تجربة خفيفة للجاغوار إف بايس ٢٠١٧

.
.
.
.
انا كان لي تجربة خفيفة وسريعة للجاغوار الإف بايس الجديدة ٢٠١٧ وحبيت اعطيكم نبذة سريعة عنها

كبداية السيارة تتوفر بعدة محركات ديزل وبنزين
بس السوق الخليجي تجي له خيارين من المكاين الاول : ستة سلندر سوبر تشارجد ٣.٠ لتر يولد ٣٤٠ حصان
والخيار الثاني يكون نفس المحرك بس يولد ٣٨٠ حصان لفئة الإس
طبعًا السيارة تجي بأربع فئات بالسعودية
prestige تبدأ من (٢٤٩،٩٠٠)
R-Sport تبدأ من (٢٦٠،٥٠٠)
portfolio تبدأ من (٢٨٣،٣٠٠)

والأخيرة ال S اللي تجي مع محرك ٣٨٠ تبدأ من (٢٩٤،٤٠٠)

طبعا الأسعار هذي هي الأسعار الابتدائية من دون اي مواصفات اضافية لأنك لو تروح الوكيل بيقولك أسعار غير لأن السيارات اللي عنده اكيد حاط عليها مواصفات اضافية تزيد السعر

طبعًا هذا موقع جاغوار اللي يخليك تبني السيارة حقتك بالسعر اللي انت تبيه والمواصفات اللي انت تبيها ويوفر فيه السعر بالريال وهذا شي كويس وقليل شركات عندها هالشي انه يكون مع السعر!!! بس هذا موضوع ثاني ان شاء الله بطرحه لكم
موقع محدد مواصفات الجاغوار:
http://rules.config.jaguar.com/jdx/en_gc_~sar/f-pace_k17/

طبعا الفئة اللي جربتها هي ال R-Sport يكون فيها كت رياضي خفيف خارجي ومقاعد رياضية اكثر بس نفس السيارة مافيها اختلاف بالقساوة او انها اقسى او اي شي

المهم نبدأ بالتجربة والإنطباعات:

السيارة مظهرها الخارجي جدًا جميل ومستوحى من الجميلة الإف تايب
والتميز اللي فيها اثناء تواجدها بالشارع جميل ملفت للنظر

وداخلية السيارة تتميز بالجلود الفاخرة والمواد الطبيعية اللي تعطيك احساس بالفخامة والرفاهية داخل السيارة
وقيادة السيارة وعزلها للصوت والضجيج والهواء كان هادئ ويليق بسيارة بفخامتها وسعرها
ومركب السيارة ناعم حتى على الوضعية الرياضية ناعم ما اختلف ذاك الزود(اتطرق لهذا الشئ لاحقًا)
لكن الشئ اللي راح يفاجئك فعلًا هو اداء السيارة المبهر والقوي ال ٣٤٠ حصان في التسارعات تحس فيها بكل حصان يعني فعلا السيارة ادائها مبهر وتتسارع من ٠-١٠٠ ب ٥.٨ ثواني وفعلا تحس انها تقدر تجيب هذا التسارع
بالنسبة لتجربتي انا اشوف ان ال ٣٤٠ كافي وزيادة ما راح تحتاج تاخذ ال ٣٨٠ حصان الا اذا كنت متعطش للاحصنة
وقيرها ZF المشهور الثمان سرعات تعشيقاته ناعمة وبالكاد تشعر فيها وسريعة
المواد طبيعية والجلود تحتويك بكل مكان وجودة الأزرار ممتازة والتكييف الأمامي قوي وبارد ولكن التكييف الخلفي فقط فتحتين بالوسط ولا يناسب اجوائنا الرومنسية بعز الصيف فلذلك انا انصحك بل اقول لك اذا بتاخذ السيارة اطلب معها خيار الأربع مناظق للتكييف هي تجي بمنطقتين بس بالامام بس الأربع مناطق راح يخلي فيه تحكم خلفي للتكييف مع زيادة فتحتين على كل من العمود ب يعني راح يصير بالخلف اربع فتحات بدال فتحتين وهذ اوبشن قيمته ٧٠٠٠ ريال ويستاهل لازم تاخذ

واعيب على جاغوار انهم ما خلوه قياسي لسيارات منطقة الخليج الحارة خصوصًا

السيارة قيادتها ممتعة ووزنها بالورق ثقيل بس لما تسوق السيارة ما تحس بهذا الوزن لأن جاغوار قضوا وقت كثير في انهم يوزعون الوزن على السيارة وخلوه تقريبًا توزيع ٥٠/٥٠
بس راح تحس بالوزن لما تفرمل السيارة زخم السيارة راح تحس فيه عالي وحسيت ان السيارة تحتاج فرامل اكبر شوي من الحالية.

والسيارة طبعًا فيها اربع وضعيات للقيادة :عادية/رياضية/اقتصادية/واجواء زلقة(مطر،ثلج،...الخ)

الوضعية الاقتصادية فعلًا تشتغل والسيارة تبكر التعشيقات وتقلل العزم وتحاول توفر بنزين

الوضعية العادية استجابتها ممتازة وخصوصًا عند التجاوزات ومريحة

الوضعية الرياضية:بكل صراحة ما حسيت بفرق عن الوضعية العادية غير الصوت انه تغير ولا ما تغير في القساوة شي بالكاد تشعر بتغيير من دون الصوت


وجابني هذا لنقطة مهمة:صوت السيارة طررب خيالي والمشكلة ان صوتها من الخارج افضل من الداخل مع ان انت اللي دافع فلوس المفروض انت اللي تسمعه مو الناس بس يعني يضل صوت جميل صراحة

وزي ما قلت الداخلية والمواد عالية الجودة وفخمة بس منطقة ما تحت اسفل الكرسي هذي بلاستيك بس انا عن نفسي متفهم لأنها منطقة سفلية وما تلمسها ولا تشوفها كثير اللي تكون اسفل الابواب واخر الكونسول الوسطي
بلاستيك

والرؤية الخلفية سيئة

والشاشة باللمس يا إما تكون ٥.٣ انش او ١٠.٢ انش ألوانها جدًا واضحة التقنيات اللي فيها متقدمة وتلائم سيارات العصر
الشاشة متجاوبة وسريعة للأزرار اللي بالصفحة الرئيسية بس بعد كذا لما تبدأ تدخل اكثر وتتعمق اكثر الشاشة تصير بطيئة وتتأخر بالتجاوب وهذا شي لازم يحسنوه. طبعًا فيها لغة عربية لكن فيه صفحات غير معربة بشكل جيد اعذروني ما اخذت صور بس لما اشتغلت الحساسات طلعت بالشاشة كلام وكان غير واضح زي كذا ( ال ثصن نل قه نثت ع ل بي ي س ض ص) ان شاء الله تكون وصلت الفكرة . ف كمجمل الشاشة تحتاج تحسين أكثر

وبس إن شاء الله يكون تقريري البسيط ناسبكم كانت تجربة سريعة ما تعمقت وما اخذت وقت كثير بالسيارة

بالنسبة للي يحب يشوف وش فيها مواصفات وفرق الفئات الصفحة اللي حطيتها لجاغوار تبين لك بكم كل فئة وتختار الفئة اللي تبي وتشوف مواصفاتها وتضيف الاوبشنات اللي تبي وكلها طالعة سعرها بالريال

وهذا الرابط مرة أخرى http://rules.config.jaguar.com/jdx/en_gc_~sar/f-pace_k17/

ايه وقبل ما أنسى :bigggrin: مسؤول المبيعات قال إن ضمان السيارة ٥ سنين أو ٢٥٠ الف كيلو متر

ومعها صيانة تتكون من تغيير زيت وفلاتر و شغل اليد فقط لمدة خمس سنين أو ١٠٥ الآف كيلو متر

وأي إستفسار او سؤال حايكم.

يا إخوان انا ما صورت ولا عندي صور بس حاولت احط صور للسيارة بس ما قدرت ما زبطت معي ما عرفت وش المشكلة اعذروني لشح الصور .