيتها فال D أو R تمشي من حالها لكن سيارتي لازم ادوس بنزين عشان تمشي
13 - قربة الميه حق المساحه تهرب المويه كيف اصلحها
تقريبا هذي المشاكل اللي عندي واتمنى تساعدني القى حل لها لاني مليت من كثر ما اروح اوديها للورش
واكون شاكر لك
شكرا اخي على وانا عندي مشكله سيارتي كراون فكتوريا 98 والشكمان يطلع دخان يعني تبويش واذا دعست بنزين بقوه يطلع صوت غرغرة
وارجو ان تفيدني
شكرا اخي على المعلومات
لا شكر على واجب وحياك الله
- بخصوص مشاكلك المتعلقة في الديركسون وغيره تأكد من علبة الدركسون او ماتسمى الدوده انها سليمة وايضاً طرمبة الباور ولا يكون فيه اي تهريب لزيت الدركسون . ايضاً في لف الطاره للاخير ممكن بعد الحادث لم يتم عمل السحب بشكل صحيح وهو طبيعي في اغلب سيارات الفورد انه يدق في الخلف ولكن بشكل معقول , ايضاً يفضل فخص الاذرعه ومتعلقاته.
- الرجه والتفته وقلت العزم والانطفاء يجب فحص السيارة بالكمبيوتر والتأكد اي حساس يحتاج الى تغيير او اذا كان فيه مشكلة في احد الكويلات تسبب رجه في الماكينة . عند اطفاء المحرك وتحس برجه او عند تعشيق السيارة على الـ D تأكد من سلامة كراسي الماكينة وكرسي القير.
- الايرباق للأسف الشديد راح يكلفك مبلغ وقدره وخصوصاً انك تحتاج تصلحه في الوكالة فقط لا غير.
- ايضاً حزام الامان متعلق بالايرباق ويجب اصلاحه في الوكالة او فك البكره تبع الجزام وملاحظة اذا كان بالامكان شده او تغير نفس البكره او بعض السيارات يكون فيها دينمو خاص انه عند الضغط على الفرامل يشد الحزام هنا يجب تغييره.
- المكيف يجب فحص حساس الفريون او بالاصح تغييره لأن وظيفته عند برودة المكيف يخلي الكمبرسر يفصل حتى ماتثلج المواسير او خزان الفريون.
- اللمبة الداخلية تأكد من انها سليمة ممكن احترقت او لا قدر الله فيه مشكلة في الظفيرة بعد الحادث.
- للأسف الشديد بعد الحادث وخروج الايرباق وخصوصاً ان الديكور مصنوع من البلاستيك فقد يكون حله اما بفحص الكلبسات او انك تحشي نفس الديكور بقطع صغيره من الاسفنج تكون عازله بين الديكور والطبلون.
- قربة المويه عندك خيارين انك تفحص القديمو وتشوف محل التهريب وتغريها او تلحمها بلحام بارد او يتم تغيير القربة بقربة جديدة
نصيحة اخيرة قد تكون السيارة ماخذه حادث جامد فالافضل بيعها والتخلص منها لان قد تكون هناك مشاكل اتيه لا سمح الله
لا شكر على واجب , وبخصوص التبويش قد تكون اما من جلد البلوف وهي في غالب الامر تخرب دائماً
او من نفس شنابر الماكينة تحتاج الى فك الماكينة وتغييرها والافضل التوضيب
وحياك الله في أي وقت
أخوكـ
مشكور اخوي
انا فحصت السياره
وكانت نتيجة الفحص كالتالي :
- تغيير حساس شكمان
- غيار حساس هوا
- غيار حساس DPFE للمكينه
- ولازم ينظف دعسة البنزين
بس انا في واحد قالي ان اذا السياره تطفي والعزم ضعيف تكون المشكله من طرمبة البنزين
انت شرايك
؟
لا شكر على واجب
وبالفعل اذا فحص الكمبيوتر ظهر انه فيه مشاكل في هذه الحساسات يفضل تغيرها وتنظيفها
ماعدى حساس الشكمان لأنه راح يخرب بعد فترة طويلة ويفضل الغائه بالبرمجة ان امكن او اصلاحه
طبعاً بخصوص طرمبة البانزين اذا فيها اي مشكلة راح تطفي السيارة مباشرة عند اول دعس للبانزين
وذلك لضعف ضخها البانزين للماكينة
أخوكـ
السلام عليكم اخواني انا شريت فورد فكتوريا 99م سعودي وصراحه تقرطست فيه اللي باعني غشني ولاحول ولا قوة الا بالله المهم اكتشف فيه صدمه في الشاصي من الامام من جهة اليمين والسيارة تحذف بقوة على اليمين اذا تركت الدريكسون ناس قالولي انتهى وناس تقول يضبط ويرجع مثل اول اهم شيء ماتكون الضربه ورا افيدوني وجزاكم الله كل خير عني وعن المسلمين