قناة السيارات
السلام عليكم ورحمة الله وبركاته
حياكم الله يا شباب في الموضوع .. وهو باختصار شديد راح اكتب فيه رأيي وتقييمي للمازدا CX9 2011 بعد صيانة الـ 10000 كيلو
أول شيء أنا ما كنت ناوي على مازدا ولا هي في راسي ولا شيء .. كنت محتار بين الفورد ايدج ليمتد 1 وبين الترافرس والاكاديا .. وكانت معهم كم سياره في البال منها الاكسبدشن والتاهو ..
المهم بالصدفه دخلت معرض مازدا لسبب واحد فقط .. هو ان أكون غطيت جميع السيارات حتى اقدر اختار بعد ما شفت كل شي ...
اول دخلتي كانت على CX9 فل سعره وقتها كان 135 الف .. شدني في السياره :
1- رحابة السيارة من الداخل (الترافيرس اوسع منها شوي)
2- جودة الصنع والفخامه .. بالذات الازارير .. والمقاعد (اجود من مثيلاتها بمرااحل)
3- أخلاق موظف الوكالة (احسن من كل وكاله رحت لها كني بشحت منهم سياره - ما عدا وكالة فورد)
4- سعرها المغري ..( بالمقارنة مع الترافيرس والاكاديا الفل)
المهم استخرت وكانت من نصيبي اخترت اللون الأبيض والداخلية بيج بسبب جونا الاوروبي خخخخ
نبدأ بالعيوب :
1- السرعه محدده على 160 كلم/ساعة... صحيح ان السرعه خطر ومدري ايش بس 160 قليله وكم مره احتجت سرعه اكثر بالذات في السفر ..
2- ناشفه في المطبات والحفر , يمكن لها علاقه في الجنوط (مقاس 20) .... لكن اتعودت عليها .. واللي متعود على الياباني يمكن ما يلاحظ .. انا لاحظت لان عمري ما سقت ياباني
3- ماهي اقتصاديه في استهلاك الوقود
4- السياره تتعب في المدن .. بمعنى انها ما تتحمل المشاوير الكثيره وخاصة اذا بتتطفيها وتشغلها كل شوي .. (هذا رايي)
5- الفرامل .. تحسها مصممه لسياره اصغر من CX9
6- فتحة السقف صغيره نسبيا .. بالمقارنه مع سيارات اخرى .. بس ما تحس بالفرق
7- لمبات الطبلون جابتلي صداع اول كم سفره.. لكن الحين الحمد لله تعودت ... اللون الاحمر قوي ياخي خخخ
8- مافي مكيف للصف الثالث.. المشكله فقط يبيلك وقت لين ما تبرد .. لان ما شاء الله مكيفها قوي جدا يعني لو تخلي السياره ربع ساعه شغاله بالمكيف قبل لا يركبوها عيالك .. ما عندك مشكله
9- ما فيها تبريد مقاعد ... رغم ان فيها تدفئة مقاعد .. (ناقصين حنا) صراحه ما استفدت منها الا اني امقلب في العالم خخخخ ... شغلها وخويك جالس تلقاه يتململ في جلسته بعدين يبدا يتافف بعدين يقوي المكيف .. اخر شي يقولك ياخي وش ذي الحراره خخخخ
10- ما تقدر تفصل التراكشن
11- المسجل رغم روعته الا انه مافيه فتحة يو اس بي ... ولا يشغل دي في دي
اول ما اخذتها كانت فيها مشكله في المكيف .. سوولها برمجه وانتهى الموضوع الحمد لله
صراحه اشوف العيوب بسيطه وما تستاهل بس انا حبيت افصل تفصيل ممل
المميزات كثيييره جدا جدا .. منها:
1- الجودة ... اعطيها 10 من 10 .. اتكلم عن جودة الطبلون والدركسون والازارير والمقاعد .. الداخلية بشكل عام
2- المحرك قوي ونشيط ما شاء الله .. هذي اقولها وانا وااااثق .. جربته في طريق الكر (مكة – الهدا) يمكن 10 مرات .. طياره ما شاء الله والسياره معبيها فل وفيها 6 اشخاص ... طياااااره
3- الجربوكس رهييييييب .. بالذات التبترونك .. متعه متعه
4- مقاعد مريحه جدا رغم انها ناشفه شوي (مثل ما قلت اللي متعود على الياباني يمكن ما يلاحظ)
5- مريحه جدا جدا جدا في السفر .. لو تمشي 100 ولا 160 كله واحد ما شاء الله
6- المناوره فيها سهله وكانها سياره سيدان ... والثبات رائع... ما تحس ابد انك في سياره كبيره
7- واهم شيء بالنسبه لي ان رغم كل الموصفات الا ان سعرها مناسب جدا 135 الف
8- الوكيل جيد .. اخلاق + صيانه سريعه + دقه في المواعيد (المدينة المنورة - فرع طريق المطار)
اسعار الصيانه ..
1500 كيلو مجانا
5000 كيلو 250 ريال
10000 كيلو 450 ريال
40000 كيلو 1500 ريال
يعني كل 5000 كيلو بـ 250 ريال
وكل 10000 كيلو بـ 450 ريال
وكل 40000 كيلو بـ 1500 ريال
وسلامتكم
.gif "A120(86)")
.gif "A120(121)")
رد مع اقتباس
المشاركة الأصلية كتبت بواسطة C A R R E R A
