اكثر الورش عندنا مايعرف للسيارات الحديثه وللأسف مايقول ماعرف بل يحاول لربما يفلح ومنها يتعلّم اذكر مره اخوي معه جمس 99 دبل وهرب العكس الامامي والمشكله صوفه لأحد العكوس من مخرجه من الكارونه وراح للصناعيه وحصل يماني قال افكه لك بسيط هذا وفكه من يم الكفر لكن مارضي يخرج من الكارونه لان له قفل ولاهو عارف يشيله المهم ساعه يحاول قال اخوي طبقه بس والله يخلف على انتظاري عندك لي ساعتين ونت الله يخلف عليك تعبك وطبقه وراح لفلبيني بنفس الصناعيه وماخذ نص ساعه الا هو مصلحه ,,المشكله الورش الكبيره غاليه لقلتها ولتعقيد السيارات الحديثه لانها كمبيوتر ولازم اجهزة كشف تساعدهم وفنيين متمرسين ويواكبون تطور السيارات ,,لكن بصفه عامه افضل الفنيين بالسيارات هم الفلبينيين ثم الهنود غيره ماعندك احد الباكستاني ماعنده الايشد الحاجه لين يجيب خبرها واليماني لو تجيب له طايره قال اصلحها ..
لكن يفترض اننا نتعلم لو شي يسير بالسيارات انا خابر ابوانا يعرفون يصلحون السيارات وهم مادرسو ولكن من اجل الحاجه تعلموا,,,,
اما الفاتوره مايعطي ضمان لأن القطعه اصلاً اللي تشريها يقول لك المحل ضمان تشغيل فقط انا مره ركبت كمبريسور مكيف اعطاني ضمان تشغيل يعني إذا خرب لو بعد ساعه كلن يحط المشكله على الاخر ولايوجد جهه تجبر الورش على الضمان..
