في البداية اخواني كان عندي كامري 2007 وجلست معي سنه وشهرين بعدين بعتها واشتريت ماركيز 2007 بس تعرفون ربعنا سنة الصنع 2006 شهر 12 سجلوه 2006
ماعلينا انا راح اعطيكم رأي بكل صراحة:
اولا الفورد:
- هيكل قوي وثقيل مره بالخط بعكس الكامري تحس انها مره خفيفة ولمن اراد التاكد يشوف الفاصل بين الصاجتين في الرفرف الامامي للفورد ويشوف في الكامري حيث سوف تتفاجأ بالفلين المحشو.
- مقاعد وسيعه وجلد بعكس الكامري مخمل.
- المقاعد متحركه في الفل كامل بعكس الكامري مرتبة السائق متحركه فقط.
- مقاعد الفورد مريحة للخطوط الطويلة بعكس الكامري(ساعات اوصل من السفر ولو واحد يقول امسك خط معه ماعندي مشكله بعكس ايام الكامري اوصل بعد 5 ساعات مكسر ومالي خلق).
- نظام مانع الانزلاق والتحكم في الفورد افضل منه في الكامري.
- قوة الماكينة والقير وخصوصا في موديلات 2005 وانت طالع بينما الكامري ضعيفه ويكفيك تسمع صوت الماكينه عند الضغط بكامل القوة على دواسة البنزين لزيادة سرعة السيارة.
- دفع خلفي وهذي افضل ميزه للفورد بعكس الكامري دفع امامي .
- ارتفاعها عن الارض بعكس الكامري والتي كانت منخفضة بشكل مبالغ فيه ومن لديه الكامري يعرف مااذا اعني حيث لو تفاجات بمطب فقل على الماكينة والمساعدات السلام(انا مغير المساعدادت الخلفيه 3 مرات خلال 9 شهور)
- وجود سخانات مراتب في الفل كامل والتحكم بالمكيف والمسجل من الدركسون في الفورد بعكس الكامري والتي تفتقد للسخانات والتحكم بالمكيف.
- ازرار مكيف الهواء لمس بعكس الكامري مفتاح برم.
- تبريد المكيف اقوى بمراحل من تبريد مكيف الكامري(وهذا السبب حطمني تحطيم بشكل غير طبيعي)
- زر الامان ولونه احمر وهو موجود في الشنطة ويمنع اشتعال السيارة ويقوم بفصل الكهرباء .
- نظام الثبات المطور ( رسمته سيارة وبها اثار تفحيط الكفر) وهذا جاء في الماركيز من 2005 .
ثانيا :الكامري
- اقتصاديه في استهلاك البنزين بعكس الفورد .
- عدم دخول صوت الهواء عند ازدياد السرعه بعكس الفورد تسمع صوت الهواء وانت ماشي 60كم.
- التطور في التصميم الداخلي والهيكل الخارجي بعكس الفورد الذي استمر على هيكله منذ عام 1991م وحتى 2010.
- قوة انوار السيارة نتيجة التصميم الرائع للانوار حيث تعطيك رؤية افضل ومساحة اوسع بعكس الفورد انواره مثل انوار السيكل.
- المسجل متعدد النسق ( ام بي ثري , سي دي , صيغة الوندوز)وقوة التقاط الاشارة للراديو بعكس الفورد سوء التقاط الاشارة ونسق المسجل اوديو سي دي فقط.
- توزيع الهواء متعدد الاختيارات من الوجه , الوجه والاقدام ,..الخ بعكس الفورد.
- تصميم القير جاء ارضي للتماتيك لعكس الفورد علاقي.
- تصميم تكايت اليد وتعدد الادراج بعكس الفورد درج واحد فقط للشاي.
- المكيف الخلفي وهذه قد تكون متوافره في الفورد السعودي ولكن الامريكي لايوجد به.
- عدو وجود الهيدروليك حيث اثبت الهيدروليك خراباته وعدم جدواه بعكس بعض موديلات الفورد.
- بامكان الراكب في الخلف فتحة التكاية الخلفية والوصول الى شنطة السيارة دون الحاجه الى الايقاف لاخذ غرض منها.
- سهولة استخدام مثبت السرعة وراحته لليد وعدم لفت انتباه السائق برؤيته بعكس الفورد.
- المساحه بين المقعد الخلفي والمقعد الامامي افضل منه الفورد ( وهذا حطمني مره في الفورد )
- رخص قطع الغيار الاصليه بعكس قطع غيار الفورد الاصليه (مقارنه الاصطب الخلفي للكامري وكاله ب270 ريال بينما للفورد وكاله ب640 ريال )
هذا مالدي ومن له راي اخر فليضفه
