اصبحنا واصبح الملك لله
اليوم جمعة .. والهمة الهمة يا شباب على التبكير لصلاة الجمعة..
ويوم مبروك ..وعسى من بركته ان استفيد من مشورتكم
انا ما اشتكي ي اخواني..لان الشكوى لله عزوجل فقط..ولكن ابغي مشورتكم ورايكم ..لان اللي ما ياخذ برايكم يضيع
قامت والا قعدت هالوكالة وخواتها نصب وفحش بالغلاء
ومستغلين وكاسرين ظهور هالناس..عسى ربي يكسر ظهروهم
ويخسف بهم مثل ما خسفوا خلق الله بالديون والاقساط
باختصـار
انا سيارتي لكزس ES 300 موديـل 99
كامري شيوخ
لما ادعـس على الفرامـل ..تكون الدعسة قوية وجامـدة ..غيرت الفحمات ...واشتريتها وكالة من عندهم بسعر 230 ريال..وبصراحة انا اقول انه سعر طيب وجزاه الله خير.
لكن المشكلة ما راحت..
رحت لـ فلبيني متمرس بالمهنة..قالي ان هذي " باكم " او " فاكم " اللي هي يا شباب الاسطوانة الدائرية تحت الكبوت وتكون خاصة بضغط الهواء ..وهذي صورة الباكم في احد السيارات :
بكم السـعر ؟؟
بـ 1784 ريـــــال ...!!!!!:a1120(82)::mad1::a1120(82):
وتجـي طلبية بعد يوميـن كمان ..!!!!!:confused1:
يا عمي انا راكب كامري مفخمة ...مو بي ام والا الماني ...:a120(115):
سيارتي قطعها وكالـة .. ولذلك ولله الحمد ..زي الوردة..نظيفة وماشاء الله عليها..
وموظف بنك وراتبي عالي..وما علي اي قروض..ولله الحمد..
واقدر اشتري اي سيارة ثانيـة زي السلام عليكم ..لكن مانيب بـ خبل او اهبـل ارمي نفسـي بـ دين عشان فلان وعلان يشوفوني راكب سيارة قرطاس وقيمتها الشيء الفلاني..
ولو اي وكيل يكون عقلاني وعادل في اسعار السيارات وياخذ الربح المعقول..ثاني يوم ااشتري السيارة منه ..لكن ينصب علي بالبيعة عيني عينك..يخسى ويعقب ..
والسبب الثاني..
اني اكره هالوكلاء كلهم اللي فيهم الغش والنصب والاسعار الخرافية وما هم راحمين خلق الله ومقاطعهم بأي وسيلة ..ولا اتعامل معاهم الا اني اشتري قطع غيار استهلاكية عشان سيارتي..
ولو كل الشعب سووا مثلـي .. ما كان تلقى الوكيل يبهذل المواطن ويذله ..لكن يستاهل المواطن اللي مو همه الا سيارة اخر موديـل حتى لو كانت بالدين على حساب معيشته ومعيشة عياله..
اشتريت القطعة..وقلت يا ابوالشباب..ما دام شريتها وبالثمن الفلاني..شوف بكم التركيب عند الوكيـل..اذا سعره قريب من تركيب الفلبيني ..بركبها بالوكالة ..اما اذا غالي...بروح للفلبيني يركبها لي...
دخلت قسم صيانة لكزس ..
وسألت ذاك السعودي..والشهادة لله عزوجل...مؤدب ومحترم..وباين انه نصوح..لاني سألته عن كم مشكلة بالسيارة..فكان يسألني عن الحاجات الصغيرة الى الاكبر..وهذا دليل على نصحه وامانته..
ومن ضمن الاسئلة..هل القطعة اللي شريتها بها ABS ..قلت مدري ..
قالي السعودي :
سوي لها فحص كمبيوتر بالوكالـة بـ 360 ريـال...وجيب القطعة معاك..
ويطلع فيها تقريـر ..ونجلس انا وانت عليه..ونشوف المشاكل والصيانة والقطع وما الى ذلك.
هنا انتهى الحديث..
الان يالربـع
ـ تنصحوني اروح اسوي فحص كمبيوتر عند الوكيل ام لا؟ لانه اذا فيه ورشة تسوي نفس الفحص وبسعر اقل ولو بريـال واحد من الوكيـل..دلوني عليها ..بروح للورشة ولا بروح للوكيـل.
ـ تنصحوني بورشة معينة باللكزس في شرق الرياض او وسطها ؟؟
وادعوا لنــــــــا
ترى في انتظاراول مولود هاليوميـن
والسلام يا حبايــــــــــــب:wavey:
