( للنقاش ) هل صيانة السيارات الالمانية والاوروبية بهذا "الرعب" الذي يصوروه لنا !!

اتصلت على واحد بيبيع سيارته E300 وكان كل همي استفسر عن الصيانة

وانصدمت صراحة

هل من المعقول ان مرسيدس فئة E300 تكلف من 2000 إلى أكثر من 2500 كل 15ألف كيلو

الصراحة مبلغ باهظ حتى لو كانت الصيانة كل 15 الف كيلو


لكن سؤالي لو مثلا استخدمت الوكالة للتشييك فقط بدون مايغيرون زيت او اي شي

مجرد يبلغوني بالخرابات الموجودة بالسيارة

كم يكلف التشييك ؟ وكم يكلفني تغيير الزيت برا الوكالة

وشكرا

السلام عليكم ورحمة الله

اشكرك اخوي على موضوعك الجميل

باختصار بعد عدة تجارب للألماني (الفئة الفخمة) اقدر اقول ان مشكلة سمعة السيارات الاوربية في رأيي لها عنصرين :
الأول: ان الاسعار اغلى بكثير واشوف ان هذا غير صحيح بشكل عام فيما عدا بعض الالكترونيات.

الثاني: كثرة الأعطال وتكرر الأعطال نفسها وهذا في نظري هو سبب المشكلة وانا اتفق هنا 100%

وببساطة نستنتج هنا سبب الاعتقاد الاول انه مع الالماني احتمال كبير تخرب عليك اشياء متنوعة (ينتج عنها تكاليف عالية وتعب) ما تحدث لو معك ياباني (وهو المنافس الأول طبعا) الا بعد اضعاف الاستهلاك والمصيبة العظمى هو تكرر الأعطال نفسها!!
تحياتي

الموضوع كلام عار من الصحة
انا من عام 2003 وانا امتلك اوروبي رينو لاجونا 2003 رينو ميجان 2006 رينو ميجان سبور 2009 فولكس فاجن شيروكو 2011
اسعار قطع الرينو ايام الوكيل السابق في السعودية الزاهد كانت اغلى من النيسان و ارخص من الهوندا وكانت الصيانه الاساسية تكلف 2500 كل 80 الف كم اما الان مع الوكيل الجديد تم تخفيض جميع القطع 45% لدى افضلية الخليج
اما بالنسبة للشيروكو فمعها عرض صيانه مجانية 45 الف كم و الضمان الشامل لكل شي لمدة خمس سنوات دون اي تحديد للكيلومترات يعني راحة بال

الكاديلاك سيارة مظلومة بقوة

انا املك 3 كاديلاك

بروجهام 91

اس تي اس 2001

دي تي اس 2004

وماشفت منهم الا كل خير

وبالنسبة لصيانة الالماني تراها معقولة بالنسبة لكل 15 الف كيلو !!

والسيارة نفسها بكم قيمتها !!

هذي مشكلتنا اذا وااحد قاال السيارة هذي خراابات وهو مايعرفها ولا جربها خلاص تصير سمعتها بين النااس انها سيااارة سيئة و لاتستحق الاقتناء :a1120(121):

تشوووف الكادلك اللي في تووقيعي كااان مع الووالد واستلمتها انا بعده وترااها ماااشي اكثر من 600 الف كيلو (ماشاء الله تبارك الله)

والى الحين اشغل السيارة واسافر به على اي ديرة بدوون تردد (ابي اعرف سمعتها سيئة من اي نااحيه؟؟)

والله ياعزيزي خلنا نتكلم بصراحة الوكالة وش هدفها منك الربح وغير كذا كل مندوب مبيعات في الوكالة يشوفك من تدخل مع الباب فريسة عشان يرفع التارجت اللي هو الهدف اللي لازم يحققه كمبلغ شهري ومن وين يحققه من جيوب هالمساكين اللي كل ماقال له كلمة غير قال غير انت سو اللي تشوفه اهم شي ترجع سيارتي احسن من اول وانا شخصيا كنت في فترة احد ضحايا وكالة الناغي اللي ع طريق الخبر بسبب ان الورش اللي كانت تصلح بي ام في فترة جدا قليلة بعكس الوقت الحالي وفي ظل وجود الانترنت محد جاهل كبسه زر وتعرف على المشاكل المشابهه لمشكلة سيارتك سواء ع جوجل ويب او فيديو . الذمة في وكالاتنا وانا اخوك وسيعة ابعد عن الوكالة وانت بخير.

للأسف أكثر الناس تتكلّم عن صيانة وكالات وهي ما جرّبتها أصلاً !!
على سبيل المثال .. ساماكو
أنا أتعامل معهم من عشر سنوات .. وما شفت منهم الا كل خير وحسن تعامل الحمدلله ..
وقس عليها غيرها من الوكالات ..

وبعدين أسعار الصيانة تعتبر معقولة اذا أخذت بعين الاعتبار انها تخدمك 15 ألف كيلو

اشكر الاخوان اللي افادونا بالاسعار

لكن معنى هذا ان المرسيدس فئة سي ارخص في الصيانة من اللكزس IS , معقولة ؟؟؟

والله حالة .... الله يعين .... صار الالماني ارخص

الأخ YaseeR أشكرك على هذه الإفادة , و الله ييارك في سيارتك و ما يريك فيها مكروه.
لكن لو تشوف أسعار قطع المرسيدس صدقني أنك بتتفاجأ , غير كلام الأخ ملكي , روح شوف قطع الفياقرا مثلاً أو الفئة E الي هي من فئة سيارتك. و أنا كذلك مثلك لا أقلل من شأنها و جربت قيادة LS400 على سرعة 130 موديل 1995 استخدام نظيف و أعجبت براحتها و هدوئها (لكن القومة إنسى الموضوع).
لكن تبي الصراحة .. لكزس أُعطيت أكبر من حجمها عندنا , و السبب بالطبع هو أن وكيلها أبو جميل.

كل ماكبرت السياره وكبر محركها والتقنيات المستخدمه فيها صيانتها شي طبيعي بتكون عاليه عن غيرها

لكن الي يحدث عندنا بالوكالات هو الي يخلي الواحد ينحاش عن الالماني بالصيانه المبالغ في اجورها ودبل قطع الغيار وغيرها من الاشياء من تعطيل وانتظار وبعض الاحيان تصريف وتهرب !

حبيبي للتوضيح انا مااتكلم عن الجديد وكالة الجديد معروف 5 سنوات استخدمه ماعندك مشكلة لكن كلامي على المستخدم يعني بتدفع في موتر حدود من ١٠٠- ١٦٠ الف ريال تقريبا طبعا ع حسب نوع السيارة كلامي ونقاطي ١٣ كلها مقصود منها المستخدم فقط .

اتفق معك في كل النقاط اللي ذكرتها ماعدا هالنقطة

ليه اشتري سيارة بقيمة 250 ألف او اكثر واخر شي أنا اللي ادلعها مو هي اللي تدلعني

انا ما ادفع فلوس بهذي القيمة الا عشان استفيد منها واحللها

وقت الدوام دوام ووقت الكشخة والطلعاات غسلها وبتصير حق كشخه ورززة

وأنا من وجهة نظري مستحيل سيارة تكون قيمتها 100 ألف تتحمل أكثر من سيارة قيمتها 250 ألف

موضوعك :xyxthumbs::xyxwave: جميل ويطول الحديث فيه اخوي لكن بختصر لك الموضوع بنقاط :-

السيارة الالمانية سواء بي ام او مرسيدس لاجيت تشتريها لاتآخذ الموتر ماشي اكثر من 80 حاول قد ماتقدر حتى لو تضطر تسافر وتشتري السيارة من دول الخليج بس احرص على الممشى
ونظافة السيارة ومحافظة صاحبها على صيانتها وتغيير الزيوت وهالشي تكتشفه من خلال ملف السيارة بالوكالة ومراحل الصيانة طبعا توفيق رب العالمين والاستخارة اعظم استشارة انت ماتسأل الناس انت لحظتها تشاور الخالق المخلوق يبقى علمه محدود.
2 أمن السيارة في شركة تأمين التعاونية مثلا بمبلغ انت تقوله لهم مثلا 80 الف او 100 الف وممكن ساعتها تدفع حدود 4000 او 5000 انت الحين امنت موترك والضامن الله لو حصل حادث فيه شركة تغطيك وتعوضك بمبلغ يجيب لك موتر بديل لاقدر الله.
3 لاتكثر من استشارة الناس الغير مجربين واللي تعرف انه حنون على السيارة ويحافظ عليها اسأله وهو اللي بيعطيك الرأي الصح.
4 حافظ على تغيير القطع الاستهلاكية ( بريكات زيوت سيور ...الخ)
5 لاتتأخر في تعبئة البنزين عشان ماتجر عليك مشاكل ( طرمبة - بخاخات الخ)
6 الالماني موتر روقان خذه كسيارة ثانية يعني ماتصلح لدوام وكرف
7اعتني بالسيارة اقصد خلك هادي بسواقتك وحاول تهدي عند المطبات والحفر وتجنب الخروج بالسيارة في الامطار الغزيرة لان مثلك ماتجهل شوارعنا على طول تصير برك سباحة.
8 لاتتكلم عن سيارتك بكثرة وتدخل في مقارنات مع الشباب في المجالس بالعربي لاتخليها حديث المجلس ( الحسد الغير مقصود)
9 عامل لك ورشة او ورشتين تصلح عنهم سيارتك غير الوكالة ابعد عن الوكالة الا في حالة مشكلة اتعبتك وعجزت عنها الورش دخلها الوكالة كفحص كمبيوتر من الصدام للصدام منها تتطمن على موترك ومنها تكون تعرف المشكلة وش هي بالضبط ومن خلالها تحدد وين تقدر تصلحها.
10 اعرف عدد موزعين قطع الغيار بمنطقتك عشان قطع الغيار.
11 لاتسمح لأكثر من شخص غيرك بقيادة سيارتك لان الالماني يتعبه كثر تعدد السواقين اللي يسوقون السيارة سواء الالماني ولا اي سيارة.
12 لاتدعس وتطير بالسيارة بدون حاجة لانك بهالشكل تتعب السيارة ومع الوقت بتشوف الموتر قاعد يسحب لك خرابات انت في غنى عنها نرجع نقول موتر رفاهية وروقان.
13 لاتهمل اي مشكلة تواجهك في السيارة حتى لو بسيطة لانها مع الاهمال بتسحب عليك خرابات انت في غنى عنها يعني الخراب يسحب له خراب.
هاذي ابرز النقاط اتمنى لك التوفيق عزيزي . اخوك ناوي بانوراما. ولي مواضيع في المنتدى عن اسعار قطع غيار الالماني مرسيدس او بي ام في احد مواضيعي وبالتوفيق ياغالي.

ايش سالفة زيت الدركسون اللي كل شوي يتغير ؟؟؟

بارك الله فيك أخي مــلــكــي كذا بالإثباتات ما خليت لنا كلام. التكاليف جدًّا معقولة و مقدور عليها.
و بانتظار واحد يفيدنا عن صيانة لكزس :smilie16: نشوف مين الأرخص!! مع أني عارف من الحين لكن الأحسن بصور الفواتير علشان الناس تصدق.