خاص لملاك سيارة نيسان سنترا 2014

عرفت لان هذي هي وظيفتي.
الفواتير هذي اسعار رمزيه متفق عليها بين المصنع و الوكيل عشان الجمرك لانه بموجبها يتم اصدار البطاقه الجمركيه.
و لو حبيت تتاكد تقدر ترجع لسنه 2002 و تشوف اسعار البطايق الجمركيه و راح تعرف الاسعار بشكل واضح.
عموما انا مالي شغل بالوكيل و كم يربح لاكن المصنع يفرض على الوكيل سعر متفق عليه و يكون سري جدا حتى الجمارك ما يعرفونه و الفواتير بس عشان الجمرك يطلع ارخص عليهم نوعا ما.

لو المصنع اعطاهم ربح خيالي كان شفت الوكيل ما يوفر اي قطعه غياره لانه راح يكتفي بربحه من بيع السيارات فقط.
و اضف الى ذالك المقاصه اللي تصير بين الوكيل و المصنع في حاله ان الوكيل صلح سيارات على الضمان يتم خصم اسعار التصليح من سعر شحنات السيارات القادمه بالطريق.
كل هذي الاسباب تجبر المصنع انه يلعب بالاوراق لمصلحته اولا قبل الوكيل او المستهلك.

انا ما اختلف معاك ابدا ان الوكلاء يلهفون فلوس و خدمات سيئه جدا في اغلب الاحيان لاكن بنفس الوقت الوكيل في مين يحاسبه اذا صلح سياره على الضمان و المصنع ما وافق على التصليح وقتها يتحملها الوكيل.

من خلال عملي اقدر اقولك ان الوكلاء في امريكا مايقدر يصلح شي بسيارتك الا لما ياخذ الموافقه من المصنع سواء كانت سيارتك نيسان او تويوتا او دوج او فورد او غيرهم دام ان سيارتك على الضمان انسى شي اسمه تصليح بدون موافقه.

ياالغالي الموضوع مهب مواصفات او مقاييس
الموضوع هو سياره اعتماديه عمليه اقتصاديه مخدومه من قبل الوكيل والموزعين من حيث قطع غيار او اكسسوارات

سالفه ان هذا مطلي بكروم او هذا لون الفرش فيه جميل او هذا لون صداماته مثل لون البدي

كل هذا ماراح ينفعك لو لاسمح الله صار عندك عطل او مشكله ماقدرت اتصلحها او توفر لها قطع غيار

كلامك سليم ميه بالميه بس السنترا موجودة من 2013 ودخلنا الان 2015 ولا شفنا منها اي عيب مصنعي او اي استدعاء من وزارة التجارة بسبب عيب خطير وبالنسبة لي انا شخصيا ما قد سمعت عن شخص شراها واشتكى منها بسبب عيب مصنعي الحمد لله الى الان السنترا امورها بالنسبة للعيوب المصنعية امورها تمام

انا مثل الأخ كركتري

افكر من السنترا من فترة لاخوي لكن الي رادني مو موضوع قطع الغيار قد ماهو الصيانة
اقصد بالصيانة لو صار فيه خطأ مصنعي هل يقعد الواحد يطامر لفرع العيسى حق مخرج 18
او فرع مخرج 24 اعتقد ؟!!

لان هذي الفروع بعيدة عني , كما حصلت لي تجربة مع كيا الجبر ومن بعدها قررت
اكون حذر اكثر , وهل العيسى راح يحل المشكلة دايركت ولا بيطول على الفاضي
ماعندي مشكلة احط السيارة عندهم فترة لكن اجيه والقاه جاهزة ومصلحة مو مثل الجبر كيا

لان تخبرون السيارات الجديدة طبيعي يكون فيها اخطاء مصنعية

بالنسبة للاخوان الي ينصحون بهيونداي كلامكم صحيح وقطع متوفرة ووكلاء مميزين
بس السعر لصالح السنترا بمراحل بمراحل

السنترا بالمعارض الان ستاندر وصل سعرها ل46 و45 , مع توفر ABS وايرباقين فيها
قارنوا سعرها بسعر الالنترا ستاندر الي مافيها الا ايرباق واحد وبدون ABS
سيارة 2014 مافيها الا ايرباق واحد ؟!!

السنترا بالنسبة لي افضل من الالنترا والكورولا مبدئيا بسبب السعر , لكن هل الواحد
لو خذها بيتورط ولا لا , هذي مشكلتي

بالنسبة لتوفر قطع الغيار اتوقع راح تكون متوفرة ومو كل القطع راح تحتاجها كل يوم
صديقي عندهم تيدا 2008 قير عادي والتيدا معروفة انها غير منتشرة
راح للعيسى وحصل كل القطع الي يبيها بنفس اللحظة مع العلم ان القطع ماكانت
قطع طبيعية مثل الفحمات او البواجي , لا كانت اعطال داخلية في القير او المكينة نسيت
وحصلها واعطاه الموظف خصم ممتاز

فـ المشكلة الحقيقية ماهي في القطع قد ماهي عند حدوث عيب مصنعي وش راح يصير يا ترى

وأيضا سيارة سنترا السياحية فيها أشياء جميلة مثلا مقابض الابواب كروم وجميع النوافذ الاربع للسيارة محاطة بقطعة كروم تعطي جمال للسيارة هذا وهي ستاندر سياحية ، قد تكون هذه الاشياء غير مهمة وسخيفة لدى البعض ولكن هالاشياء الجمالية التكميلية نادرا ماتلقاها بسيارة بنفس فئة السنترا يعني النترا وكورولا الستاندر مايجي فيها ماذكرت ، بس لو ان العيسى موفر قطع غيارها بالكامل والله ماترددت ثانية واحدة عن شراء السيارة هذا رأيي وجزاكم الله خير

لأن والله وأنا أخوك ماخذها انا بالعقل مثلا عندك النترا وسنترا نفس الحجم ونفس المواصفات تقريبا انا اتكلم عن السياحي ، وبالنسبة للشكل الخارجي انا من وجهت نظري السنترا أطلق بمراحل والسعر فرق بين الشمس والقمر فرق 10000 ريال كل هذي الاسباب هي اللي مرغبتني بالسنترا

ياالغالي انت مالك ومال الطرق المعلقه
مالك ومال وجع الراس
مر شركة هونداي تحصل سيارات حلوه مع مواصفات وعدة وكلاء وقطع متوفره وريح عمرك

يعني يا اخوان بإختصار تنصحوني أشتريها ولا لا

طيب ماشاء الله عليك انت كيف عرفت ان هامش الربح للسيارات 30% والخدمه 65% ...طيب لو ربح الخدمه بعد البيع 65% واكثر على كلامك ليش الوكيل ما يقدم هذه الخدمات ويربح اكثر ...
انا ماعندي وكالة يقولون حسب تعبيرك الراقي ... انا كنت شغال في التخليص الجمركي لوكاله من الوكالات ولو اقول لك كم سعر السياره من المصنع وكم تكلفتها بعد اضافة 5% ضرائب جمركيه ماراح تصدق ...
احسن الظن في الناس... انا مايهمني ربح الوكلاء او خسروا ...يهمني الوكلاء يحترمون العملاء ويقدمون خدمات مقابل الفلوس اللي يلهفوها..
تحياتي لك ..............

يا اخوان خلونا في صلب الموضوع وهو قطع الغيااار

ما شاء الله كيف عرفت ان هامش الربح اكثر من 70% هل كلامك عن خبره و درايه ولا بس من وكاله يقولون!!
عموما لو كان هامش الربح 70% كان شفت الناس تتهاوش على اخذ الوكالات.
عموما بس حبيت اصحح لك المعلومه.

هامش ربح السياره ما يزيده عن 30%
الربح الرئيسي يجي من الخدمه بعد البيع و بيع قطع الغيار. و هذي ربحها يوصل الى 65% و يمكن اكثر في بعض الحالات.

نرجو ممن يجد او يعرف اماكن توفر قطع نيسان سنترا أن يفيدنا

هامش الربح لبيع السيارات الجديده يزيد عن 70% لكن لقطع الغيار في حدود 30% ...
فيه وكيل يهتم بقطع الغيار وخدمات مابعد البيع لضمان استمرار المبيعات للسيارات الجديده وفيه وكيل فاشل زي الطقم حق نيسان وانفنتي مايهتم بخدمات مابعد البيع عشان كذا العميل ما يصدق على الله يتخلص من سيارته ولا يفكر يشتري مره ثانيه من نيسان وانفنتي ..مع العلم ان سيارات نيسان وانفنتي ممتازه لكن حظها في الوكلاء تعبان

ليش العيسى مايوفر القطع وش اللي يمنعه لو انا مكانه كان اوفرها علشان ما تنضرب سمعتي

احد ضحايا العيسى والغسان ...
ياما قلنا عن نيسان و انفنتي انها مجرد بيع سيارات بدون خدمات مابعد البيع ...
المهم ...الاخ العزيز من تجربه طويله مع نيسان وانفنتي مالك الا حل واحد تروح للعيسى وتطلب قطع الغيار وتحط في بالك فترة انتظار ممكن توصل شهر او اكثر غير كذا لا تتعب نفسك او حل ثاني تدور في التشاليح

نرجوا الإفادة ممن يملك السيارة أو له خلفية عن الموضوع

الله يسلمك