السلام عليكم ورحمة الله وبركاته ......... بداية أهني جميع القائمين على هالمنتدى الرائع اللي عرفته بالصدفة لما كنت أبحث عن حل لمشكلتي ولكن لم أجد الحل في الانترنت بشكل عام ولكن عجبني هالمنتدى بكل ما فيه وقررت أطرح مشكلتي السابقة في سيارتي وحلها ليكون في رفوف مواضيعكم التي قد يحتاجها أي أحد في وقت ما
باختصار سيارتي (بيوك رود ماستر92) ظهرت فيها مشكلة منذ فترة وهي عندما أشغل السيارة تبدأ السيارة تزيد من صوتها وتهدأ كأن فيه أحد يدوس بنزين ويهدأ خاصة إذا كانت السيارة باردة تجلس على هالحال 5دقايق او10دقايق لحد ما تسخن السيارة بعدين تضبط يعني بمعنى لما اشغل السيارة تشوف مؤشر RPM مرة فوق ومرة تحت يرتفع وينزل والصوت زي كذا(( آن آن آن )) :)
المهم لفيت كل مكان عجزت أحصل لها حل وقررت إني أهمل هذه المشكلة لانها مو عائق بالنسبة لي بس قلت خليها على كيفها مع العلم انه احيانا لما تكون السيارة باردة وامشي وهي تسوي هالحركات ههههههه لما ادوس بنزين بسرعة واجي عند اللفة ابي اهدي ارفع رجلي بسرعة عن البنزين تطفئ السيارة
لكن بعد فترة ليست بالقليلة سنتين او أكثر مؤشر الRPM بدأ لما ادوس بنزين ينتفض وتحسه مو ثابت معاك بالطريق قلت لازم اشوف له حل ورحت لكهربائي قالي الديلكو منعدم عندك غيرت الديلكو وماضبطت المشكلة ورحت لورشة ثانية وكسر لي السلف الله يكسر راسه وما ضبطت المشكلة قالوا لي بلف الهواء وغيرته ما ضبطت المشكلة
قالوا مالك الا فحص كمبيوتر رحت بفحص قالوا سيارتك92 موديل قديم مالها فحص كمبيوتر
المهم وبعد جهد جهيد دخلتها ورشة (القرعاوي) في بريدة وقلت له مشكلتي القديمة وهي انه لما اشغل السيارة كانك جالس تدوس بنزين ومؤشر الRPM مرة فوق ومرة تحت كانه فيه احد يدوس بنزين ويرفع رجله ويرجع يدوس وهكذا مع المشكلة الجديدة صارت فيه كتمة بالسيارة وتقطيع لما ادوس على البنزين بسرعة .......... وش طلعت المشكلة؟
الحل : قالوا لي لازم تسوي تصفية الكترونية المكينة شغل اليد فقط 400ريال بدون قطع الغيار
ومع قطع الغيار غيروا لي بواجي + اسلاك بواجي+فحمات بواجي + طرمبة البنزين
وبعدها راحت المشكلة اللي جلست ألف فيها مليون ورشة وما لقيت الحل
كلفت علي قرابة 475 قطع غيار+400شغل يد = 875 ريال
علما اني خسرت اشياء كثيرة وانا احاول احل المشكلة وبلا جدوى
طرحت لكم الحل في رفوف موقعكم الراقي أملاً في فائدة أكبر عدد من أخواني اللي قد تصادفهم هذه المشكلة العويصة وأي أحد يستفيد من مشكلتي وحلها لا يبخل علي بالدعاء في ظهر الغيب وانا ترى ما سجلت عندكم إلا الحين عشان أكتب لكم حل هالمشكلة عشان يكون هالمنتدى موسوعة متكاملة عن المشاكل والحلول
تقبلوا فائق تقديري واحترامي والسلام عليكم ورحمة الله وبركاته
