الدينالي اليوكون كيفه بالبر شنب ولا ؟؟؟

انا شاري يوكون دينالي فضي فل كامل بمبلغ 148الف قبل خمسة اشهر واشهد انه شنب لافي البر ولا الطرق وفي السفر مريح جدا جدا ويمشي.
عليه محرك جبار قوته 6000 سي سي و379 حصان يعني صاروخ وفيه تماسك ورساوه ممتازه جدا وصرفية معقوله في البنزين مقارنة بالباترول وغيره.


لكن عندي ملاحظة ما ادري موجوده في كل اليوكونات ولا عندي بس وهي صوت حنه اذا رفعت رجلي من على دواسة البنزين وكان ماشي .
بس هذي الملاحظه الوحيدة فارجوا الافادة عن هذه المشكله لو سمحت يا اخ denaliهل هي موجود عندك ام لا

وشكرااااا....

يعطيك العافية اخوي ahmad2050 ومشكور على التعقيب...

والحمدلله ان اليوكون دينالي للأن مبيض الوجه ولا به شي ينعاب.. على الاقل من وجهة نظري الشخصيه خصوصا اني مجرب اللاند في اكس ار والسفاري والسوبربان 2500 قبل كذا...

واللي يميز اليوكون احتوائه على افضل مافي هذي السيارات من مميزات... الراحه والقوة والبدي القصير نوعا ما ليناسب البراري..

تحياتي

بصراحة تجربة جريئة منك أخوي دينالي 2005 ، و اختبار صعب للسيارة ، و لكن اليوكون يثبت أنه فعلاً سيارة يعتمد عليها .
الله يعطيك خيرها ، و يكفيك شرها . |1|

ياهلا فيك اخوي DAT3 وحياك...

والشكر موصووول للأخ العزيز ابوأسد اللي ماشاءالله.. موسوعه في العلم.. وغزارة في المعرفه..

الصراحه ياأخوان بالنسبه للسياره (الدينالي)... كل اللي اقدر اقوله (والله على ماأقول شهيد) وحسب تجربتي معها للآن.. فأنا راضي تماما عن إختياري بل وسعيد جدا فيه..

واكثر شي مريحيني في هالسياره هو متعه القياده والشعور اللي يتولد لديك خلف مقودها..

ماشاءالله قوه وتسارع يخليك تحس كأنك في سيارة رياضيه..

وتعليق السياره متغير حسب حالة الطريق... يعني على الاسفلت قمه الراحه والثبات... وعلى الطرق الوعره تحس بثبات وقساوة التعليق..

بالنسبة لتجربة الدبل.. فمثل ماهو معروف الدبل في حالة تعشيق دائم دون تحكم من السائق..

وطبعا انا علشان اعطي رأيي صح.. لازم تمر على مواقف تحسسني فعلا بالقدره الحقيقية للدبل الإلكتروني..

وحتى الان تجربتي ورأيي هو كالتالي..

على السرعات العاليه والطرق المعبده.. اعتقد ان معظم إحساس الثبات اللي تحسه في السياره يرجع الى وجود هذه الخاصيه..

بالنسبه للطرق الوعره...

الاسبوع اللي فات كنت بالشرقيه.. ونزلت فيه على شاطئ البحر في منطقه رمليه مليئه بآثار المغرزين من قبل والمتوهقين فيها.. طبعا انا تعمدت الولوج في اصعب المواقع اللي شفتها وتعمدت الإبطاء وعدم تجنب التغريز.. الصراحه السياره كانت تمشي طبيعي واللي لاحظته ولفت انتباهي انه في الظروف المماثله على الاقل تحس انه الكفرات شويه تقعد تحفر او تدور على نفسها من غير تغريز بس هالشي ماحصل معي ابدا...

بعدين شفت منطقه تصعد منها السيارات وهي شديدة الوعوره واتوقع ماتطلعها اللي الجيوب.. وشفت قدامي لاندكروزر طلع قبلي وطبعا شوية تفحيط الين طلع..

جيت بعده وببطء متعمد طلعت.. والله ان السياره طلعت بدون جهد يذكر..

وبعدها جيت ابنزل بس جيت من مكان ثاني.. وماانتبهت ان تحتي حفره الا لما حسيت السياره حكت من تحت البدي وصار الكفر الامامي متعلق في الهوى.. يوم جيت رجعت السياره بكل سلاسه.. ولا دار الكفر في الهوى ولا اي كفر فحط في مكانه..

طبعا انا ادري ان هاذي ماتعد اختبارات حقيقية للسياره وقدرتها في البر.. بس اللي انا واثق منه.. ان الكلام والوصف شي والتجربه شي ثاني جدا...

انا وبتجربتي القصيره نوعا ما مع الدينالي.. بس احس ان اي واحد يقعد معي وهو ناوي يشتري جيب غير ماخليه الا وهو مقتنع ومعزم على شراء اليوكون الدينالي..

بالنسبه للصوره اللي في توقيعي.. هذا نفس لون السياره اللي معاي بس الجنوط تختلف.. الجنوط اللي بالصوره هي 20 انش واللي معي جنوطه 17 انش... انا كنت ناوي اغير الى 20 انش بس بعد قرائتي في كتيب السياره واللي ماينصح بالجنوط 20 انش على الطرق الغير معبده.. وبعد قرائتي في المواقع الاجنبيه عن انواع المشاكل اللي صادفتهم بعد التغيير الى 20 انش.. صرفت نظر نهائيا...

تحياتي للجميع وانا حاضر لأي استفسار او سؤال....

وعليكم السلام

أهلا بك أخوي العزيز DTA3

بنسبة للسعر اليوكون الدينالي فتختلف من وكيل لأخر حيث الأسعار تتراوح ما بين 150 إلى 155 ألف ريال سعودي.
بنسبة للدبل أعتبر اليدوي أحلى شيء علشان يتحمل الكرف معك في البر أذا كنت من الذي يطلع للبر في الشهر 2 إلى 5 على الأقل.
أما بنسبة لقوة الدبل فيجيب عليك أخوي العزيز Denali2005 لأنه هو الي معه السيارة :D.
بنسبة أنا أعتبره بديل صالون التويوتا وخاصة عن فارق السعر بينهما لكن ليس كثيرا. بس أنت أي تويوتا تقصد؟ لأن تويوتا ما عندها شيء أسمه صالون هههه أكبر جيب لديهم هو لاندكروزر.

أما هنا نجي للقوة الي أنت تقولها أكيد قريتها في مجلة سعودي أوتو صح :D, بالتأكيد القوة المكتوبة هي 1000% خاطئة.
وييييييييييين قوته 390 حصان؟؟؟؟ والله المجلات يلعبون على العالم علشان يتجهون لسيارة معينة خخخخخخ.
لو كانت كذا قوتها فما في أمل أبدا أي سيارة تقاومها قومة ولا خط من السيارات التالية:
لاندكروزر , باترول , أرمادا , دورانجو , جراند شروكي, سوبربان 8100, LX470 , وغيرها ......... ألخ.

بنسبة لطلبك على المواصفات الخاصة من خارج لليوكون الدينالي فهي فكرة رائعة جدا جدا جدا,
بس تاخذ عليك تكاليف كثيرة على ما أعتقد, الأن في العيسى يوجد أنفوي بشاشة الملاحة وهذا معناه أنه فيه أحتمالية نزول الشاشة الملاحة في اليوكون والسوبربان أيضا وأيضا تقدر تركبها ضمن الأكسسوارات أن شاء الله تصير.

بس ما أعتقد أنها شاشة الملاحة لمس؟ بس من الي قالك أو من وين جبت المعلومة :rolleyes:.

ولقافية فيني هههههههههه بجيب على سؤالك الموجة لأخينا Denali2005 :D لأنه يمكن يتأخر في الرد <<<< تبي تجاوب بأي طريقة ههههههه

الجنوط بالتأكيد ليست هي التي في سيارته (وين أنت شايف سيارة الأخ Denali2005) بس الي خلاني أقول كذا هو أن أصلا ما نزل عند الوكلاء العيسى ولا الجميح سوبربان ولا يوكون بهذه الجنوط وياللآسف صراحة مليت من الشكل الحالي |5|, وبيجي أنشاء الله أخونا Denali2005 بيأكد الخبر أو بيخالفني الرأي.

أخوك أبوأسد|3|

السلام عليكم

سؤال للأخوان في هذا الموضوع وخاصة الأخ القدير أبو أسد :

كم سعر اليوكون الدينالي ؟

كيف قوة الدبل فيه هل يقارن بقوة الدبل الياباني يعني في الرمل والتطيعس ؟

هل أعتبره بديلا عن صالون التويوتا وخاصة عن فارق السعر بينهما ؟

كم تبلغ قوته محركه قرأت في مجلة أنه ب390 حصان ؟ هل هذا صحيح ؟؟؟

إذا إن شاءلله كتب لي بان أحصل على هذه السيارة هل تنصحوني بأ أطلب من الشركات المعتمدة أن يعطوني الموديل إلي غير متوفر هنا في السعودية (الشاشة الملاحي الي تعمل باللمس والجنوط الجديدة الي توفرت في موديل 2005) مثل إلي متوفر في الخارج لأني راغب بهذه المواصفات ؟؟

صورة




سؤال للأخ Denali2005 :
هل جنط سياراتك كالذي في الصورة ؟؟


شكرا لكم ...

اللون هو رمادي معدني...

صراحه مو واضح رمادي معدني او فضي معدني

الله يوفقك ومبروك مقدما...

بالنسبه للتأمين.. لاتدور غير التعاونيه تأمين.. الصراحه وبحكم تجربتي معهم وخلال الحادث اللي تعرضت له.. اقدر اقول ان لديهم مصداقيه عاليه جدا.. وسرعه في التنفيذ...

انا يوم صار على الحادث كانت وثيقة التأمين باقي ماطلعت.. ولا دفعت لهم شي بعد.. كل ا للي واصلهم فاكس من الشركة لتأمين السيارة..

وبالرغم من كذا اعتبروا السياره مأمنه والتزموا بكافة تكاليف الإصلاح.. الحق ينقال والفضل ينسب لأهله..

وبالنسبه للألوان.. انا اشوف انه ذوق شخصي..

وانا سيارتي هي نفس لون الدينالي اللي في توقيعي..

والله يوفقك مره اخرى

|3| مشكور اخوي دينالي على كل ذي المعلومات ماقصرت كفيت وفيت لانت ولا الاخوان
بس عندي سؤال عن التأمين بكم مأمن وشه الافضل _ورايك في الالوان بحكم تجربتك .
لاني ابشتري واحد يوم السبت قاللولي اليوم وصل الميناء بعد انتظار دام 30يوم وادعولي بالتوفيق والله يوفق الجميع.

هلا اخوي السندباد..

الصراحه وبكل امانه.. الدينالي في السفر لا يعلى عليه.. وانا للحين ماشفت فيه شي يكدر الخاطر او سلبي..

سافرت عليه مره وحده للشرقيه.. وماشاء الله عليه بالخط.. مريح ومستقر بالرغم من العجه والغبار اللي كان بالطريق..

بالنسبه للبر.. مابعد جربته في اماكن شديده الوعوره او طعوس قويه.. بس اللي شفته للحين في تجارب تعتبر متوسطه الحال يبشر بخير..

صرفية البنزين..

انا كان عندي قبله كرايزلر 300 ام ستة سلندر.. والصراحه تغيرت على الصرفيه واجد.. بس اتوقع عادي بالنسبه لحجم محرك السياره وحجمها وفئتها.. يعني مثلا..

في سيارتي القديمه معدل صرف البنزين في الاحوال العاديه 12 لتر كل 100 كيلومتر.. واذا شديت على السياره توصل 16 لتر في 100 كيلومتر.. اما اثناء السفر على خطوط طويله فتوصل الصرفيه 9 لتر كل 100 كيلومتر واحيانا 8 او 7 لتر..

بالنسبه للدينالي..

فصرفيه الوقود في الاحوال العاديه 16.8 لتر كل 100 كيلومتر.. واذا شديت على السيارة توصل الصرفيه 17 لتر..
في السفر تكون الصرفيه حول 16.4 لتر...

اكثر مره دفعت في تعبيه فل كانت حول 79 ريال واللمبه مولعه والمؤشر على الاحمر..

والتعبيه الواحده توصلك من الرياض الى الدمام وباقي معك حول ربع التانكي مليان..

أخي الكريم يعني هل بلأمانة تنصح به خاصةً في البر والسفر....!!! يعني موتر تعتمد عليه....لأني خايف منه خاصةً بأنه كما يقولون يجيب مشاكل كثيرة في يطلع عليه البر ووالتطعيس ليس التعطيس المتهور إنما المعقول...!!! فهل يعتمد عليه في البر...والاستخدام!! وياريت لو تخرنى عن المشاكل أو العيوب وصرفية البنزين يعني كم يمشيك فل وبكل تعبئته وكيفية الصرفية؟؟؟ وعذراً على الاطال بلأسئلة... تعلم أخوك خايف يتوهق فيه:)

مع التحية والتقدير لك:)

كلامك صحيح يابوأسد...

انا للحين ماشي اكثر من 4000 كيلو والصراحه إعجابي في إزدياد متواصل بالسيارة وادائها...

مشكور أخوي على المعلومة :D
ما توقعت أن الدينالي راح يضيق الصدر في الطعوس
أكيد راح يفرحك
وماشاء الله على كلامك شكلة يصلح حق قنص خخخخخخخخخخخ أمزح :D
بس أخوي يبيلك تتعود عليه لأن قيادته في الأماكن التغاريز شوي صعبة
فأنا عندي جمس سوبربان مكينة 454 وبدون دبل!!!
الجمعة الي فات توني راجع من البر بالجمس |6|
الموتر بطل ويرقى الطعوس ويطعس صح رغم عدم وجود الدبل؟ (قولو ماشاء الله, مني ناقص مشاكل) لاني متعود على الموتر وأعرف كيف أسوق موتر ثقيل في البر ;)
يعني هي أخوي مسألة تعود عليه ثم تصبح فنان في قيادته في البر|1|

أخوك أبوأسد|3|

ياهلا فيك اخوي بريمرا..

صدقت والله... انا مو لاقي كلمه اصدق من الكلمه اللي قلتها توصف هالموتر...

ماشاء الله عليه... تحس انه وحش متربص يبي بس ينقض... الصراحه تأديته وتسارعه وسرعة استجابته على الخط في فئته وعلى حجمه.. اقل ماينقال رووووووووووووعه بحق...

اصلا ماتدعس ربع دعسة البنزين الا اذا انت ينقال عليك متهور وبايعها... يعني طول الوقت اذا تبي تسوق بتعقل وهدوء لازم تتحكم بدعسة رجلك وثقلها...

انا جربت الموتر على خفيف في الرمل والتغاريز... وماشفت غير اللي يحبه قلبي..و يطيب خاطري..

دخلت منطقه باين عليها متوهقين فيها قبلي كثير من آثار الحفر والحفريات والحوسه.. وعادة لما تدخل مثل هالمنطقه تعشق الدبل احتياطا.. والله الصراحه عديت بكل سهوله بالرغم ان الكفرات مو منسمه ولا حسيت ان السياره عانت بشكل مو طبيعي..

بس عاد التجربه الحقيقيه اللي تقنعني.. باقي مامرت علي..

تحياتي للجميع

الديانلي وحششششششششششششش

شباب اليوم استلمت السيارة...

وإذا احد لديه سؤال او استفسار انا حاضر...

وان شاءالله تجيني الفرصه على نهاية الاسبوع واجرب السياره بالبر واعطيكم رأي فيها...

تحياتي للجميع

هلا فيك اخوي دوريه..

المشكله عدم تواجد السياره لا في العيسى ولا الجميح بعد..

السياره هذي كانت اخر وحده في الدفعه اللي وصلت للجميح.. لأجل كذا مجبر اخاك لابطل...

وبالنسبه لخدمة الجميح.. فهي زفت الزفت..

وانا ناوي اقاطع صيانتهم ان شاءالله..

تحياتي لك

ياهلا فيك طير نجد...

والله السياره باقي ماطلعت...

عطوني موعد امس الخميس.. ويوم رحت قالولي يوم السبت..

وان شاءالله مايتغير الوعد...

واذا طلعت تجيك العلوم ان شاءالله..

تحياتي وتقديري...