السلام عليكم ورحمة الله وبركاته
كل عام وأنتم بخير، ومبارك عليكم الشهر بعد الزحمة :)
بدخل بالموضوع على طول....
أنا قررت أشتري سيارة جديدة ومحتار بين أكثر من سيارة طبعاً اللي تناسب ميزانيتي.
ميزانيتي هي 60000 ريال - 70000 ريال وماهي مشكلة أوصل أكثر شوي اذا كان فيه سيارة تستاهل.
ولكن السيارات اللي انا محتار بينها كلها اسعارها بين الستين والسبعين.
مالكم بالطويلة....
أنا محتار بين أكثر من سيارة (طبعاً كلها 4 سلندر إلا اللومينا 6 سلندر) ومنها:
1) هونداي سوناتا 2007: تخشيبة، جنوط 16، ريموت كنترول، كشافات ضباب، قير أوتوماتيك وهي بحدود 60500 ريال شاملة اللوحات والإستمارة. (مدري عن الـ ABS والوسائد الهوائية ومثبت السرعة هي فيها ولا لا؟).
2) سوبارو ليجاسي 2006: دفع رباعي، مكابح ABS+EBD، وسادات هوائية للسائق والراكب، مثبت سرعة، مكيف إلكتروني، جنوط 16، 6 سيديات وكاسيت، ريموت كنترول، كشافات ضباب، قير أوتوماتيك وهي بحدود 66000 ريال (بدون فتحة) و 70000 ريال مع الفتحة شاملة اللوحات والإستمارة. (مدري عن المواصفات الثانية والباقية بالضبط).
3) شيفرولية لومينا 2006 LS: ريموت كنترول، ABS، جنوط 16 وهي بحدود 69000 ريال شاملة اللوحات والإستمارة وطبعاً ما اعرف باقي المواصفات الثانية بس يقول الموظف في المبيعات هذي المواصفات التوب بالنسبة للـ LS ، طبعاً لاتقولون انتظر للموديل الجديد 2007 لأن الشكل ماهمني أنا أهم شيء أبي سيارة بسعر معقول ومواصفات معقولة، طبعاً أنا أتكلم عن الجميع والجميع يقول مافيه إلا لون أبيض بس بالنسبة للـ LS كامل المواصفات، فما أدري وش رايكم بالأبيض، ووش أفضل الجميع ولا العيسى...مع العلم أني مدري يمكن العيسى عندة ألوان ثانية.
4) تويوتا كورولا 2007/2006: مايحتاج أكتب المواصفات الزبدة انها فل كامل فتحة وجناح والمكينة 1.8 يعني أعلى فئة بالكورولا ومدري سواءاً 2006 اذا كان متوفر ولا ناخذ 2007 مع ان شكل الشبك ماعجبني أبد وهذي سعرها بحدود 63500 ريال على حسب ما اتذكر طبعاً القير أوتوماتيك وفتحة سقف وجناح والمكينة مثل ماذكرت 1800 وهي أعلى نوع وريموت كنترول مع أني بصراحة مستكثر 63 ألف على كورولا، بس الجودة يمكن تكون لها دور في أختياري :) .
5) مازدا 6 زووم 2006: طبعاً معروفة ان السيارة رياضية ومعجبتني صراحة وطبعاً سعرها بحدود 74000 ريال للهاتشباك مع اني ما ابي هاتشباك ابي سيدان فل كامل بنفس مواصفات الهاتش باك مدري فيه ولا لا؟ لا أني ما احب الهاتشباك...يعني خل نقول سعرها 70000 ريال وطبعاً المواصفات ماشاء الله روعة مثلاً جنوط 17، ريموت كنترول بنفس المفتاح مثل مفتاح الكابريس واللومينا، فتحة، جناح بشكل رائع، كشافات ضباب على ما ااتذكر، زوائد رياضية، شكل رياضي رائع.
6) هوندا اكورد 2006/2007: سيارة غنية عن التعريف ولكني حاطها أخر أحتمالاتي خصوصاً أني من الناس اللي اعجبهم شكل 2005 أفضل من 2006 و 2007، ولكن قلت ماهي مشكلة نحطها من ضمن الإحتمالات...طبعاً مواصفاتها قير أوتوماتيك، جنوط 15 (طيس) ريموت كنترول، وسادة هوائية للسائق، فرامل ABS، مراتب مخمل، مشغل CD، وهذي سعرها 72000 ريال بدون فتحة و 75000 ريال مع الفتحة هذي لـ 2006 و 2007 يمكن زايدة حبتين....ومثل ماقلت هذي أخر احتمالاتي أولاً لسعرها المبالغ فيه وثانياً لقطع غيارها الغالية وثالثاً انها طيس وماهي جنوط 16 مثل الباقي وأخيراً مثل ماقلت انا ما اقتنعت بالشكل الجديد.
7) نيسان ألتيما 2006/2007: أنا هنا ملخبط...سمعت أن 2007 نزل عندنا..وبعد شفت صور لـ 2007 صور روعة للسيارة فما أدري هل نزلت 2007 عندنا فعلاً؟ واذا نزلت هل تغيرت شكلها ولا وش نظامها....طبعاً انا ما أعرف أي شيء عن ألتيما ولا أعرف اسعارها ولا أي شيء رحت للحمراني بس شفت السيارة بس ما عرفت ولا سألت عنها...عشان كذا اللي عندة معلومات عنها مثل الأسعار وغيرها لا يبخل علينا...طبعاً انا أبي فئة تكون مقاربة لمواصفات السوناتا والليجاسي اللي حطيتها فوق.
8) فورد مونديو 2006: مع أني ما أعرف شيء عن هالسيارة ولا قد زرت وكيلها إلا اني معجب بهالسيارة لية مدري...ما أعرف أي شيء عنها بس اللي أعرفه أن أعلى فئه فيها سعرة مايزيد عن 55000 ريال فما أدري هل هذا صحيح ولا لا؟ ووش رايكم بالسيارة هل هي مثل جودة وراحة الكراون فكتوريا ولا لا...وأي واحد عندة معلومات عنها سواً أسعار أو مواصفات لا يبخل علينا فيها.
** وأي واحد ينصحني بسيارة ثانية غير اللي كتبتها فوق وتكون مواصفاتها وأسعارها مقاربة ترونا نستقبل
أنا اللي يهمني سيارة زينة وحليلة تمشيني 5 سنين بالكثير ويكون سعرها 60 - 70 ألف...وتكون جنوط 16/17 وكشافات ضباب و ABS ومن هالحتسي
إلا على الطاري.... الحين دودج تشارجر وش رايكم فيه ؟ وهل سعره حولنا ولا ماهوب حوالينا ؟
سمعت أن سعره يبدأ من 72 ألف فهل هذا صحيح....ووش رايكم فيه بشكل عام (مع أني أحس انه كبير شوي علي).
أنتظركم وأنتظر آرائكم...واللي يعطيني رأي(ن) زين واشتريت السيارة بناءاً على كلامة إن شاء الله بعطية دورة فيها << تلايط بس
ورجاءاً لحد يصوت فوق إلا بعد مايقرأ موضوعي هذا...عشان فيه بعض الناس متعصبين حيل حيل...مثلاً متعصب للاكود يدخل يشوف تصويت يصوت لها وبدون مايقرأ وش ابي...يمكن بعد مايقرأ موضوعي بتفهم يشوف أن أنسب شيء لي مثلاً الألتيما (كمثال بس).
مع أني أحس أني أميل للسوناتا مدري لية...حليلة وسعرها زين ومواصفاتها روعة صراحة وشكل أكثر من ممتاز خاق(ن) معه أنا :)
وخصوصاً أني أبي سيارة تمشيني بس 5 سنين بالكثير يعني إن شاء الله أي سيارة بتمشيني هالـ 5 سنين ماهي مشكلة أبد..
بس رجاءاً لا يجيني واحد يقولي كوري ولا ياباني ولا أمريكية ولا هندي...ما أحب كذا << تكفى!!!
ننتظر ونشوف ، وعسى الله يكتب اللي فيه الخير..
وشكراً لكم مقدماً..
تحياتي،
