حصـريـا...مدينة الغاط تستضيف سباق سيارات (فيراري وبورش وبي أم وغيره) (صور وتقرير )

Shadow @user_1149 · 24-02-2005

السلام عليكم ورحمة الله وبركاته

يمكن بعضكم يستغرب من العنوان لكن هذي هي الحقيقه ..

اليوم كان الجو رائع جداً خصوصاً بعد هطول المطر البارحه يوم الاربعاء ..

وكنت في رحله بريه مع بعض الاصدقاء ..كشتة أخر الاسبوع... وتصادف ذلك وجودي بالقرب من منطقة الغاط ...

ثم اتصل علي واحد وقالي ترى فيه سباق فيه فيراري ولامبورغيني عند الغاط ..

قلت تستهبل انت ؟

أقسم لي انه موجود سباق فقلتله اوصفلي المكان ..

قال عند مدرج المطار حول الغاط بـ 10 كم...

وعلى طول غيرت الاتجاه وأكتم الطبلون 200 وعلى طول على المدرج ... فلما وصلت ماصدقت ...

مو معقول سيارات رائعه وسباق مثير في منطقه صغيره ...والله شي مو طبيعي ....

على العموم للاسف ولسوء الحظ كاميرا الفيديو كانت فاضيه بطاريتها ومكان عندي الا الجوال

فصورت كم صوره خصوصا أني وصلت متأخر جدا وعلى اخر السباق ....

وبعدها تم تسليم الجوائز بحضور امير الغاط ومدير السباق السيد ديفيد تم تسليم الجوائز للفائز على ماعتقد البغداي والمركز الثاني مشعل السديري .. وماعرف الباقين بالضبط ... (تم عرضه بالكامل في قناة العربيه و MBC )

لكن انشاءلله اوافيكم بالمزيد في الموقع ....

عشان ماطول عليكم ...

اخر السباق ذهبوا المتسابقين والحضور للغداء عند أمير الغاط عبدالله بن ناصر السديري... وبقي معظم المتسابقين متواجدين في الموقع وبدأت الاثاره من جديد

الجو كان رائع جدا غيم وصاحبه بعض زخات المطر وريحة البر مع ريحة عوادم السيارات الرياضيه ياسلااااااااام
و مقاومات ومطارحات وتفحيط وحركات حلوه ... |1|

ماطول عليكم

وأترككم مع الصور ...

هذي الفيراري .. فيراري مودينا 360

والله الفيراري نجمة السباق مع انها لم تفز .. السائق على مايبدو كان حذر بعض الشيء
لكن يكفي حضور شي اسمه ( فيــــــــــــــــــراري)
واستمتعنا بصوتها صوت الفورمولا ..

وهذي البورشات نجمات السباق وباين انها معدلات وصوتهن هز البر هز وفيه كمان بورش GT3 وهي الي فازت

<<يتبـــع>>

Shadow @user_1149 صاحب الموضوع · 09-05-2005

العفو شباب ومشكورين على المرور ...

اخوي E500 الغاط تقع على طريق القصيم السريع وتبعد عن الرياض تقريبا 280 كم وعن القصيم 100 كم وهي تقع على الطريق السريع على طول ... والسباق الجاي راح يكون السنه هذي ان شاءلله بعد تقريبا 8 اشهر ولم يتم تحديد الموعد بالضبط

salehhd @user_17805 · 06-05-2005

خطوة جيده لتفريغ طاقات الشباب

اتمنى المزيد من السباقات في المستقبل

الحاييير @user_18920 · 03-05-2005

مشكور أخوي على الصور
بس حبيت أعرف الغاط وين فيه بالسعودية
ومتى السباقي الجاي

M5 Owner @user_18562 · 16-04-2005

ارسله ... انا انتظره ...

حياك معي ... بس اكتب ابراء ذمه قبل لا تركب .. ووصيتك وانك راكب معي بملىء ارادتك مع علمك المسبق بالعواقب وان ممكن نجيب التنده .. هههههههههه

بس وش فكرة السباق؟ كانه نظام لفات وتراك نجيب اوبل سبيدستر خلها تكسر روسهم .والله راعي الفيراري يشب فيها.. :) وكانه لفات بسيطه وشغل تسارع نخربها بالام 5 ...

ومن ناحية موضوع القطه .. خلاص انت زهب البطاقه يوم الاربعاء نروح الوكاله اشتريها لك ..هههههههههههههههههه نعنبوا بليسك اخوي الصغير .. عاد تصدق لو نروح ويعطونا نجربها بنقلب بزارين هواش من يسوق .... ههههههههه

فيه قياردو صفراء بالرياض مغطني لين قلت امين ... كان يوم اربعاء وشغل قومات على شارع الملك عبدالعزيز قبل دوار المطار طبعا كلهم لومينات وانت ماشي لعبت في حسبتهم ... جا رفيزنا ومغطني رايح جاي ومشى ههههههههههه رحت للبيت ونمت .. :)

أبوطه @user_7017 · 16-04-2005

يعطيك العافيه اخوي على المجهود الجبار

عرض وتجمع في قمه الروعه

و تحديات ولا اروع

ولاكن كما قلت نقص العرض سيارات لمبورجيني

الف شكر لك وننتظر جديدك بفارغ الصبر

الأسطورة مستمرة @user_17032 · 15-04-2005

مشكور على التصوير ,,,

تحياتي لك ...

iti999 @user_18509 · 15-04-2005

رااااااااااااااااااااااااااااااااااااااائع جدا

Shadow @user_1149 صاحب الموضوع · 15-04-2005

هههههههههه قل امين الله يرجك ...

اجل مو اانا لحالي الي انصرع يوم دخل الوكاله .... وهذا انا بس ركبتها ركوب وشلون اركبها وهي تمشي واخذ لفه ...

اقول ترى مو اطيبلك ..المره الثانيه اذا رحت نادني ... ماعليك بجودك زين وماخليك تنبطح على الكبوت :D

وبالنسبه للسباق نسيت اقولك والله ...راح يقام تقريبا نفس التوقيت يعني بعد عطلة عيدالاضحى على ماعتقد ..

ولاتشيل هم معي رقم الشركة الراعيه وبعطيك الرقم عبر الخاص وتقدر تسجل عندهم ولايبغاله شي التسجيل .على كلام مشعل السديري

وخصوصا مادام معك سيارة مناسبه مثل الـ M5 ... بس لاتجحدني :D

وانا عندي لك فكره ...خلنا نتقاط انا وياك ونشتري غيارادو مستعمله .. ونسجلها باسمي ..انت عليك القيمه وانا علي البنزين والزيت ...ولاتخاف بشيل عنك هم السواقه وبسوق عنك... :D

هاااه قل تم ............ :D

وانتظر الخاص :)

M5 Owner @user_18562 · 15-04-2005

نروح نكسر خشم ساهر ذا ... كلها وانا اخوك اصرف خمس الاف وحطها بالجيب ودفتر الشيكات بيدك يخق ويدخلك الورشه ...وان بغيت تجرب السياره بعد ...هههههههههههههه

اول ما نزلت الجياردو انفلتت صواملي وتفلتت ... باغي ابعزا إرش اليوم الاسود ... وكنت ابشتري قياردو باللي هي به ... لكن الحاله راحت وعدت على خير ... واشوا اني ما طبيت كان الحين منبطح على الكبوت منصرع ... :)

المهم اني رحت ولاقي لبناني شايب ... وكان وقتها ما عندهم الا قياردو سودا والثانيه صفرا او برتقاليه ما اذكر بالضبط ومورسلاقو صفرا من جوا اصفر ( مزاج كور) ... وكنت ناوي نيه قشرا بس كان معي واحد من الشباب الله يذكره بالخير .. جودني زين ... وكان يقول ( اركد والله لو انك مدمن والابره بيعطونك اياها بدال الاستبنه لا شريت السياره) ... المهم طلع لنا السودا واخذنا لفه صغيره اشارتين على طريق الملك عبدالعزيز ... يوم رجعنا صرت انا امسك خويي لا يتفلت يشتريها ... هههههههههههه

وقام يخربط علي هو يسوّق ( وهذا شغله) وانا كنت وقتها دزني واطيح ... وخويي يركدني ... وبعدها كل من شاورته قالي مهبول انت ... فقلت خلني كذا دامني عاقل بعينهم لا اصير مهبول بس قلبي متقطع عليها ... المهم ذكر لي سالفة المطار وكان ناوي يدعوني لو شريتها ....

والله قبل كم يوم شفت وحده سودا بالشرقيه جنطها اسود ..... قعدت الحقه ... احس انه ارتاع ..قال ذا ارهابي بيفجرني ..... :) بس شاريها شاريها الله لا يعوق بشر الحين ولا بعد 40 سنه ... ان الله عطاني عمر ...

المهم كان عندك علوم عن السباق اللي جاي عطني تاريخه تكفى ترى انا من الناس اللي يتمنون ان فيه سباقات وانديه سيارات ... وانديه ملاك صانع من صناع السيارات ...

Shadow @user_1149 صاحب الموضوع · 14-04-2005

هلا اخوي بيج بوس

مشكور على مرورك وماقصرت

هلا اخوي مالك الـ M5

اجل خطر اني انصرع اذا شفتهم :D

بس هذاك قلتها بنفسك ..ممنوع تصوير والحضور بعد لازم واسطه .. ماصار سباق رسمي :D

اما سباق الغاط اول سباق رسمي ينظم بهذه الطريقه ونفسه عبدالله السديري قالها وبقناةالعربيه بعد قالوها ...

والغاط تجيك على طريق القصيم السريع وانت رايح للقصيم ....

اما اللبناني الي تتكلم عنه .. اي واح تقصد .... اذكر فيه لبناني لكن شايب ومادري وين راح ... والحين فيه واحد اردني مو لبناني واسمه ساهر ...لك عليه شوي :D مسوي زحمة زياده عن اللزوم .... اما الشايب وخر والله خبره ومو سهل ابد

المهم ياليت تعلمني بالضبط متى ينضمون .. ومالك الا الي يطب عليهم .... :D

واشكرك على مرورك :)

M5 Owner @user_18562 · 14-04-2005

وينها فيه الغاط؟

انا اسمع بها بس وين شمال جنوب غرب شرق؟

ومتى السباق الجاي؟ خل اروح اشارك ... ويمغطوني ... :) واحط عنوان المنتدى على القزازه خل اسوي لكم دعايه :) بس تعالوا شجعوني ....

الله يعطيك العافيه ومن جد علمني متى تكفى السباق الجاي وكيف التسجيل كان عندك فكره عنه ... ومشكور..

على فكره شادو ترى مو اول سباق ... فيه وكالة الغسان اللي بالرياض شبكوا لهم امير وفضوا مدرج بالمطار القديم وكان مليان لمبورقينيات وفيراريات (سردها هاللبناني شي اعرفه وشي ما اعرفه وشي سمعت به وشي ما مر علي اسمه) من العيار الثقيل والله لو تشوفها ان تنصرع بسم الله عليك ..:)( من زود حبك لها) ... بس عشان يخلونك تحضر لازم تعرف فلان وعلان .. والتصوير ممنوع خبرك المطار القديم .. (العفش) ...يعني لا تاخذ كمرتك لا يودونك ورى الشمس .....

بس ينضمونه من فتره لفتره ... مدير وكاله الغسان بالرياض وعدني ان شريت القياردو ( ماخذ مقلب فيني) انه يرسل لي دعوه للمشاركه بالسباق ( اصلا حتى لو شريتها ابسابق ناس المليون عندهم ريال واحرق سيارتي واخرتها اطلع بها على سطحه وانا راكب جنب سواق السطحه بالغماره وهم طالعين برنجات وبي امات) |4| ....

ورح استفسر من هاللبناني اللي يهرج ايطيالي ذب كلمتين قلت ماشاء عمتتكلم ايطالي (باللهجه اللبنانيه القحه) اقلق امي كل شوي يخربط علي وشكله كان يقول ( انا داري ان ما عندك سالفه لكن ابشوف وش اخرتها معك) بالايطيالي ...

BmW BiG BoSS @user_17475 · 07-04-2005

ما قصرت

تقرير حلو...يعطيك العافيه

Shadow @user_1149 صاحب الموضوع · 06-04-2005

هلا اخوي SaDSmiLe

ان شاءلله المرة القادمه ..

واشكرك على مرورك :)

--------------
هلا اخوي فواز

ولو .. يكفي مرورك اخوي فواز واشكرك على ردك الجميل وماقصرت :)

-----------
هلا اخوي لكزس

الغاط تبع الرياض ..

والمدرج مبين من شكله انه للطائرات الخاصه او الصغيره ... يعني مش حالك لكن ممتاز للسباق ...

على الاقل الغاط هالمدينه الصغيره احسن من غيرها باعتبار انه اول مدينه بالسعوديه تقيم سباق سيارات بهذا المستوى .. :)

تسلم على مرورك وماقصرت

-------
هلا اخوي مربوش ..

انسخ الرابط وافتحه بصفحه جديده او اعمل تحديث على الصور وان شاءلله تظهر :)

Shadow @user_1149 صاحب الموضوع · 06-04-2005

هلا اخوي راعي الباندا ..

الله يعافيك وتسلم على المرور .. :)

-----------------------
اهلين اخوي زيرو ون ..

تسلم على مرورك :)

-------------------------

هلا اخوي night

العفو ومشكور على مرورك :)

--------------------
هلا اخوي محمد

تسلم على كلماتك الجميله وهذا واجبنا تجاه المنتدى في أن نحرص أن نقدم له كل ماهو جديد ومتميز في عالم السيارات مع العلم أن منتدى السيارات أول موقع ينقل خبر السباق .... وهذا بحد ذاته انجاز ..

اشكرك على مرورك اخوي محمد وعلى تشريفك لموضوعي المتواضع :)

مربوش @user_12247 · 06-04-2005

مافي صوور........

lexus4ever @user_10263 · 21-03-2005

مشاء الله

بس وين الغاط ؟؟ تبع الرياض هي؟؟

ولاااااااا المطارحة في مدرج المطار ههههههههههه شكلهم مافي كان رحلات ذاك اليوم والمطار ماخذين اوف .

فقالو خلينا نستفيد منه ...

فواز @user_561 · 20-03-2005

ألف ألف شكر أخوي Shadow على هذه التغطية الرائعة للسباق المميز

وأنا آسف على تأخر الرد مدري كيف ما انتبهت للموضوع

يثبت لمدة أسبوعين

بحفظ الله |1|

SaDSmiLe @user_15904 · 20-03-2005

و الله حماااس ليتني موجود

مشكووور على التغطيه الرئعه

محمد @user_67 · 13-03-2005

تغطية رائعة وصور في غاية الروعة والوضوح.
كلمات الشكر قليلة في حقك وفي حق موضوعك المتميز ياShadow
|1|