بسم الله الرحمن الرحيم
السلام عليكم ورحمة الله وبركاته
بس للمعلومية الموضوع مجرد رغبة قد يتحدد القرار لاحقا الشراء من عدمه وليس أني فعلياً راح اشتري قريبا علشان ما احد يسأل يقول شريت ولا لسه
سالمكم الله محتار بين سيارتين
وكل السيارتين من نفس الشركة!
طبعا السيارتين سيدان
اسعارهم قريبة من بعض لكن اختلاف الاستخدام المخصص له
السيارتين هي:
1- سوبارو ليجاسي 6 سلندر 3.6 لتر بقوة 256 حصان
2- سوبارو WRX قير CVT محرك 4 سلندر 2 لتر تيربوشارج بقوة 268 حصان
طبعا ان جيت بشتري احد هذي السيارتين فبختار نفس اللون الموضوع له تماماً.
حقيقة اعرف ان وضع سوبارو لدينا ليس بذلك المحمس او المطمئن لدينا لكن شفت الخيارات الاخرى من فئة السيدان متوسطة الحجم اليابانية وما اعجبت إلا بالليجاسي وخيار الـ WRX أقولكم ليش وضع بالقائمة
عموما قد اقول ان شرائها بالنسبة لي ماراح يكون مشكلة كبيرة جدا فالحمدالله لن تكون سيارتي الوحيدة بل ستكون سيارتي الصغيرة الوحيدة فنظامي للاسف كله Full size SUV وودي أغير شوي
ومسألة القطع ماعندي فيها مشكلة فعندي صندوق امريكي وطلبيات القطع عندي سهلة جدا فماهي جديدة علي (ان شاء الله بس مايكون فيه فرق بقطع عندنا عن الي يباع بامريكا كثيرا وطبعا الطلب بيكون برقم القطعة) الشغلة الي ممكن محيرة شوي شغلة الصيانة بس ممكن ماتكون مطمئنة جدا
عموما نرجع للخيارين
فكرت بالليجاسي لانها دفع رباعي وانظمة سلامة عالية ويابانية الصنع وشكلها من الداخل والخارج عاجبني ويعجبني فيها الراحة والاتساع فيها وطالعة افخم من الاجيال السابقة.
فكرت بالـ WRX لشغلة انها حول قيمة الليجاسي 6 سلندر ممكن ارخص, صحيح اقل مواصفات لكن سمعت انها نزلت 2016 بمواصفات اعلى قليلا من 2015 والي عجبني في WRX أنها قيادتها بالاغلب بتكون اكثر رياضية من الليجاسي التي تميل للسيدان العائلية والشيء الزين فيها تسارعها افضل بكثير من الليجاسي حتى وهي بقير CVT (علشان ما احد يتعب نفسه وينصحني بالعادي انا اكره القير العادي خير شر بالاخص اذا صارت ديرتك زحمة وحفريات...الخ) أضافة ان لها قطع كثيرة لو تبي تعدل فيها ولو انا بغيت التعديل فبيكون تعديلي محدود جدا فمثلا بيكون مجرد فل هوائيات وبرمجة وجنوط أخف فقط فانا اطلعت على تعديلات WRX حتى تعديلات موديل CVT منها وممكن بعض الاكسسوارات زي البدي كت من الخارج أو اكسسوارات بالداخل.
بعكس الليجاسي ما افكر اغير فيها شيء
وان كان فيه اضافات بتكون اكسسوارات داخلية فقط.
الي مو عاجبني بـ WRX انها ماتتمتع بالرحابة الي تكون سيارة مريحة جدا حتى ان مندوب قالي ان WRX في المركب أقل راحة من الليجاسي.
المشكلة مرة اتاحت لي فرصة تجربتها لكن ماجربتها لانشغالي علشان اشوف فرق القيادة بحكم اني مجرب الليجاسي 6 سلندر.
افضل ارقام التسارع لليجاسي 6 سلندر للـ 60 ميل من 6.9 إلى 7.3 ثواني
أفضل ارقام التسارع للـWRX قير CVT للـ 60 ميل من 5.4 إلى 5.8 ثواني
طبعا هذي الارقام التسارع للستوك فقط
فليت نسمع ارائكم
وش تنصحني أو لو كنت مكاني فماذا ستختار من هذي الخيارين فقط