كل من يملك معلومة لا يبخل علينا (حرارة السيارة)

يعطيكم ألف عافية جميعا ببدأ ارتب نفسي للبدأ في الحلول خطوة بخطوة

وبكتب ما يستجد معي




جزاكم الله خير

اضافة لما تفضل به الاخوه ,
1- والله اعلم يوجد هواء داخل دورة المياه بالسياره , هل تسمع لصوت خرير
وصوت جريان الماء داخل لوحة عدادات السياره عند الضغط على دواسة البنزين ؟؟
اذا نعم فلربما يوجد هواء واخراجه سهل ان شاء الله .
2- حاول تفصل خراطيم المياه الداخله والخارجه من والى
وحدة رادياتور التدفئه الموجوده داخل لوحة العدادات بالسياره .
3- افحص دبة الرصاص ودبة التلوث بالعادم , لربما فيهن تسكير ويسببن
زيادة الحراره بالسياره .
4- حاول تبديل غطاء رادياتور الماء بالتنسيق مع الوكاله
ليعطوك قوة ضغط تكون مناسبه للمشكله .
5- افحص حساس الحراره ان فعلا يعمل عند درجة الحراره المطلوبه
وباستمرار ,
6- افحص اذا فعلا حساس الحراره هو فعلا المناسب .
7- افحص البواجي وهل هي سليمه , وافحص باقي التوصيلات الكهربائيه
التابعه للاشعال وكذلك حساس الحراره وكذلك المراوح لربما يوج تماس كهربائي .
والله اعلم و, وبالتوفيق ان شاء الله

مرحبتين اخوي

اضافة إلى ماقاله اخوي الهكرجي

شيك على طرمبة الماي لها دور كبير في تدوير الماي ويمكن تكون ماتضخ بشكل جيد عشان كيذا ترتفع الحرارة


تحياتي ،،،

ودي أنزل موضوع كامل متكامل عن الحرارة لكن ما لقيت وقت
وإن شاء الله أحاول في القريب العاجل

تحياتي لكل الناس

بالنسبة للبلف ممكن تفحصه بطريقة بسيطه

أنا ما أدري كيف شكل الرديتر حق اللومينا لكن لو كان فيه غطاء في الرديتر تقدر تفك الغطاء والسيارة مطفيه وبارده ثم تشغل السياره وتشوف جريان الماء إذا كان واقف طول الوقت إلين ترتفع الحرارة هذا خربان لكن قبل ما ترتفع إتحركت الماء فما فيه شي (تقدر تشوف عند كم بدأ الماء بالجريان) النص الربع أقل أكثر يعني

وإذا ما فيه غطاء في الرديتر تقدر تفحص من خلال مسك الخركوش الراجع من الماكينه (متى يسخن أو ما يسخن إلا إذا إرتفعت الحرارة)

تحياتي

بالنسبة للتشخيص الأدق ما ينفع هنا
لأني أنا جالس تحت المكيف وإنت قدام الكمبيوتر والسيارة واقفة برا يعني كل واحد في ديره
لكن نحاول بكل الوسائل للوصول للحل


تحياتي

الله يعطيكم العافية جميعا على الردود



نجي للهكرجي والله اني ضحكت مع اني طفشاااان




والله ما عندها اي احترام


ياخي تخيل انها ترتفع مرررة لين اُجبر اني امشي بسرعة 20 وتكون ما تزال مرتفعة لين ارجع للبيت واطفي السيارة




وانا بصراااحة احس ان السالفة كلها من البلف بس احتاج تشخيص ادق عشان اتوكل على الله



انتظر المزيد من التفاعل يا شباب

سؤال

إذا مسكت خط كيف إسلوب الحرارة معك (محترمة أو رافعة راسها)

ما دام الشغله شغلة حرارة ما لها غير الهكرجي:a120(8):

شوف وركز
أولا/
1- من الطبيعي تحس إن الخرطوش يبي ينفجر لأن الحرارة مرتفعه
2- لكن المشكله إذا كان الخرطوش يبي ينفجر والحرارة عادية
فأي الخيارين يمشي مع سيارتك

ثانيا/
بالنسبه للماء
خلنا من أصلي وغير أصلي
الماء يتبخر عند 100 درجة مئوية تقريبا يعني (ركز) إذا إرتفعت الحرارة فوق النص تقريبا (100درجة) يبدأ الماء بالتبخر والضغط على الرديتر والخراطيش ويأتي دور الغطاء هنا بتخفيف الضغط

إذا فهمت النقطة السابقة إستمر

فيأتي هنا دور الماء الأصلي (يستحمل درجة غليان أكبر) وما يصير فيه ضغط
لكن لو ما وصلت لدرجة غليان الماء فإن الوضع طبيعي مع الماء الأصلي والعادي

ملاحظة/ واحد من الشباب أعرفه كان عنده فورد 2002 وضغط الخراطيش عالي جدا جدا لدرجة إن الخرطوش صار مثل الماصورة بس الحرارة ثابته لكن بصراحة غير الماء إلى أصلي حق فورد الذهبي وراح الضغط

ثالثا/
عند دخول الهواء في الرديتر أو دورة التبريد فإن الدورة تتوقف وهذا دليل على إرتفاع الحرارة أحيانا وأحيانا لا
فعند توقف الدورة ترتفع الحرارة وعند دورانها لا ترتفع

ملاحظة مهمه/ إنت تقول إن الحرارة ترتفع إل قبل الإتش بخط ثم تنخفض صح؟
إلى وين تنخفض؟
من الملاحظه السابقة نستنتج نحن الهكرجي ...... مصدق نفسي:a120(8):
ما يلي/
إن المشكله من البلف أو الغطاء
لأن الضغط يوصل لأعلى درجاته وغصب عن أم البلف يفتح إذا كان خربان أو غصب عن أبو الغطاء ينسم ويخفف الضغط فتنزل الحرارة

وآسف على التأخير
تحياتي

خوي انت بدل الماء وشيك عليه

ما بتخسر شي

يعني منها تنظيف وانت متأكد من ان ما بيكون سبب منه

وبعدين تبدي بالاشياء الصغيرة احسن

تحياتي،،،

اخوي hathoof

شاكر لك مرورك العطر وافادتك القيمة

بس تأكد ان سويت هالطريقة واسويها بأستمرار

اخوي mutasm

السؤال هنا : هل من المعقول ان تكون مشاكل الرديتر وارتفاع وانخفاض الحرارة بسبب الماء..



على العموم بعمل بهذا الحل لكن اذا تأكدت ان المشكلة تكمن في الماء


ومشكور مرة ثانية

الله يهديك ,, الموية أم عشرة عبارة عن منظف للريديتر وليس موية ,,
وكثير اشتكوا منها لأنها ساعة ترفع حرارة المحرك وساعة تكون عادية,,
نصيحة فضي القربة من الموية الموجودة الآن ,, بعدين اترك الصرة مفتوحة
وعبي موية مفلترة من القربة وخلها تنزل كلها من الصرة عشان تنظف المجرى,,
بعدين استعمل castrol أو caltex ما فيه أحلى منهم ,, واذا كنت في الرياض
عندك محل رد كاب مسوي عرض على صيانة الريديتر ,,

اخوي بسألك سؤال

جربت انك تفتح الريديتر قبل لا تشتغل السيارة وشغلها

وشوف الماء يتدفق بشكل زين ولا لا؟

اذا في نقص في الماء عبيه وانتظر واذا نقص رد عبيه إلين ما تحس انه خلاص شبع

وخبرنا ايش يصير معاك

تحياتي،،،،

اشكرك اخوي mutasm على المتابعة

وانا بصراحة مالي الا الموية ام 10 ريال

على العموم معدل الماء في القربة فوق النصف تقريبا

واذكر معبيها من ثلاث اسابيع

أهم شي ماتكون الموية اللي في البناشر أبو عشرة ريال لأنها تعبانة ,,
روح للوكالة وشيك على الخرطوم بين الريديتر والمكينة وخلهم يشوفونه
إذا كان سليم أو في تهريب ,,
الموية اللي الآن في القربة متى عبيتها ووش نوعها؟

موية الرديتر ماء اخضر

طبعا ملاحظ ان الرديتر من الفتحة كأنه فاضي

بس القربة مليانة ماء والمعيار يثبت هالشيء