رايكم في الفتك للاستخدام اليومي

[Kh4lid]

بسم الله الرحمن الرحيم

اول موضوع لي في هذا المنتدى وان شاء الله بيكون لي تفاعل فيه

بداية انا الحمدلله شريت اف جي 2015 والموتر ممتاز وكل شيء لكني شريته لانه اقتصادي وقوي ويتخمل شوارعنا في الرياض اللي معروف عنها ماشاء الله الرساوه, على اي حال انا من اول وعيني على الفتك بحكم سمعته وقوته وطرب صوته.

ولقيت رجال شرواكم يبدل سيارته بسيارتي وش رايكم, وطبعا انا طالب واستخدامي يومي للسياره يعني مشاوير اهل على دوام وارجع البيت يعني مانيب راعي دوران لكن الفتك جدا اعجبني برزته وقوته.

رايكم اولا في صرفية السياره لأنه فعلا غريبه يعني 6.8 والله لو انه فراري لكن الله يعين, يستاهل اذا كانه فعلا قوي

وقطع غياره, وتحمله, ووسعه والراحه.

[سكايبر| حروف للكتابه |]

الفتك طيلة 50 سة صنع انجازات وتاريخ بالطرق الوعره حتى انن الباجيرو يشاركه بنظام التعليق والقير

لكن علطرق المعبده فهو متوسط

[m.h14]

الفتك خذه على انه موتر كد ومد موتر تحمل ويقبل التعديل يعني لو تعدل ليل نهار مايقول لا الشباب وصلوه فوق 2000حصان فالامارات وقيوره ومحركاته تمام التمام

لكن بالنسبه لصرفيته صحيح انه يلهط لكن يستحق
و فيه حل اذا تبي تخفف الصرفيه اللي هي البرمجه شف الشباب فالانستقرام ماراح يقصرون معك

ميزة البرمجه
تخفف الصرفيه
تعطي راحه للمكينه يعني الحنه تخف
زياده في احصنه السياره +وتحس بالفرق +تقدر تخلي الموتر يقاطع بسرعه نفس التيوتا او تحليه على ماهو
و قطعه الفتك الحالها لها نغمه ف كفه

هذي مميزات البرمجه لكن الاسعار ما ادري بالظبط كم

طبعا ينفع للاستخدام اليومي خويي معه واحد ولا اشتكى طبعا اهو رجله بارده حتى ما برمج ولا سوا للموتر شي فقط راعي مكاشيت وتطعيس


بس سؤال
وش موديل الموتر اللي ب تبدل به وهل هو قير عادي او تماتيك

لان التماتيك مرريح جدا لكن اذا انت تبي تتونس مالك الا العادي ف هو الطرب

[فــيــصــل]

الفتك سيارة برية بإمتياز ، فإذا استخدامك فيه نسبة كبيرة للبر خذه ولا تتردد

ولكن إذا غالب استخدامك للمدينة فأعتقد فيه بدائل أفضل منه وأحدث بحكم صرفيته العالية للبنزين وضيق داخليته نوعا ما مقارنة بحجمه الخارجي وراحته متوسطة مثل أغلب الجيوب

قطع غياره متفاوته الأسعار ولكن في الغالب فوق المتوسط بحكم أنه ياباني 100% وهاذي ضريبة الجودة أحيانا

( أقترح عليك الباترول الشكل الجديد ) ممتاز للبر والمدينة

موفق

[ملك الرمل]

يصرف أكثر من الأف جي ، وتراه موتر بر ويتحمل ، في المدينة انصحك بخيار آخر .

[Kh4lid]

كفيتو ووفيتو, لكن عطوني من الاخير, هل الاوتوماتيك يفرق بالعزم عن العايدي وهل الاوتوماتيك له صوت وطربه مثل العايدي, لن لين شفت الفتك يوم يفز بالثاني وهو بالازفلت يلللعب بس ماتدري هو عادي ولا اتوتو

والتبترونك اللي فيه مثل اللي في السييرا يعني يمديك تعش بالثالث ثم ترده بالاول الثاني ولا وش نظامه بالضبط

والموتر كيفه في المدينه يعني به مناقز مثل الشاص, ولا مثل الاف جي عادي

[ARMADA xKINGx]

^^^
جرب استأجره عشان تجرب كل شيئ
لأني ما أتوقع أحد يسوي حركات مثل كذا مع إحترامي لك

[m.h14]

كفيتو ووفيتو, لكن عطوني من الاخير, هل الاوتوماتيك يفرق بالعزم عن العايدي وهل الاوتوماتيك له صوت وطربه مثل العايدي, لن لين شفت الفتك يوم يفز بالثاني وهو بالازفلت يلللعب بس ماتدري هو عادي ولا اتوتو

والتبترونك اللي فيه مثل اللي في السييرا يعني يمديك تعش بالثالث ثم ترده بالاول الثاني ولا وش نظامه بالضبط

والموتر كيفه في المدينه يعني به مناقز مثل الشاص, ولا مثل الاف جي عادي

معلومه فقط
بالنسبه ل ثبات الفتك وراحه الفتك افضل من الجكسار الى موديل 2016 وهذا الكلام من ابن صاحب معرض عماد الدين الخالدي

شف تجربته فاليوتيوب اسمه عبد الرحمن الخالدي يسوي تجارب عالمواتر اللي ف معارضهم
رح ل تجربة الفتك واسمع وش قال اثنى على الفتك ف ثباته وقوته والتحمل ايضا
وقال للامانه بما اني كجرب السياراتين ترا الفتك اثبت من الاند الجكسار
طبعا اهو موتره فكسار بريمي 2015 وعلى كلامه انه مجرب الجكسار ايضا

شهادته تكفي بما انه صاحب المعرض و مجرب الجكسار والرجال ما قالها الا بأمانه ويثني على الفتك هذا شي يصب لصالح الفتك

اما المناقز لايوجد نهائيا بالعكس اذا ركبت الفتك كنك راكب موتر امريكي فيه مرونه وليونه بسبب ياياته والمساعدات ايضا