السلام عليكم ورحمة الله وبركاته والله يمسيكم بالخير
اخواني شريت ابيكا من قبل 6 شهور وكانت تمام فحصت عليها كمبيوتر وسافرت عليها للشرقيه ودايم اطلع بها للخرج من الرياض ووصلت بها وادي الدواسر ما شكت السياره من شي لكن بعد رجوعي من الوادي وطلوعي للخرج بدت الحراره تطلع وتنزل خاصه بعد ما امشي بها 140 تقريبا (سرعة السياره) مسافه بعدها لازم اهدي من السرعه حتى اوصل 120 كيلو
سويت للاديتر تسييخ وطلع فيه مشكله تهريب زيت القير من المبرد لكن ما وثقت بكلام الهندي وتوكلت على الله مشيت من عنده امشي داخل الرياض ما ترتفع الحراره ابد تحت النص بخط مع المكيف ترتفع الى تحت النص بشوي اليوم رحت لورشه في جهاز كشف على حرارة السياره قالي المراوح عندك تمام والبلف تمام وطرمبة الماء تمام بس المشكله من راس المكينه وطلب علبة ترقيع التنسيم في راس المكينه تحط مع موية الرديتر شريتها 35 ريال وحطها وحسب كلامه السياره تبقى شغاله لمدة ساعه بعدها اطفيها واشوف المويه اذا ناقصه ازيدها ما كان فيه نقص فيها وطلعت مشوار للخرج اليوم صار فيه حراره وانا ماشي وكانت السرعه 140 اليت تعدت النص بعدها صرت امشي بين 120 الى 110 كيلو والحراره طبيعي تحت النص بشي بسيط في الرجعه للرياض من الخرج كان فيه فرق طبعا السرعه كانت مابين 120 الى 130 والوقت كان براد بعد العشا
للعلم يا اخواني المويه ما تفور ابدا من دبة الرديتر وما تتحرك في العلبه اعذروني ان كان كثرت في الوصف بس حتى ياخذ الاخوان تصور عن المشكله ومن الحوسه اللي انا فيها خاصه انها مصدر رزق والسياره مرتاح معها