الحمد لله والصلاه والسلام على اشرف الانبياء والمرسلين ..
قبل اسبوع تقريبا قمت بزياره لمصنع ومتحف فورد في ولايه متشغن في مدينه ديرنبورن
( طبعا انا ما دخلت الا المصنع لانه ماكان فيه وقت لزياره المتحف )
بصراحه الزياره استفدت منها كثيير
بس للاسف ما قدرت اصور كثير لانه ممنوع التصوير باغلب الاماكن + ماكان ببالي اني بنزل موضوع هنا :bigggrin:
بالبدايه قيمه تذكره الدخول للمصنع هي 15 دولار وهو مبلغ رمزي مقابله بالي بتشوفه قدام
..
تشتري التذكره من المتحف وتروح تركب الباص الي ينقلك للمصنع وتقريبا المسافه بينهن حوالي 10 دقايق بالباص ..
وهذي صوره لتذكره الدخول
طبعا زياره المصنع تتكون من 4 مراحل
اول ما تدخل المصنع قبل تدخل المرحله الأولى هي عباره عن مجموعه من سيارات فورد موستانغ الكلاسيكيه + الهيكل الداخلي والمحركات لسياره فورد F150 Raptor الي هي احد سيارات فورد الجباره + سياره فورد F150 Raptor للعرض وتقدر تركبها وتتفحصها يعني زي الدعايه :bigggrin:
وفيه متجر فيه ملابس وتحف وهدايا عليها شعارات فورد وموستانغ وزي هيك :rolleyes1:
..
المرحله الآولى من مراحل الزياره هي عباره عن فلم وثائقي عن حياه هنري فورد وكيف بدأ والمشاكل الي واجهته خلال مسيرته في المصنع
طبعا عباره عن 3 شاشات بروجكتر تعرض لك الفلم
طبعا الفلم رائع جدا ويلخص لك حياه فورد من بدايته حتى اللحظه الحاليه
مده الفلم التقريبيه 15 دقيقه
..
المرحله الثانيه هي عباره عن عرض لطريقه صناعه السيارات ولكن بطريقه مختلفه جدا
عباره عن كرسي يدور 360 درجه بغرفه فيها حوالي 8 شاشات كبيره موزعه بشكل دائري وموضوعه بطريقه غريبه .. طبعا اقرب ما يكون له فلم وثائقي .. ولكن العجيب في الامر انه يعيشك الجو كأنك في وسط الفلم .. كذلك فيه مؤثرات حسيه وصوتيه وبصريه في الغرفه
كمثال من ضمن الفلم يجيبون لك حديد مصهور ينسكب بزي الفرن لتشكيله .. اثناء عمليه السكب تشعر بهواء حار جايك من جميع الجهات
كذلك فيه لقطات عمليه لحام حديد .. المؤثرات البصريه تخليك تحس ان التلحيم بوسط الغرفه
ومن ضمن العرض لقطات لعمليه رش البويه على السياره .. اثناء الرش تشعر برذاذ او شي مثل كذا .. يعني تحس انك جالس بالسياره وهم يصبغون البويه
طبعا الوصف غير الاحساس ومهما وصفت ما راح اقدر اوصلكم للواقع الي عشته ..
المرحله الثالثه طبعا عباره عن لوحات فيها معلومات عن سيارات فورد (( طبعا هالشي هذا ما يستهوي السعوديين مدري ليش :bigggrin: يمكن لاننا نحب الاكشن اكثر :bigggrin: ))
المرحله الرابع عباره عن المصنع الخاص بسيارات الـ F150
طبعا ممنوع التصوير وممنوع انك تكلم بالجوال حتى ..
واخوكم في الله كان داخل يكلم بالجوال ولا كأنه فيه قوانين .. فجأه طلعت لي وحده من تحت الارض مدري من وين جت .. تقول آآآآوت نو سيل فونز هير قوو اوووت نآآآآآو :8a120(65):
انا انلخمت الصراحه :bigggrin: طبعا طلعت وخلصت المكالمه ورجعت
قبل تبدى الجوله بالمصنع تعطينا القوانين .. ممنوع التصوير ممنوع انك تكلم وتلتفت علي وتقول مثل ما انت عارف من قبل :bigggrin:
..
طبعا بالمصنع ما يخلونك تمشي خطوه خطوه .. يعني اول ما دخلنا كانو يركبون القطع الموجوده بين الكبوت والقزاز الامامي ( قطعه الفيبر الي تجي بين الكبوت والقزاز )
بعد ما تمشي شوي يجون يركبون العوازل الي تحت الارضيات ..
بعده بشوي تحصلهم يركبون الابواب ..
بعده بشوي تحصلهم يركبون الصندوق بالغماره
بعده بشوي تحصلهم يركبون القزاز
يعني موب خطوه خطوه واتوقع انه مقصوده الحركه عشان ما يكون فيه احد يسرق استراتيجيتهم بالشي هذا << مجرد توقع :a120(74):
طبعا كل شوي تجيك لوحات فيها معلومات عن المصنع وزي كذا
من المعلومات يقول لك لو تم صف السيارات الي يصنعها المصنع بسنه ( الصدام بالصدام ) بتاخذ مسافه من المصنع لنيويورك .. تقريبا المسافه حوالي 1000 كيلو متر ..
..
بصراحه زياره المصنع ما كنت متخيلها بالشكل هذا .. يعني فوق ماكنت متصور :rolleyes1:
..
في الختام ان اصبت فمن الله وان اخطأت فمن نفسي والشيطان
واحب اعتذر عن عدم وجود صور :smile:
والسلام عليكم ورحمه الله وبركاته
