توني خلصت من نصف الماده اللي علي
اختباري يوم الثلاثاء الجاي تعبت من المذاكره
قلت نطلع ياولد نشتري قهوه حاره من التحليه هذا اليوم الاثنين الساعه 3:05 الفجر
المهم بعد ماطلبتها وكنت راجع البيت واشوى انه قريب (البيت قريب من شارع الثلاثين)
وقفت بالاشاره وجنبي تويوتا ايكو راكب فيها اعتقد اثنين من الشباب مدري ماشفتهم زين
ولعت الاشاره ومشيت هذي الاشاره حقت نهاية التحليه جهة منطقة القصور اللي يعرفها ..
المهم وانا ماشي شفت سياره كابسه على العالي طالعه من وين ........ الرجال معاكس الطريق وماشي مليون ومن جد
ياشباب انا اقولكم انا ماشفته من السرعه قبل مايجي انا اصلا كنت ماخذ الخط اليمين وزياده على كذه طمرت الرصيف شوي وكان الايكو ماخذ خط الخدمه يعني بعيدين عنه وسبحان الله هو كان ماخذ اليسار ولا كان رحنا شوربه
كان بالشارع العام هذا لفه او منحنى صغير السياره العاكسه الطريق يوم جت تاخذ هذي اللفه وهي مسرعه راحت لكن المصيبه سياره الشرطي ياشباب لو انكم تشوفونها .... كان يبي يطارد المعاكس عاد الشرطي المسكين ماتوفق باللفه وزحفت السياره عليه وهو سريع جدا جدا ..
اول شي يوم زحف راح بنص الطريق يعني بيجي يشيل الموتر حقي يعني انا باكل هوى ..
هو عدل الموتر مدري كيف بعدين راح جهة النخل حق الزينه وشطفه بقوه وراحت السياره وزحفت بقوه الين رقت رصيف الشارع بالعرض .. وهذا كله وانا مدري وين حاطني ربي فيه بنفس اللحظه هذي شفت سفتي اربع لومينات من بعيد تروح تلاحقه انا الصراحه ماقدرت امشي قعدت احاول استوعب وش اللي صار دقيت القير على R برجع اشوف هذا الشرطي لكن خفت اورط نفسي او او
الحمد لله بعد لحظات شفته يطلع من السياره يحاول يكلم باقي الشرطه
راعي الايكو كان بيرجع بالمثل لكن كلنا مشينا اخر شي وتوكلنا على الله
ولا ادري وش صار لأني رجعت على طول البيت ولا صدقت اني وصلت سالم من اللي صار
والله يعين من ابتلى بهذا الوسخ الـــ****
ما اقول الا الله لا يوفق من كان مسبب بهذا الشي
الله لا يوفقه لا دنيا ولا آخره يارب
هذا سبب المصايب الل تصير هنا عندنا
الرجال سكران يمكن الرجال مسوي شي اكيد وخطير
لان امثال هذا الكلب خطر علينا ومريضين نفسيا لازم نعالجهم بأي طريقه كانت
القصه هذي كتبتها لكم على طول بعد ماصار لي هذا الشي
قلت نكتبها للشباب والربع اللي هنا
ان شالله يارب انك تحفظنا وجميع المسلمين بكل مكان من اي مكروه
والله يستر علينا
***
