الموضوع لأهل الخبره فقط .. محتاج رايهم ونصيحتهم

السلآم عليكم جميعا

كل سنه وانتو بخير ومبروك علينا رمضان عسى الله يعيننا على صيامه وقيآمه ..

هذا اول موضوع لي بالمنتدى .. سيده من تم اتمام التسجيل الى كتابه الموضوع بشكل تلقائي وسريع
انا كنت طالب مبتعث والحمدلله رجعت لارض الوطن وتخرجت ب شهاده بكالوريوس من هناك .. عارف ان بيجي ببالكم تعليق ان طيب وش يعني !؟ بيبين مقصدي بس انتظرو شوي ! :)

زي ماقلت فوق رجعت للسعوديه لي اسبوع .. وزي اي شخص بمكاني بعد الاستقرار ( لحد ما) يبي يشتري سياره له بدال ماكان يستخدم سياره العايله او سياره ابوه او ع الاغلب اجاااار طول مده جلوسه بالسعوديه في الاجازات ...

انا مخطط اذا الله كتب بأن اكمل الماستر بس بأجلها للسنه الدراسيه 2014-2015 ! يعني موب هالسنه اللي بعدها ! يعني بآخذ بريك السنه الجايه واذا كتب لي الله وظيفه وارتحت فيها وع مستوى التعب والجهد اللي بذلته ( بعد الاستخاره ) بأكنسل فكره الماستر او اتوظف وظيفه واستفيد منها ك خبرره الى مايجي وقت سفري واقدم استقالتي واسافر او شكلها مافي وظيفه اصلا ولايحزنون :) ..

الحين بادخل في صلب الموضوع .. عارف ان قرقي فوق ماله معنى واعتذر لكم بس عشان توصل لكم الفكره كااامله ع حالتي ..

بعد تفكير من قبل ارجع قررت اني اشتري سياره مستعمله ممشاها قليل ونظيفه وانا من الاصل افكر اني اشتري BMW الفئه الخامسه جديد وكاله .. بس بسبب ظروفي اللي ذكرتها ( بالتفصيييل ) فوق اشوف من الافضل ان اشتري مستعمل ونظيف واستخدمها سنه ومده دراستي للماستر اللي هالمره بتكون في امريكا بتكون سنتين ( اذا الله يسرها ) واكيد يتخللها اجازات وباجي .... والى مااتخرج نهائيا وارجع السعوديه ..

عاد وقتها يا استمر بالسياره او ابيعها واشتري وكاله وهذا الموضوع بأجل التفكير فيه ل وقتها اذا الله اعطانى عمر ..

الغرض من موضوعي .. ابي استشارتكم ، رايكم ، نصايحكم .. الافضل لي .. وهل انتو معاي او لا ..

والاهم من هذا كله اني اعرف السياره ومجرّبها سايقها لاني مره اخذتها اجار .. فعلا ماشاء الله رااائعه بكل المعاني من ناحيه الراحه القياده الفخامه وكل شي .. بس اللي محتار فيه ان بعد تفكير زي ماقلت اني باشتريها مستعمله ولأكثر من فايده وانتو عارفين اكثر ..

اول شي .. ان سعرها بأوفر من قيمتها جديد وكاله تقريبا 30000 - 40000 ريال موديل 2012 ! ببحث سريع سويته طلعت الأسعار ل BMW بين 520i , 525i ممشاها تحت ال 50000 كيلو بين 135000 - 150000 ..

ثاني شي .. انها بتجلس سنتين بيكون استعمالها قليل بسبب سفري لأمريكا وهذا بحد ذاته ( يقهر ) اذا كانت سيارتك جديده وكااله صراحه ! ماادري يمكن انا بس احس بتأنيب الضمير من قبل اصلا ماتجي السياره « متحمس هههههه

ثالث شي .. اذا بابيعها مثلا بعد 3 الى 4 سنوات .. ( مااتوقع ) انها بتنزل عن ال 95000 ريال مع ان سمعت السيارات الالمانيه المستعمله عليها الف علامه استفهآم !! وهذا بحد ذاته شي جميل .. انا كنت متوقع انها بتنزل عن ال 60000 ريال مثلاً !! لان لقيت الان BMW نفس الفئات 2007 في احد المواقع وصل السوم الى 98000 ريال تقريباً !

ياليت اللي عنده راي يفيدني واكيد يفيد كثير زي حالتي موب لازم يكونون مسجلين بالمنتدى يقرون ويستفيدون ..

وفي كم عضو بدون ذكر اسامي بصراحه يحملون قلم مميز ورؤيه وفكر ملم لأصغر الامور من خلال قرآئتي ل ردودهم ومواضيعهم ( في هالقسم ) واتمنى من كل قلبي القى لهم تعليق او نصيحه ..

ماابي اقول اسماء معرّفاتهم بيشوفون نفسهم بعدين ونتوهق بهم ههههههه

اتمنى اني مااطلت بكلامي بس حبيت اقول كل اللي بصدري وارتاح ..
ع فكره ؛ وقت شراء السياره بيكون بعد العيد .. يعني عندي وقت افكر واسأل واستخير واصلا ابوي مسافر وموب راد الا بعد العيد ان شآء الله ..


سبحآنك اللهم وبحمده اشهد ان لا اله الا انت استغفرك واتوب اليـــكـ ..