اخواني الكرام , انا حصلت لنكن تاون كار موديل 95 بس ماشاء الله تبارك الله يوم شفته شني وقفته ونظافته ونزلت للموتر وحصلته نظيف بمعنى الكلمة داخليا وخارجيا لاصدوم ولا شي وركزت على راعيه بالحرارة قلت له / كيف الحرارة بالصيف وبالشتاء واثناء الممشى ؟ قال سليم مافيه شي ولاترتفع , فهل كلامه صحيح ؟ الرجال باين عليه طيب وواضح انه صادق وحد السيارة علي 20الف وهو مب شريطي ومب راعي معرض .الموتر تبعه ,
السيارة ماشي 400 الف ,انا قلت في نفسي مايهم الممشى دام ان السيارة نظيفه , وقالي انه مغير تحت السيارة بحدود 1000 ريال من مقصات واذرعه وغيرها ويقول ان قطع غيارها رخيص ,
السيارة ركزتها ممتازة ماشاء الله ,الكفرات جديده الفحص جديد والاستمارة جديده لارش ولا صدوم ولونها ( سمني ) وفيها فتحة سقف وداخليتها لون أخضر زيتي جلد ( الموتر نفس الكارتير يقول لكن مافيه تسخين مراتب ) < جاء واحد استغرب فكر ان الموتر مرشوش كامل بحكم داخلية الموتر ,يقول مايجتمع لون اخضر مع اللون الخارجي ,
قالي راعيها ان الموتر فيه حذفه على اليمين ( مدري كم اصلاحها ؟ ) داخلية الكبوت نظيف وواضح بعض القطع جديده ومغيره ,الايرباقات سليمة
انا ياجماعة الخير الموتر بيجلس عندي فترة بسيطة وببيعه انا بشتري الموتر مؤقت فقط وابيه بالرياض لجامعه الامام ( من بيتنا الى الجامعه 45 كيلوا رايح و45 كيلوا جاي ) وانا والله متخوف من ارتفاع الحرارة , رايكم بالحرارة في وقت الممشى والسفريات ؟ هل في حل نهائي للحرارة لو طلع لي مشكلة فيه ؟ وكيف القضاء عليه وانهاء مشكلة الحرارة ؟ لانها معقدتني وخايف منها ,
اول مااشتريه بمشي فيه 170 كيلوا سفر ان شاء الله ( وقالي لو تبي تسافر فيه ماعندك مشكلة لان الموتر مايحتاج شي وكل شي فيه مغير ) قالي لقيت لمبة السيارة الاماميه بريال تجاري بس يقول ركبت اصلي بـ5ريال
علمني عن عدة امور يبي لها اصلاح وقالي ماعليك مب ضروريه قلت كم تكلف كلها ؟ قال ماتتعدى الـ500 ريال , وقالي فيه شي عند الهيدروليك ( كور او حاجة زي كذا ) يقول تكلف تغييرها اصلي بـ700 ريال ,يقول انا قايل للمهندس يغيرها بس نسى وجيت اخذت الموتر ومشيت ( المهندس طبعا يعرفه )
الرجال ابن حلال وسوري وباين عليه الرجل اخلاق وفاهم وعاقل ماشاء الله وانا عجبني الموتر وقلت له ترا بشتريه منك لايروح مني , بالنسبة للهيدروليك قلت له كيف يخرب ؟ قال من كثر ماتنزل فيه وترفع فيه راح يخرب عليك , فقلت له انا ماراح استخدمه ,والشي الثاني ممشاي بالموتر 80 الى 100 فقط لاتزيد ولاتنقص وسواقتي راكده لارجه ولا شي .وقال فيه مثبت سرعه يقول مفصول قلت اقدر اشبكه ؟ قال ايه تقدر . ( ليش مفصول ياشباب ؟ هل ممكن يأثر على كهرباء السيارة ؟ قالي فيه تهريب في صوفة الزيت ,( كم يكلف اصلاحها ؟ )
سألته عن الامور الفنيه والكهربائيه والميكانيكيه قالي كل شي سليم ولايشتكي من شي ولك الفحص لو تبي ,قلت ابشر انا راح افحصه ,
لكن ياشباب حتى لو ظهر لي بعض المشاكل واصلاحها مايتعدى الـ1500 ريال الى 2000 ريال فأنا ماعندي اي مشكلة راح انفضه نفض حتى ارتاح ويرتاح ضميري
ابي رايكم بالحرارة ؟ كيف قطع الغيار ؟ كيف التعامل مع هالموتر ؟ وش نوع البنزين تبعه ؟ وش النوع الزيت تبعه ؟ وكل كم كيلوا اعبي الزيت ؟ هل كهربائيا وفنيا السيارة ممتازة ؟
الشي الثاني ناوي ارش الموتر من الداخل كامل بلون اسود عند ورشه ( زاهي الوان ) وناوي اركب ازياك للسيارة لاني اشوف بعضها متقشر شوي ,
ناوي اشيك على الموتر شهريا عند ورشه متخصصه او عند صالة البيان
تكفون يااخواني عطوني خبرتكم انا اول مرة اجرب هالموتر
صورة هالموتر نفس هذا اللون والشكل بالضبط ونفس الكفرات والجنوط ونفس وقفة الموتر لكن الداخليه لونها اخضر زيتي وجلد نظيف جدا ,
