نظام الهيدروليك لبورش كايين الجديد

اخوي
انا مع الكايين من موديل 2005 حتى 2011
بخصوص الهايدروليك
شف وانا اخوك
انا ماني راعي بر , لذا ما استفدت من الهايدروليك الا بحالتين
امطار الرياض استخدمت الهايدروليك مرة او مرتين
عند السفر وتحميل الحقائب والاغراض تنزل الهايدروليك لاقصي حد يساعدك على تحميل الاشياء الثقيلة , وهذه استخدمتها مرتين او ثلاث .
اما استخدام الهايدوليك اقصي سرعة تقدر ترفع السيارة او تنزلها هي سرعة 70

عموما : الكايين اس الجديد اصبح الهايدروليك استاندر مع السيارة ,, اما الكايين V6 تقدر تضيفه طلبية .

ودمت بخير

السلام عليكم
اذا كان حجم الجنوط اللي طلبتها كبير 20 او 21 يكون الهدروليك ضروري لانه يساعد على زيادة الراحة اما اذا الجنوط 19 و18 ماتفرق معك

وليش تفصله؟؟ ولا عشان تسوي الي ماقدرو عليه الالمان! عزيزي اذا السياره ما صممت على انها تمشي وهي نازله الى اقل مستوى فاكيد اذا سويت اي تغيير راح يسبب لك مشاكل واحتمال كبير ينلغي الضمان

الرابط ادناه يشرح لك الموضوع بالتفصيل

ياشباب لو تضيفون مقطع يوتيوب يوضح لنا اكثر

وعليكم السلام ورحمة الله وبركاته

شجعتني اضيف الهيدروليك ، عندي سؤوال هل اقدر انزل السياره وافصله بحيث امشي بأي سرعه ما يرتفع مثل الكزس والرنج ؟

السلام عليكم ورحمة الله

اخي الكريم اولا مبروك عليك السيارة مقدما

وبالنسبة للهيدروليك فله مزايا كثيرة ومنها زي ماتفضلو الاخوان ومنها امكانية رفع السياره وقت الامطار ، في البر وعند التغريز ، راحة و رساوه اكثر ، عند الحاجة لطلوع شي مرتفع (رصيف مثلا) ، تنزيل السيارة لتحميل شيء او ركوب شخص كبير في السن ، زيادة رساوة السياره عند نزول مستواها في على سرعات عاليه (وهذي في نظري مهمه جدا في السيارات الكبيرة) ومن اهم الميزات في الكايين بشكل خاص ثبات مستوى الراحة بشكل كبير في حال قررت تغير مقاس الجنوط ( حسب تجربة في موديل الشكل القديم)

وطبعا عيوبة بشكل عام ارتفاع تكلفة الصيانة والأهم كثرة الأعطال واخص هنا في السيارات الأوروبية خصوصا مع استثناء بعض السيارات مثل الكايين والطوارق الشكل القديم (تجربتي كانت في الموديلات القديمة)

وتعقيبا على موضوع فصل الهدروليك عند سرعة معينة حسب معلوماتي انه صحيح اغلب السيارات تعود لمستواها الطبيعي عن وصول السرعة الى الثلاثين تقريبا وهذا في نظري شي طبيعي جدا ، بس لتوضيح المعلومه مزايا الهيدروليك لا تتوقف عند سرعه معينه فكثير من السيارات ينزل مستواها عند وصول سرعه معينه مثل 120 لثبات اكثر و اعطيك مثال هنا في الكايين (القديم طبعا) كان الكايين العادي والأس ينزل عند سرعه 120 وا لتيربو ينزل عند 120 وينزل اكثر عند ال190

وااسف على الاطاله وبالتوفيق

استفدت كثيراً من هذا الرابط

شكراً ياصديقي.

http://www.porsche.com/microsite/technology/default.aspx?pool=uk&ShowSingleTechterm=PTPDCC&Category=CATFah&Model=&SearchedString=&SelectedVariant=
شوف الرابط راح يشرحلك الموضوع بالفيديو

الأعزاء : VIP 111 ، motasem cls ، وضح النقاء
استفدت كثيراً من مروركم شكراً لكم ..

اهلاً بـ SUPERCHARGED شكراً لتفاعلك

خاصية وجود زر لفصله جيده ولو كانت موجوده في البورش ستكون ميزة.
اما كيف يفصل مع ٣٠ قصدت اني لو نزلت السياره ووصلت السرعه لـ ٣٠ ترجع طبيعي


شكراً يا الكنق11 على اهتمامك والنصيحه الغاليه

اذا تبي تريح راسك من مشاكله في المستقبل لاتضيفه

ولو كنت بمكانك ماضفته ..!

وانت بالخيار :)

كيف يفصل بعد 30 ؟

اللي اعرفه بعد 120 كم

انا معي رينج روفر كذا بعد 120 السياره تنزل على المستوى الاخير والدركسون يثقل

حتى الكايين 2009 مع واحد من الشباب نفس الكلام بعد 120

والرينج روفر اذا رفعته الى اعلى مستوى وتعديت 70 كم يرجع للوضعه الطبيعي يعني يصير بالوسط واذا نزلته مره وتعديت 40 يرتفع للوسط

بس انا مقفل نظام الهيدروليك فيه عندي زر اضغط ويتقفل الهيدروليك يعني اذا تعديت الـ120 ماينزل

الهيدروليك حافظ عليه مارح يتعبك يعني انتبه للمطبات والحفر القويه وهو اريح من اليايات وافضل كاعمر على كلام الخبرا

.
.
.
هي ميزة لكن اغلب من جربها بالسيارات الاخرى يذمها

لذلك هي رفاهية اكثر ، وليست ضرورية مثل باقي المزايا التي تضيف للسيارة جمالا او تقنية

تحياتي

انا قرات هذا الخاصية فى موقع بورش
هي خاصي توفر راحة اكبر للركاب عند المنعطفات تقوم بعمل موازنة للمركبة مثال :
عند الانعطاف من ناحية اليسار سوف يكون ضغط على نظام التعليق فى هذه الناحية خاصية الهايدرولك تقوم بمواجهة الضغط ورفعها لتوفر راحة اكبر للركاب
بالاضافة زي ما ذكر vip تقوم برفع السيارة عن المياه او فى الطرق الوعرة
او انزالها فى السرعات العالية لتوفر انسيابية اكبر
فى النهاية انا اشوفها خاصية حلوة ومميزة وانصحك تضيفها
لكن ما ادري عن صيانتها
وان شاء الله اكون قدرت اوصل المعلومة
تحيااااااتي