تعودنا على مواضيع التقارير نذكر الإيجابيات والسلبيات والملاحظات ....... الخ لكن هالمرة بيكون الموضوع سواليف وخواطر !
أنا رجالـ(ن) أحب البِك أب الأمريكي ( سيلفرادو ، رام ، سييرا ، فورد f150 ) ورزقني الله بشيفرولية سيلفرادو 2013 غمارتين LT مواصفات Z71 شريته قبل تقريباً 6 شهور وكان ودي اشتري السيلفرادو 2014 الشكل الجديد لكن سعره حااار وغااالي باللحييييل وكنت اراقب السعر بشكل شبه يومي في أمريكا وقلت سعره بيكون عندنا أيضاً مرتفع وراح يستمر مرتفع لمدة طويلة ! وبشكل عام ما أحرص على الأشكال الجديدة لأن الدفعات الاولى تكون غالباً تجارب وفيها ملاحظات !
هذا موتري ( ماشاء الله تبارك الرحمن )
اول ما وصل السييرا والسيلفرادو الشكل الجديد للمملكة بصراحة انبهرت فيه كما انبهر غيري ! وتمنيت لو سعره أقل لكن ربك يحكم ما يريد ..
سمعت وقرأت كثير عنه وعن التطورات اللي فيه وحبيت أجربه بنفسي والحمد لله لقيت عند محل تأجير سييرا 2014 شبه جديد ستاندر غمارتين 8 سلندر ماشي أقل من 4آلاف كيلو فقط ! واستاجرته بسعر 675 ريال لمدة يوم فقط وكان التجربة داخل المدينة ( الرياض ) ..
وهذا موتر التجربة
كنت أقارنه بالموديل اللي قبله 2013 وأقل بما أني امتلك سيلفرادو 2013 ومعروف ان السييرا والسيلفرادو سيارة وحدة والفروق أشياء بسيطة بشكل الشمعات والشبك ...
خلوني أبدأ بمفاجأة انصدمت فيها بالسييرا واللي هي :
[COLOR="Blue"]الموتر ثقيييييل دم !
يعني موتري 2013 أحسه شوي ثقيل نفس مهوب مثل الفورد والرام
لكن لو أقارنه بالموديل 2014 يطلع خفيف نفس !
السييرا والسيلفرادو 2014 اذا دعست على الدواسة كأنك داعس على بلكة!:blue: الدواسة ثقييلة جدا !
ثقيل بشكل يفقدك متعة القيادة خاصة بالسرعات المنخفضة والشوارع اللي فيها سيارات كثيرة !! وهذا عيب مهوب بسيط ! يذكرني بالكابرس الصابونة موديل 91 . 92 . 93 ! وكنت أقول بيني وبين نفسي أجل وش بيكون لو أشغل الدبل وأطعّس عليه !
صوت السلف صار مثل الكابريس !
شكله سلف استرالي :bigggrin:
إذا تحدثنا عن الديكورات الداخلية فإن الموديل الجديد 2014 يتفوق بمراحل على الموديل 2013 وأقل .. جودة وتحس ان شغل متعوب عليه ! وتخشيبة الباب جميلة ....
الدركسون أعجبني ....سميك ومخيوط خياطة جميلة ..
العدادات رائعة وإضاءتها بالليل مميزة ...
بالنهار
بالليل
المقاعد أصغر حجم من الموديل السابق لكن أكثر ليونة وراحة ..
الثبات بشكل عام متشابه لكن بالمنعطفات يتفوق الـ 2014 بشكل ملحوظ .. وعند السرعات العالية تحس بمتعة قيادة أكثر من الموديل 2013 وأقل ..
الشاشة والأمور التقنية متطورة جداً لكن المسجل معقد شوي ! .....
بس شاشة التوقف رايقة :bigggrin:
الإضاءة الداخلية أصبحت بيضاء ! بس فاشلة ! ضعيييفة !
فيه ميزة التنبيه بسرعة معينة غير السرعة اللي حنا خابرين 120 يعني تقدر تبرمج سرعة 80 بحيث لو تتعداها يعطيك تنبيه ..وهذا مناسب عشان ما يلقطك ساهر ! ولا تتعارض مع برمجة السرعة 120 كلم الثابتة ..
شاشة الكاميرا ما أعجبتني كأنها مهيب صافية مع العلم ان الكاميرا كانت نظيفة ..
المساحة الخلفية أصبحت أكبر والمقعد الخلفي أكثر انحناء للظهر ..يعني اللي بيركب بالخلف يلاحظ راحة أكبر من الموديل السابق ..
شركة جي إم كانت تقول أن العزل اختلف كثيراً .. وأنا ما أشوف اختلاف .. نفس الموديل السابق ...
مدري ليش حسيت السيلفرادو اللي معي 2013 أصغر حجم والسيطرة عليه أسهل من الموديل 2014 خاصة بالزحمات !!!
بالنسبة لقوة المحرك ... حسيت ان الموديل 2014 أنشط ..خاصة اذا دعست بعد سرعة 100 كلم تحس الموتر يفز والدعسة مليانة أفضل من الموديل السابق ..
بالسرعات العالية تحس بمتعة أكثر من الموديل السابق ...!!!
فيه شي غريب .. السيارة فيها خمس أدراج :bigggrin:
علامة جي إم سي بعد ماكانت اسفل باب الصندوق وحجمها صغير ... صارت مثل الشفر حجم كبير بوسط الصندوق ...
بشكل عام الموديل الجديد أفضل من الموديل السابق ...ولو خيروني بينها ابختار الجديد وابتحمل ثقل دمه من أجل الميزات الأخرى !
أتمنى انكم تستفيدون من تجربتي .. ياليت اللي جربه يتحفنا بتجربته :)
وهذا رابط موضوع شامل بالصور كتبته سابقاً عن السييرا الغمارتين والغمارة ..
http://www.assayyarat.com/forums/thread274113.html[/COLOR]
