السلام عليكم ورحمة الله وبركاته
ياهلا والله ومسهلا فيك اخوي العزيز ماجد الحجي
انا من ملاك جيب توسان من هيونداي 2006 ومكينه ديزل2.0
ماشي لحد الان 40000كيلو وشريته بقيمة 53000ريال سعودي اقل فئه!!
طبعا مواصفاته اساسيه!!
زجاج كهرب -قير اوتو تبترونيك((عادي+تماتيك))-انوار ضباب -مرايا كهربائيه-جنط16 كروم-دبل كهربائي.
طبعا السياره ما شفت فيها اي مشاكل ولله الحمد مع ان استخدامي عنيف بشكل كبير واغلب ممشااه في رمال وبر.
سياره صبووره وقويه وهي ديزل اجل كيف 6سلندر.
ما انصحك بـ 4 سلندر لانه على حد علمي مكينته ضعيفه والفرق بينها وبين الديزل مو كثير.
6 سلندر افضل بكثير وعلى حد علمي انه يصرف شوي بنزين اذا كانت رجلك حاره وسرعتك خياليه.
اما في الاوضاع العاديه صرفيته معقوله. وعلى ما سمعت انه يمشي في حدوود 400-450كيلو لاكن ما ادري بكم تعبيه!!!
نظام الدفع في جيب توسان نظام متطور وذكي يعطي السياره تسارع كبير
اساسا هو دفع امامي لكن اذا كنت
1-في منعطف
2-في صعوود للاعلى او نزووول
3-عند تحميل السياره
4-عند التسارع بقووة
يكون نظام الدفع رباعي ويتوزع الدفع ليعطيك افضل تسارع مثلا__70%امامي-30%خلفي__
وهو يسمى دفع رباعي مستمر(اوتماتيك)
وانا ادخلبه الرمال بدون ما اضغط زر الدبل ويمشي زي السلام عليكم
اكيد راح تسأل نفسك وش الفايده من الدبل؟؟؟؟
الدبل يوزع القوه >>50%امامي-50%خلفي بغض النظر عن وضع السياره وهنا يعطي اداء فعال في الرمال.
السياره هاديه وعازوليتها ممتازه
اتساااع كبير في الداخليه وغريب بالنسبه لحجم السياره الخارجي.
تصميم خارجي جميل وحجم السياره اجمل ثبات في المنعطفات والفضل راجع للنضام التعليق
راسي في السرعات العاليه>>>>لحد 180 لان هذي اخر سرعه وصلتها بسيارتي الديزل!!!
على العمووم التوسان ماخذ جائزه افضل تصميم في فئته في مهرجان في اليابان!!!!وهذا ملاحظ في اتساع السياره الداخلي.
وفي الحوادث الماميه والجانبيه ماخذ خمس نجووم!!
الفل كامل من جيب توسان ممتاز ومواصفات ايضا ممتازه!!
هذا اللي عندي
واخيرا وليس اخراا السياره تستاهل قيمتها واكثر !!
اي سؤال او استفسار انا جاهز اخوي .
مع كامل تحياتي
اخوك
سراب الود
جزاك الله خير اخوي سراب الود وبيض الله وجهك ردك كافي ووافي لكن لي سؤال اشلون قومة الموتر وتسارعه ترا انا حدي 120-130 -140 اقصى سرعه هذا ان كنت مسافر والا داخل الرياض 100 وعلى الدائري بعد وجعلك تسلم
