الفروقات بين 2012 و 13 في سوبارو ليجاسي ؟

أولاً قبل كل شيء ، أشكركم جزيل الشكر على نصائحكم و إهتمامكم بالمشاركة ، و يعلم الله أني مقدر كل نصيحة جات من طرفكم ،،،

الشيء الثاني الموضوع تخش فيه خصائص شخصية و نفسية ، و أنا من الناس اللي تنفر من الشيء المنتشر ، و شفت السوبارو مع بداية الجيل الأخير و قريت موضوع أبو أسد الله ييسر أمره وين ما كان ، و اللي شرح فيه مواصفات الليجاسي بشكل مفصل و قريت ردود الأعضاء في مختلف الموضوعات عن السوبارو و صارت بالنسبة لي مثل الهوس و السبب عشاق هالسيارة ! ، طبعاً كنت بأشتريها من البدايات قبل 3 سنوات أو أقل بقليل تقريباً بس دخلت في شوية متاهات و ما تيسرت الأمور أما الآن فتوقرتلي سيولة لشراء سيارة جديدة و قلت جت الفرصة ، و بصراحة الكامري أنتم عارفين ما يحتاج أضيف شيء .. و الأكورد منتشرة غير أنها ما دخلت مخي بغض النظر عن كفائتها و جودتها و اللي متحققة مع الهوندا بس المسألة يحكمها الذوق هنا ، أما المازدا أحسها فقاعة مواصفات و شكل بس ما ندري وش يصير بعدين ، و أنا بصراحة ما أكذب عليكم ما عندي خبرة في السيارات و لا أنا مهتم كثير من الناحية هذي ، بس شفت السوبارو ليجاسي و بصراحة أحسها متميزة و شكلها بالنسبة لي أفضل من المنافسين متفوقة حسب وجهة نظري على المازدا غير أنها أقوى و أكثر متانة من المنافسين برضو حسب ما قرأت من خلال متابعتي للأعضاء هنا و في سوبارو السعودية ،،،

طبعاً عندي خيارات ثانية بس الأولوية لليجاسي ، بالنسبة للياباني قلبي ما يطاوعني آخذ إلا هي ، بس ممكن أتنازل عنها لصالح سيارة أمريكي ، و بصراحة بحثت عن الدوج تشارجر و لقيت فيها شيء من هوى بس سعرها مرتفع حبتين ولا أدري إذا المبلغ اللي بحوزتي يوفرلي مواصفات جيدة ,,,,

أما بالنسبة للوكلاء فحسب ظني أغلب الوكلاء سيئين في الصيانة و من النادر أن تجد شخص يروح أي وكالة و يكون مبسوط منهم وبالنسبة لقطع الغيار ما دام السيارة جديدة ما أعتقد بأحتاج قطع غير الإستهلاكية لفترة من الزمن فليش الخوف !! أما لا قدر الله صار حادث أو شيء عندها لكل حادث حديث !!

أخيرا أنا مقدر كل التقدير مشاركتكم و أخجلتموني بتواضعكم و نصائحكم موضوعة بعين الإعتبار وغالية علينا و اللي عنده إضافة بعد كلامي ما ننحرم منها بإذن الله

بالتوفيق للجميع

الله يعافيك ارستقراطي بس كتبت للرجال انا بوضوح لو مره ناوي تشتري خذ لك ماشيه قليل تخسر من قيمتها الكثير .

ياصاحب الموضوع يعلم الله اني ما ادخل مواضيع سوبارو الا لنصيحة كل من اقبل على شراء هذي السياره بصرف النظر عنها بسبب اللي شفناه من هذا الوكيل حسبي الله ونعم الوكيل فيه
ولاحظ ان كل اللي نصحوك بعدم الشراء هم من ملاك سوبارو ومافيه شي اسمه يقولون كلها تجارب حيه
ولعلمك كل اللي نصحوك بالابتعاد عن سوبارو يحبون لك الخير وراحة البال جزاهم الله خير واسأل الله ان يجعل نصائحهم في البعد عن سوبارو في ميزان اعمالهم
وبعدين يا اخي الكريم ودي انك تتريث شوي وتاخذ كل مواصفات سوبارو وتقارنها بكل منافسينها واظف على ذلك مقارنة اسعار القطع مع ان الاغلب غير متوفر واسعار السيارات
واسأل الله ان يكتبلك الخير في امرك ويصرفك عن السوبارو

اولا ً الله يعافي الاخوان اللي فوق وماقصروا بصراحه
ثانيا ً الرجال خلاص جازم على السوبارو ما بأذنه ماء ,, لا تعيفونه فيها

ثالثا ً كل وكلاء السيارات سيئين بالمملكه ولا يوجد وكيل عليه الكلام نهائيا ً
قد نفاضل بين الوكلاء من ناحية توفر قطع الغيار ونقول هذا افضل من هذا بوفرة قطع الغيار فقط ..اما بالصيانه والالتزام بها عند وجود اعطال مصنعيه فترة الضمان
فكلهم بالهوى سوا سيئين لابعد درجه ومماطلين ولا يوجد من يردعهم !

عموما ً الله يقدم لك مافيه الخير يا صاحب الموضوع و اولا ً واخيرا ً الاستخاره خير وسيله للبت بالقرار والخيره فيما اختاره الله

اما بالنسبة للفروق لا يوجد لدي اي خبره ولكن ماحبيت ادخل الموضوع و اطلع وانا مارديت واعذرني على تقصيري

ذكرت في ردي ان الفرق في ظل الاداء المتطرف( كأنك في سباق مثلا وتدفع السيارة لا قصى حدود الاداء ) في الحالة هذي نعم في فرق وكبير لكن في الاستخدام العادي لا يوجد فرق البته وجميعنا نستخدم السيارة للوصول من مكان لمكان وليست للسباق لان الشارع ليس المكان المخصص لهذا النوع من الاستخدام .

مثل ما قالوا الاخوان الوكيل تعبان
لكن كسيارة فهي مميزة اذا بتاخذها اشتر 2011 او 13
معليش AL_waf ما ينفع تقارن دفع رباعي بامامي
صح في الكترونيات تساعد في الثبات لكن يظل الفرق كبير
في خيارات كثيره غير الليجاسي الالتيما الجديدة لكن الوكيل تعبان ايضا
لذلك ارشح المازدا 6

انا مجرب ثلاث سيارات سوبارو وان كنت تبي الحق ابتعد اذا ما عندك قدرة تحمل مراوغة الوكالة في الصيانة .

بعدين خليني انبهك على شيء مهم انت غافل عنه ترا السيارات الثانية المازدا مثلا نزلت موديل 2014 وخلصت ! من روعه السيارة كشكل ومواصفات وسعر ومحبين السيارة ينتظرونها على جمر علمني انت تشتري سيارة قديمة سنتين ليه ؟؟؟؟؟ !! وبسعر خيالي .

تبي اعلمك العروض كيف تصير اخوي امس استلم سيارته موديل 2013 مازدا سته تخيل كم سعرها ؟ 56 الف شايف العروض كيف ؟
هذا اللي بيسوي عرض لعلمك انا مو مع المازدا ابدا واكرهها لكن انا ضد انك تشتري سوبارو قديمة سنتين بسعر غبي 91 الف .

.
ولا تغرك اضحوكة الدفع الرباعي لان حنا ما بنسابق بالسيارة وبالنسبة لثبات السيارة في الطريق الهوندا اكورد والمازدا لهم ثبات مقارب تماما لثبات الليجاسي الجديده واكرر الجديده وليست القديمة . ولو تحب تجرب سيارتي تفضل أي وقت انا من الاحساء وعندي ليجاسي جي تي
ومليانه اصوات ومشاكل والوكالة اذن طين واذن عجين بل قالوا لي اكثر من مره هذي طبيعه السيارة :)

لو كل كلامي ما نفع فتش لك في حراج على سوبارو ماشيه قليل تلقاها نازله في السعر 35الف وفوق نفس ما شريت سيارتي انا نازله 37 الف من قيمتها وكانت ماشيه 4000 كيلو وقت الشراء واشتري لا تاخذ وكاله ابدا نصيحة اخ لأخ وهذا الرابط فيه مثال .
http://haraj.com.sa/112457178/سوبارو_آوت_باك_/

اعتقد سعر السيارة وكاله لايقل عن 115 الف اذا انا مو غلطان واتصلت قبل شهر ونص عليه لان الاعلان محدث وقالي انه بيبيع السيارة بـ 80 الف.
راجع نفسك واستخير وشوف اللي يصلح لك . والله يوفقك