السلام عليكم و رحمة الله و بركاته ...
شباب عندي إستفسارات بخصوص الأكورد << طالب ثانوية عامة :D ...
طبعاً قررت أنا آخذ أكورد في هالأسبوع الجاي إن شاء الله ...
ألف ألف مبارك ، الله يعطيك من خيرها ويكفيك شرها
1- بالنسبة للون أنا ودي بالأبيض لكن الوالد يقول الأسود أفضل ... فالي عنده أكورد لون داكن و خاصة الأسود يقول لنا كيف صبغة السيارة بعدها حلوة ؟؟؟ ... و كيف في التنظيف و حالها مع شمسنا الحلوة ... و حتى الألوان الفاتحة ... يعني تحس إنها تغيرت ؟
أنا معي لون كحلي ، من الناحية الشكل فالألوان الغامقة رسمية جدا ورائعة مع اللون البيج ( الداخلي )
لكن من ناحية التنظيف ، فالله يعينك ، وكذلك تجيب الحر ، والخدوش الخفيفة تكون واضحة
أما الألوان الفاتحة فشكلها في الغالب يكون شبابي
وبما إن اللون الأبيض واللؤلؤي راكب على الأكورد مية مية فأنصحك بأحد هاللونين ، وأنا ندمت إني ما أخذت أبيض
2- و بالنسبة للمكينة ... هل تفضلون ال V6 ولا ال I4 ? ... يعني كيف الصرفية و العزم و هدوء المكينة و هل الستة سلندر تشجع إن الواحد ياخذها ؟؟
من ناحية العزم ، فلا شك إن الستة سلندر أقوى بكثير ، بل تعتبر قوية جدا ، 240 حصان مهب سهلة
أما الصرفية فأكيد بتكون أكثر من الأربعة سلندر ، لكن ما أدري عن الفرق بينهن
أما هدوء المكينة ، فالستة سلندر أهدأ وأكثر سلاسة وتجاوب
لكن المشكلة الوحيدة ، إن سعر الستة سلندر غالي جدا ، ومبالغ فيه
أما هل تشجع إنك تاخذها وإلا لا ، أنا أعطيك الفرق وأنت شف ميولك
يوجد في 6 سلندر ما يلي :
1- تحكم بالصوت من الدركسون
2-مزودة بـ 6 إيرباقات ( في 4 سلندر 4 إيرباقات )
3- نظام TCS
4- شكل الجنوط يختلف
5- مبين درجة الحرارة
أظن هذي الفروق فقط
3- بالنسبة للداخلية .. أي الأفضل و الأريح الجلد ولا المخمل ؟؟ ... و كيف مسجل ال 6 سيديات ؟؟؟
مراتب الجلد أريح من المخمل ، ولا شك أن الجلد أفضل إذا عند استعداد تتحمل الحرارة
أما مسجل الـ 6 سيديات ، فعن أي شي تسأل بالضبط ؟
4- بالنسبة للنوافذ أذكر إن كانت من العيوب المصنعية إن النوافذ الجانبية تخدش لما تنزلها يعني بعد ستة شهور أو سنة تشوفها مخدووشة << موظف الv-kool ... العيب هذا موجود في 2005 ولا ؟؟
أول مرة أسمع إن النوافذ تخدش ، سياتي معي من أكثر من سنتين ، ولا فيها أي خدوش أبدا
وفقك الله لكل خير
وأشكرك على حسن تنظيمك :)
