قبل أسبوع تقريباً وفي فرع شركة الجميح بالحمراء على طريق الملك عبدالله في الرياض وضعوا سعر خاص على سلفرادو 2013 مواصفات LT دبل Z71 وكان السعر : 94 ألف ريال شامل كل شي مع هدية .
كان سعر خيالي جداً ، واستخرت الله ودفعت المبلغ كامل وقالوا تستلم سيارتك بعد كم يوم .
بعد يوم اتصل مندوب الشركة وقال ان فيه خطأ بالسعر وسعره الحقيقي : 103 ألف ريال ، اما تدفع الباقي او تستلم مبلغك .
بعدها احترت ، هل من حقي رفع شكوى ضدهم بحيث استلم السيارة بناءً على السندات اللي معي او لا .
اتصلت على حماية المستهلك وشرحت لهم القصة وقالوا : إذا كان السعر معروض على السيارة ما يحق لهم يتراجعون أبد .
مريت مدير الفرع وقال الموضوع عند مدير عام المبيعات بشركة الجميح الأخ عبدالعزيز البداح .
رحت للأخ عبدالعزيز وقلت له وش السالفة ؟
قال : بكل أمانة وصدق فيه خطأ من الموظف وليس تراجع من الوكالة عن السعر وإذا قدمت شكوى ننتظر وش يقولون حماية المستهلك .
حماية المستهلك ما قصروا ووقفوا معي وقالوا لك حق فيها ، لكن بما أن الخطأ من موظف وراح يتحملها الموظف تقريباً 9 الاف ريال ، قفلت الموضوع وقلت رجعوا لي المبلغ كامل ما ابي السيارة ، وشبهت الموضوع بأني أروح للبنك وأطلب من الموظف مبلغ عشر آلاف ريال ويعطيني بالخطأ عشرين ألف دون خصم من رصيدي ، هل يحق لي آخذ المبلغ الزايد ؟؟ طبعاً لايجوز .
أنهيت الموضوع بدون مشاكل ، والغريب اني الوحيد اللي لحق على السعر وما فيه أحد اشترى بهالقيمة غيري !
لو كنت مكاني هل ستطالب بالسيارة وتجعل الموظف يتحمل خطأه أم تفعل مثل ما فعلت أنا ؟؟
