== آه يالمرور ==

عازف الطبلون @user_208432 · 14-06-2010

.. بسم الله الرحمن الرحيم ..
هلا لرجل المرور الي في التفتيش الاحقيه في ..
النظر الي النور الامامي والطلب منك ان تضيء العالي والواطي
؟؟؟؟؟
لأن هناك عسكري طلب مني هذا وسألته ليه اضيئه يقول ولع وبس ؟؟
يعني بقوة أخذ مخالفه
بس الصدمه بعد ماولعت النور العالي والواطي طلع مافيه زونن:smilie16:
ورجع وقالي ليه سيارتك مطيحه (( منزله ))
قلت هي من وكالتها قالي لا :c0038:
أنا أرتفع :a120(115): ضغطي وقلت جيب مهندس او بنقالي من شركة مستوبيشي وأسلئه
لما شافني ارتفع ضغطي رجع لي الرخصة والأستماره وقالي بكل ابسامه تفضل :xyxwave:
يعني ايش المخالفة بالقوه وهلا له الاحقيه في انه يقولي ولع النور ؟؟؟
:confused1::confused1::confused1::confused1::confused1:
وهذي اول مره تصير معي على اني كم وكم مره سافرت

samaction @user_22068 · 08-09-2010

الحقيقه هيئة الشخص لها دور كبير

N أبورغد N @user_188471 RiYaDh 4X4 GrOuP · 08-09-2010

ذكرتني ببوليس سري مسكني وانا ما اخطيت الا اني ماربطت الحزام
طبعا لو يحب الارض ما انزل جا وفتحت له الاشاره وهو متوقع بيحصل بزر المهم
انا ماني رايق وهو يقول السلام رديت له السلام وجلس يبي يتفلسف
قال انا ماني قايلق وش خطاك انا ابيك انت تقول قلت بصوت عالي شوي نعم
قال انت عندك خطائين الاول ماربطت الحزام و الثاني مسرع
قلت اذا على الحزام معك اما مسرع اسمحلي
من فشلته قعد يقص لي اهمية الحزام وانه كان سبب نجاة الكثير ومن هالحكي
وخلاني امشي
بصراحه كان محترم لكن والله انا ماكنت رايك له ويمكن لوني رايك كان صكني بقسيمه
===================
والثاني انا مستعجر عندي موعد مهم جدا فيها 12000 ريال ولازم ما اتاخر
المهم قدامي موتر يمشي 60 والسرعه القانونيه 120 كبستله الين اذنت ما وخر نطلته يمين ودعست ولا هو وراي
المهم قال وش عندك مسرع قلت مستعجل وليه ما وقفت الي معطل الخط قدامي قال لوك صبرت كان وقفته قال عطني عذر واخليك
قلت وش تبيني اكذب عليك عندي شغر فيه دراهم
قال بحجز الموتر قلت احجزه انا بروح قال لا لاتروح قلت انا ماني فاضيلك وادق على خويي بالحاره وبسرعه جاء ولبق وقلت خذ المفتاح قال اقولك ماتروح قلت بكيفك
قال خلاص خذ القسيمه وخذ موترك وعطاني قسيمه مناوره على سرعه عاليه وانا ماتعديت 90

عازف الطبلون @user_208432 صاحب الموضوع · 02-09-2010

هي بنسبة للنادي عن قريب بس خل الاجازه تخلص

أبو محيوي @user_229641 · 02-09-2010

ههههههه الله لا يوفقه

و الله لي سالفه كنت طالع مع أخوياي و طربانيييييييييين مفجرييين أم المسجل المهم شوي ويوقفنا ربع المهم نزل خويي الي يسوق و نزلوا الباقين أنا قعدت ما دريت إلا شوي و جاني خويي يقولي أنزل المهم و الله و أنا أخوكم مالي لا واسطه ولا يحزنون ..... نزلت ولا الشباب راكبين بالجيب أنا قعدت أضحك و بصوت عالي و العسكري ما كان يشوفني... هو سمعني بس ما شافني ......شوي إلا يوم قالي كل زق و أنكتم عاد أنا طرطعععععععت......وو ما أدري يعني أنا شكلي يخوف ولا شي الله أعلم ..... المهم شافني و بلع العافيه ( الله يخلي النادي :tongue: )
عادي جا أبو الشباب و يكلمني بأحترام .....قلت وش عنده أبو الشباب .....قبل شوي كل زق ....و الحين كيف حالك أخوي ...هههههههه المهم جاني بالع العافيه..... بعدين قلت له ليش مركبهم قال بكيفي أنا حر ......قمت قلت له الحين إذا وديتهم للقسم وش بتقول كانوا مشغلين الأغاني .... الظابط بيتفل بوجهك ....قام يضحك و قال ترا هذي إهانه للبدله الي أنا لابسها ....
المهم قعد شوي إلا يوم نزلهم إلا ولد أخوي خلاه راكب جيت و قلت له أبو الشباب باقي واحد ...قال لا هذا أبوديه للحجز .....قمت فتحت الباب الي ورا و طلعت ولد أخوي و جاني العسكري ماشي مليون قالي .....خيير..... قلت له ركبني أنا ... قالي لا أنت ملسون و بتودينا في داهيه قال أنا بعطيكم مخالفه بس و بمشيها لكم ههههههه سلمات أبو الشباب ... قلت له لا مخالفه ولا يحزنون و رحت للسياره و نزلت خويي الي يسوق و سقت أنا عاد أبو العيال مركب دبه و أكتم لأم أم المووووووتر.... و يطالع فيني العسكري و يهز رااسه .....

شوفوا أنا ما أخفي عليكم بسراحه يوم نزلت ولد أخوي بغيت أسويها على نفسي ......

بس أنت خلك شديد و لا تعطيهم مجااااال أنهم يلفقون لك بأي شي ووووو خش نادي
:tongue:
هههههههههههههه الله لا يوفقكم مروووور حسبي الله و نعم الوكيل

عازف الطبلون @user_208432 صاحب الموضوع · 15-06-2010

يعني إذا عطاك مخالفه بتزيد في راتبه راتبه هوه هوه

N-xterra

أشكرك على المرور والرد الرائع ولا تحرمنا من توجدك
والله يعين على الدنيا

N-xterra @user_112018 · 15-06-2010

ههههههه

وسع صدرك يارجال ، سالفتك هينة

إسمع سالفتي أنا

في يوم من الأيام الغبراء كنت مسافرا من الرياض الى القصيم ، وكان مؤشر طبلون 560 يؤشر على ال 220 وحواليها ... مجلعد يعني

المهم قدر الله علي و وصلت نقطة تفتيش أم سدرة ، وكنت مهدي 120 قبلها ب 5 كيلوا لأني خابرها أكثرية العسكر فيها في شفت آخر الليل يكون الجو عندهم غائم جزئيا (يعني فوق هام السحب)

الوارد كان قدامي فورد وقف في النقطة وأنا خلفة مباشرة يعني وقف هو وبالتالي وقفت أنا ، تحرك صاحب الفور وبالتالي تحركت أنا ، ولم يكن هناك عسكري واقف

مشينا وقلت اللهم لك الحمد افتكيت منهم ، والغلطة اني يوم مشيت من النقطة ما صفطت ال 220 لأ صرت أمشي 130 ، شوي والله لا يبتلي المسلمين إلا و دورية أمن الطرق ملحم فيني صدام بصدام ومولع السفتي والوضع قمة في الخطورة ، أنا قلت بس ، شكل سيارتي فيها متفجرااات أو مولعه نار من ورى ، الوارد اني انخرعت و وقفت على جانب الطريق

طالعت في المراية الدورية اللي كانت خلفي ، ولا حظت العسكري وخويه فاتحين أبواب الدورية ومطلعين أسلحتهم علي ويطلبون مني النزول من السيارة ، أنا انخرعت ونزلت ولما نزلت كانت محفظتي بإيدي ، وكنت رافع ايديني فوق ( قسم بالله قمة المهانة للمواطن الحر) شوي والحنس على وشك ينفظني بالكلاش يحسب اللي في يدي مسدس!!! نزل اللي في يدك ،،، نزل اللي في يدك !!!

أنا رميت البوك بالأرض والنية طيبة كنت أبطلع اثباتي ورخصتي أعطيهم اياها بس للأسف اخويانا طلعوا خارج التغطية على بالهم في شيكاغواا

كلبشوني وحطوني في الدورية وساق واحد منهم سيارتي وأخذوني لنقطة أم سدرة ، ولما وصلنا دخلوني في المكتب وقفلوا علي وبدأو بتفتيش سيارتي ،،، (إثباتي ما أخذوه حتى الآن عشان يتحققون من اسمي على الأقل) ما حصلوا شي في السيارة (استمر التفتيش أكثر من 45 دقيقة) جاني واحد منهم وقال لي:

ألحينه وليه يوم انك تتعدى النقطه وانت تمشي ميه وستين ؟

قلت: الكلام هذا غير صحيح.

قال: تكذبني يعني؟

قلت نعم أكذبك وعيب عليك تتبلى خلق الله.

قال: لأ أنت متعدي النطقة مسرع واجد وشكلك كذا حالة غير مسقرررة. وركزولي على كلمة حالة غير مستقرة!!!

وألحق: أنا أقدر ألحينه أكتب في التقرير انك متعدي النقطة واننا مسكناك في حالة غير مستقره!! وقالها لي وهو قريب مني وتفوح منه رائحة الحشيش والصواريخ!!!

قلت: مو على كيفك تلفق لي تهمة سايبة هي

المهم طال النقاش وكثرة المسبات وقاطعت كلامة أنا بسؤال لعسكري ثاني وقلت له بالله أنت شفت سيارتي عدت من قدام النقطة هل أنا وقفت ولا لأ ، قال والله ما ادري بس يمكن انك تمشي حول الثمانين

قلت يعني رجل الأمن الموقر هذا طلع كذاب .... صح

قال لي الأول: أنا ما قلت لك إنك حالة غير مسقره!!!

قلت طيب أنا أبغى أروح أنت وش تبي هالحين؟

قال:
ما تمشي إلا بمخالفة!!!

قلت: ألحين أنت وقفتني عشان اني متعدي النقطة وأنا أمشي 160 وطلعت أنت كذاب بشهادة اخوياك وألحين عندك لي مخالفة ثانية!!!

يا أخي هاذي رخصتي ( وطلعتها قدامهم كلهم وقلت ياخي سجل لي مخالفة عدم حمل رخصة) بس خلني أمشي ...... تخيلو سجلها لي عدم حمل رخصة ..... شوفو مستوى الوقاحة والدنائة !!!

بعدها رمى علي مفاتيح سيارتي وقال لي روووح لهلك

لقطت المفاتيح من الأرض وحطيتها بجيبي واستغربت وزنها أخف من العادة ، سكت وركبت موتري حصلت مفاتيحة عليه ، طلعت المفاتيح اللي هو رماها علي - طالعت فيها مفاتيح غرفتهم ومفتاح الجيب الحوض اللي عليه الرشاش ال 50 !!!!

قعدت شوي أشاور نفسي وأقيم الموقف وقلت والله لا أرد الصاع صاعين !!!

دقيت سلف و عداد ال المرسدس مانزل عن 260 - لأني كنت خايف يعمم عني ، عقبها عاد ممكن يحطني إرهابي ، وبنفس الوقت اتصلت على واحد من الشباب أعطاني رقم مركز قيادة أمن الطرق في القصيم ورقم سكرتير مدير عام أمن الطرق (الجمل) ودقيت عليه وقلت له الموضوع كذا كذا كذا....

قال لي أنت تعال للمركز وأنا راح أقابلك هناك ، وصلت وقصصت عليه السالفة واعطيته المفتااااح للتأكيد
سألني عن اسم العسكري قلت له الرجال شايل شارة الإسم!!

قال خير أنت توكل على الله وأنا ابتصرف ، وطلعت من عنده ماشفت شي

ذكر لي الشخص اللي ساعدني في الرقم لاحقا انه اتوقف 3 أيام ونقلوه لوادي الدواسر!!! والله أعلم

...............
...............
..............

أنا أفضل التعامل مع الظابط أكثر من العسكري للأسباب التالية:

1- الظابط غالبا يتكلم معك بإحترام بينما العسكري أسلوبه غالبا وقح وأكثر الحالات لا يرد عليك أصلا
2- الظابط متعلم ويتفهم عليك لما تتفاهم معاه وهو في الأصل متخذ القرار وغالبا يقول لك عندك ملاحظة كذا كذا ياليت تسوي كذا كذا يعني أسلوب التوعية ، أما العسكري ممكن يرتكب مخالفة أصلا وهو في طرقة الى توقيفك فما بالك بالمعلومات القيمة والتوعية اللي راح يفيدك فيها
3- الظابط مستحيل يكون خارج التغطية (مرتفع يعني) خلال فترة الدوام عكس العسكري ياحبه تحت اللسان ولا صاروخ قبل الدوام!!

تحياتي للجميع