السلام عليكم ورحمة الله وبركاته
أخواني ، أخواتي ، ياجماعة الخييييير........... هذا أول مشاركة لي في المنتدى !! يعني سامحوني مقدماً على الإطالة وأي لخبطة في هالمشاركة :)
ثانياً: والله شوقتوني ياجماعة إني أشارككم بقصتي حول قراري بشراء سوناتا 2006، من المجدوعي بالشرقية، رغم إني بالرياض ...
وبأقول لكم من الآن، تروا ياجماعة اللي راح يقرأ هالموضوع لنهايته ما أقدر أضمن له إنه يترك الكمبيوتر ويشتري سوناتا الليلة هاذي !! فاللي شايف نفسه هافــّه على سيـّارة فأحسن له لايكمــّل ، لاتجيه حالة هيجان ويشتري سوناتا الليلة !! :-) ..
على العموم ، القصة ومافيها يالربع، إني موظف في قطاع خاص، أعمل في تقنية المعلومات (بعدين حتعرفو ليش أتكلم عن مهنتي) ، ومعنى ذلك إن الدعوة فيها إيجار منتهي بالتمليك ، كاش مافيه، ركـّزوا على هالنقطة ، كاش مافييه !! .. اتفقنا ؟ اتفقنا !!
لفيت المعارض ولفيت السوق ولفيت سوق السيارات الخميس والجمعة، بصراحة ياجماعة ماقدرت أثق !! مااااااااش ! مافيه ثقة راضية تطلع من قلبي على أي سيارة ماأدري ليش بس كل ما أشوف سيارة قلبي يصير يرجف يقول (أوعى أوعى تحط قريشاتك في مقلب ومصايب ماتعرف لها آخر) !! خاصة الرياض سلملي عليها !! سواقتها كوم والعالم كله كوم ثاني، حتى السيارات الفارهة واللكجري مشبطة ومخدشة ومبوّشة !! .. ياساتر !! .. آخرة الشيء استقريت على خيارين لا مفر منهما، الأول إن أشتري سيارة متوسطة الحجم (لا أحد يقنعني بسيارة صغيرة الحجم، اللانسر لها معاي ست سنين وخلتني أزهد الدنيا من صغرها) .. ولازم سيارة جديدة !! .. إذن الخيارات متاحة بين الأمريكي والأسيوي والأوروبي ، الأمريكي ماصفى لي منه إلا المونديو النص فل بحدود 64 ألف، واللومينا إل إس 2005 بس سياحي عادي جداً بـ63 ألف ريال. والأوروبي سوقه بعيد علي (رغم إن المونديو أصلاً أوروبي) ، والأسيوي طبعاً عندنا الأكورد والكامري والمازدا6 والسوناتا والألتيما والماكسيما والجالانت، هذا الصف الأول ، والصف الثاني تجي لك مثلاً دايوو والكيا وغيرهم، هذي خرجوا من التصفية. الجالانت طلعت من أول تصفية بسبب انعدام الخيارات المريحة وسعرها الغالي ماأدري على ايش، هذا غير إني تعقدت من ميتسوبيشي وشكل الجالانت قديم، المازدا 6 برضو برّا القائمة ، شكلها قديم والمنتدى يمدح مكينتها لكن لمـّا ركبتها حسيتها صغيرة شوي مقارنة بغيرها، بقينا في الأكورد والكامري والألتيما والماكسيما، هذي الأربع أنا بصراحة ما أختلف مع أي شخص بأنها غاية أي شاب، وكنت ناوي على واحدة منهم ... إلى أن أتت لي عروض السوناتا اللي خلت راسي يلف ويقول وين على الله يارايح ويييييين !!
والآن ندخل في الموضوع الثاني، وهو خاص عن السوناتا 2006 والموديل اللي اقتنعت فيه، وبرضو بأناقش فيه كيف قررت ونويت على السوناتا 2006 رغم وجود الأربعة الوحوش القوية ( اكورد + كامري + التيما + ماكسيما) .. علماً بأني من المشترين اللي مايخلي مصدر بالإنترنت إلا ويفلــّه فل عن السيارة، ومن مصادر أبحاثي مجلات السيارات الأمريكية والأوروبية، ومواقع متخصصة غربية، ومنتديات غربية ، أمريكية وأوروبية، وشفت آراء مستهلكين كثيييييير ابتداء من الولايات الغربية لأمريكا والشرقية، ومروراً على عملاء سوناتا في لندن ودبلن وأوروبا، وإنتهاءً بعملائها بالخليج العربي وأستراليا .. السيارة تروها ياجماعة جاءت مثل التسونامي في سوق السيارات السيدان المتوسطة الحجم (وهنا أشدد على هذا القطاع المعين من سوق السيارات، لأن منافسته بشعة وقاتلة) .. وجاءت السوناتا كالتسونامي وغيرت قواعد اللعبة في السوق !! وراح تعرفوا ليش سعر السوناتا أقل من منافساتها ، وأكيد ليس بسبب سوء الجودة ..
