بخصوص التأمين ساعدوني شريت سياره واحتاج التامين

هلا و غلا اخوي: اول شي الله يبارك لك في ما شريت و يعطيك خيره و يكفيك شره

بالنسبة للتأمين: ضد الغير او يسمى طرف ثالث: هذا الزامي وهو لو لا قدر الله سويت حادث شركة التأمين تتحمل تصليح الطرف الثاني و انت تصلح سيارتك (اذا كان الغلط عليك)
مثال: سويت حادث لا قدر الله و طلع الخطأ عليك بنسبة ٣٠٪ و تكلفة سيارة الخصم اللي صدمته ١٠٠٠٠ ريال: ما تدفع شي و شركة التأمين تدفع للرجال ٣٠٠٠ ريال فقط و هكذا... هذا نظام الزمنا فيه المرور عشان ما يصير الواحد ينسجن عشان حادث و جب كفيل ومن هالكلام....

التأمين هذا مدة غالباً سنة و يتجدد ... طبعاً وقت التجديد غالباً نفس السعر و ممكن يرتفع عليك شي بسيط اذا صار لك حادث لان سجلك صار فيه حادث وهذي شركات التأمين تشوفها مو شي كويس (خصوصا لو الخطأ عليك او نسبة منه)


التأمين الشامل: هو تأمين على سيارتك حسب قيمتها السوقية... و هذا التأمين اقرأ العقد عشان تعرف تفاصيله: غالباً يكون اصلاح وكالة و يشمل اصلاح سيارتك انت حتى لو انت المخطئ و سيارة خصمك بعد! اذا انت الخطأ عليك يصلحون سيارتك فقط! يعني بالعربي يشمل اي ضرر يقع عليك انت سواء مادي او اصلاح

فيه ميزات تضيفها مثل: اصلاح وكالة زي ما ذكرت فوق + سيارة بديلة+ تأمين ركاب+..... يعني لازم تقرأ العقد...

فيه نقطة مهمة: عند وقوع حادث سواء الخطأ لك او عليك لازم تدفع مبلغ يسمى Deductable ممكن يكون ٥٠٠ او ١٠٠٠ ريال او نسبة من الاصلاح (حسب القعد)

غالباً هذا التأمين ينقص سنوياً بحكم ان السيارة تقل قيمتها السوقية سنوياً ... فيه نقطة صغيرة ان شركات التأمين تأمن لك على السعر اللي انت تقوله .... و قت الحادث او التعويض لو صار لا قدر الله تلف كلي... هم يعوضونك على السعر اللي يشوفونه مناسب للسيارة وقتها!

مثلاً لو كانت سيارتك ٨٠ الف جديدة اول سنة تأمن مثلاُ شامل ٨٠٠٠ الاف ريال... السنة الجاية لو امنت بنفسك السعر ما راح يقولون لك لا!! ياخذون فلوسك! بس لو صار لك حادث لا قدر الله و تلف كلي ما يعطونك ٨٠ الف! يعطونك مثلاً ٥٥ الف اللي هو قيمة السيارة بعد السنة الاولى


ملحوظه اخيرة : لا افتي شرعياً و لا اتكلم عن الحكم الشرعي للتأمين فبعض المشايخ حرم التأمين والله اعلم (حبيت بس اذكر لك) لكن المشكلة تشتري سيارة غالية و يجيك متهور يدمرها لك و تتوهق

ان شاء الله يكون الشرح وافي