عُرض علي كابرس اس اس للبدل مع سيارتي الازيرا , فما رأيكم

السلام عليكم ورحمة الله وبركاته

واحد من الشباب معه كابرس اس اس واعجبته الازيرا حقتي وعرض علي البدل راس براس

طبعاً هو تملل من الكابرس على حد كلامه بسبب انخفاضه المبالغ وقساوة مطبه وانه مزعج


معلومات عن الكابرس


- الموديل: 2006
- اللون: فضي
- الفئه: اس اس فل اوبشن
- العداد: 50 الف نظيف ماشاءالله وراعيه يداوم بباص الشركه ولا يستخدمه كثير
- حالة السياره: ممتازه ولا تحتاج شي
- حالة البدي: سمكره خفيفه للرفرف الخلفي + الباب الخلفي + الجنب الايمن مصبوغ بالكامل بعد السمكره وايضاً الصدام والكبوت مصبوغين بسبب ترميل الوجهيه, الشغل بشكل عام جيد جداً وماجاها حادث قوي بس طقه خفيفه بحجم كف اليد في الباب والرفرف وانا شايفها بنفسي وكنت انصحه انه يخليها.


معلومات عن الازيرا

- الموديل: 2007
- اللون: بنفسجي غامق ( قريب للأسود اذا ماتعرفونه )
- الفئه: 3.3 فل اوبشن بدون شاشه
- العداد: 90 الف
- حالة السياره: ممتازه ولا تحتاج شي
- حالة البدي: ممتاز وماشاءالله لمعتها كأنها جديده, صار لي حادث قبل فتره وتضرر الباب الايمن والرفرف الامامي والجنط. الشغل ولا اروع منه ما كأن جاها شي اذكر بعد ماصبغت قابلت واحد من الشباب ( شريطي صغير ) وقلت له السياره جايها حادث ومسمكره وابيك تطلع لي مكان الصدمه مو قضية تحدي بس ابي اتأكد من الشغل وجلس يحفر عليها ويطقطق منا ومناك وماهو صايد شي اخر شي قال احلف انها مسمكره وبعد ما حلفت له قعد يدقق بالسياره شبر شبر وصاد مكان الحادث عن طريق نقطه بسيطه باللكر والحين عدلتها بالتلميع, مالكم بالطويله الملخص ان الشغل محبوك.


المهم وش رايكم انتم ابدل ولا لا

الازيرا انا مليت منها الصراحه. بعض الناس تصير له عشره مع سيارته ويعزها وماهو من النوع اللي يغير سيارات الا اذا واجه مشاكل منها او صارت قديمه وانا كنت كذا ايام السوناتا وانا اشهد انها تعز علي بس الازيرا لا. تغير وضعي وصرت ما اهتم بالسيارات صراحه والازيرا من اخذتها وانا متوطي في بطنها , كثرة مشاويري وداومي البعيد هي السبب تقريبا

اللي ابي اقوله ان الازيرا ما ظنتي بتطول معي شكلي ببيعها, ودي بسياره عزمها قوي

انا مخطط على اوريون ولكن حالتي حاله, صعبه علي اني ادبر قيمتها في الفتره الحاليه الا اني اضغط على نفسي كثير + الضغوط الماليه اللي اعاني منها حالياً وانا افكر بالقراندي ومستحيل اخذ التورينق

الاشكاليه الوحيده لدي مع الكابرس هي اني متخوف منه ( مشاويري كثيره + ما اهتم بالسياره )

انتم وش رايكم والمجال لكم الآن