اللي منتظر الاكسبلورر 2011 يطلب الله مو نازل الا 2012

[بندر الرياض]

صبحكم الله بالخير


مررت بوكالة فورد بالرياض لأخذ العلم الاكيد عن الاكسبلورر 2011


وتعبت الين وصلت مدير الصالة وازعجته بالاسئلة


قال بكل صراحة

ماراح ينزل الا بعد 8 شهور !!


قلت ليش اعلنو عنه طيب

قال تجارب ودعاية وماراح يجيك هنا الين مايجي امريكا لازم السيارة يكون لها اختبارات

قلت والزبدة

قال قبل 2012 لاتفكر

يعني بينزل بموديل 2012

وقلت طيب 2011

قال ماراح يجي ماعاد فيه الا 2010 وان جت دفعه منه بتعتبر 2011 لانه موقف الشكل القديم انتاجه اصلا !!

قلت فمان الله

وصراحه تحطمت

ابي سيارة عائلية وكنت مأجل الشراء لاجل الفورد

والحين تورطنا

صبرت وبالاخير لازم اصبر حدود السنة

وماني عارف وش آخذ بديل

التاهو واليوكون ملينا منها وماليه البلد واكيد بتتغير وما احب اخذ سيارة بتتغير

ونيسان كلما فكرت اشتري منها حاجه الناس هاتك ياسب فيها وخوفونا

اما تويوتا فالجيب سيارة مميزة ولكن من شفت مواصفاته ابو 177 الف وانا تحطمت لازالت التويوتا لاتهتم بالتقنيات مع انه موتر لك وللزمن والناس قالوا عبداللطيف يلعب فيها ويغير ويشيل !! وال6 السلندر ماتنفع على جيب ,, وانا حدي الين ال180 الف ما اقدر اتعدى ريال واحد وفكرت باليحي وقالوا ماعنده ضمان !!

والله احترت

ماودي اطلع من التويوتا والفورد ,, واليوكون والتاهو خوفي تتغير شكلها لانها طولت

والبرادو فكرت فيه قالوا دامك وصلت لهالمبلغ اشتر لاند كروزر !!!

لاحول ولاقوة الا بالله اللي يشوفني يقول بيشتري صاروخ !!

مانستغني عن مشورتكم

[رنج كروزر]

ياخوي لا تفوت الفرصة عليك وخذ الشكل القديم طلما أنه مجرب وأسعارة نازلة والجديد بيكون غالي

[أزيــــراوي]

إقتراحي لك إذا إنك مصمم تشتري الإكسبلورر الجيل الجديد إنك تشتريلك حالياً سياره عائليه مستعمله أو جديده تمسك سعرها مثل لاند كروزر مستعمل أو برادو جديد حتى ينزل الإكسبلورر الجديد وبتكون كذا ماتعطلت ولا خسرت مبلغ كبير (رغم إني ضد مبدأ شراء سياره لمجرد إنها تمسك سعرها)




وتحياتي



أخوكم:أزيراوي

[snooop]

لايفوتك دودج دورانجو 2011
بينزل بشكل رهيب واحلا من فورد اكسبلورر
روح موق دوج شوف الدورانجو

[قناص الرياض]

الاكاديا
المازدا cx-9
ترافيرس
و شكلها جديد

كلها ثلاث مراتب و عاائلية

[حبيب الملاييين]

لا حول ولا قوة الا بالله !! زي الـ توريس SHO سوو اعلانات انها احسن من كل سيارات العالم .. واخرتها ما تنزل عندنا ومدري حينزلوها 2011 ولا ما حينزلوها اصلا !!!

ومعاك حق التويوتا مواصفات 0 والأسعار فووووووق !
نيسان مواصفات وشكل وسعر .. وصيانة ولا عندك احد ..!! حتى اللي شغالين فـ الوكالة عارفين الكلام ذا !!

عموما حبيبي عندي لك خيارين مثلهم ما بتلقى !!

عندك دودح دورانجوا 8 سلندر وهيمي ومواصفات وشكل جبااااااار واحسن انه بيضرب سوق ال فورد اكسبلورر !!








وعندك ال جيب (JEEP) جراند شيروكي ... !! من اقوى السيارات العائليه وازيدك الجديد فيه بانوراما !! يعني كامل مكمل !!






وطبعا كلها بتنزل جديده كليا !! وعشان لا تقولي وكيلها ما يمدحونه والكلام ذا انزل الشارع وشف التشارجر والكرايزلر صارت بكثر الكامري والعالم ما تشتكي منه !!

تحياتي والله يكتب لك اللي فيه الخير

[KSA Explorer]

الايدج قالو عنه نفس الكلام .. انه ماراح ينزل الا مع بداية السنه الميلادية الجديدة وقبل شهر او شهرين قالو بعد سبع اشهر من ذاك الوقت طبعا ذاك الوقت كان لسى مانزل في امريكا بس اعلنو عنه ونزل صور له في الموقع الرسمي حتى انهم نزلو اسعار فئاته المختلفة .. الان نزل الايدج في السعوديه (موجود في اوتو مول في جده) يعني تقريبا بعد ثلاث اشهر من نزوله في امريكا .. الاكسبلورر 2011 تم طرح اسعاره في امريكا .. اتوقع والله اعلم انه راح ينزل خلال الشهرين القادمة.. ومدير الصالة اللي كلمته هو اكثر موظف في الصالة يريدك ان تعتقد انه ماراح ينزل 2011 قريبا عشان تفكر في العروض اللي مسوينها والخصومات عشان يبيع اللي عنده .. انا الان ندمان اني ما انتظرت الايدج لان كان نفسي اشتري الايدج او الاكسبلورر لكن كنت مستعجل وطلعت تورس قبل حوالي اسبوعين (رغم انها سيارة رائعة بمعنى الكلمة).. وذاك الوقت كنت اسأل الوكالة يقوللي مستحييييييييل ينزل قريبا لسى كتير أوي..
والله اعلم..

[O.Almazroo3y]

عندك السي اكس 9 روعه والله