ساعدوني في المقارنة بين لاندكروزر في اكس ار و باترول LE 2010

الخيل من ركابها يا volume راعي اللاند كروزر ما يعرف يسوق ياما باترولات غرزت وياما لاندات غرزت كله من السواقين وانا اشوف الفخامه اللاند كروزر والعملي حق كرف النيسان

هذا مستوى الفكسار في البر ولوتشوف السواق كيف يلف الدركسون يمين ويسار شوي شوي ومادعس كثير يعني الاخ ماهو غشيم مره ويوم شافه طلع شوي رجع ريوس بسرعه والحركه هذي لو مسويها احد بهايلكس او ددسن كان طلع:xyxwave:
يعني الفكسار بر ماعندك احد مستواه بس على الازفلت
وبالنسبه للشكل لاتنسون يوم طلع التايوتا 2008 كيف الناس ماتقبلته كثير وراح ابوجميل ولصق عليه شطرطون وحركاته اللي دايم والناس بعدها تقبلوه شوي والموديلات اللي بعدها ماعاد شفت الشطرطون
وانا اشوف مايستر سيارات تويوتا الا الشطرطون وتقدر تقارن بين ددسن بدون شطرطون و[COLOR=DarkSlateGray]هايلكس [/COLOR]بدون شطرطون
وبالنسبه للي يعيش ومايعيش لوتشوف السطحات تلقاها نيسان موديل 80 وتسحب سيارات على الخطوط السريعه وشفتها في خط الهدا (كرى ) تطلع جمسات وجيوب تويوتا من مكه الى الطايف واتحداك تلقى سطحه تايوتا تشتغل على خط الهدا
http://www.youtube.com/watch?v=M6xTg5LOuKE&feature=related

SLOH

ياهلا وغلا

والله ياعزيزي بالنسبة لأنه يعيش ومايعيش فهذا على حسب الاستخدام
يعني في الشوارع تلقى باترول قديم ولاندكروزر قديم كلش
وغير عن كذا راعي المقطع هذا والله انا مدري عنه ولا ايش صار معه
موكل من كتب شي لازم نصدقه
زي مقطع لتاهو ايرباقاته انفكت وهو كان يطعس فيه ويشكي يقول السيارة فيها مشاكل !!
طيب اكيد بيصير فيها مشاكل دام انه استخدامه سيء !


وبالنسبة للشكل من الخلف اتفق معك في هذي النقطة
لكن مومشكلة مستعد اتحمل شكلة من ورا
دام انه واجهته جبارة والبدي حقه جبار
والداخلية جميلة جداً وجنوطة ولا احلى
وراحته وثباته وامانه اعلى من الكروزر
وهذي كلها تخليني اتغاضى عن الخلفية


يعلم الله ياشباب ان كلامي ماني مبالغ فيه
ولكن هذا اللي اشوفه انا
وياليت اللي يشوفني غلطت او زليت في شي يعدل لي

وشاكرلكم التواجد الجميل :)

ياهلا والله بفوليوم
بشويش ياخي على سيارات تويوتا والله مايسوى ههههه


ممم وبيني وبينك انا انسان متشجع لنيسان من بعد ماقرأت المواصفات
وللأسف بحثت عن مواصفات الفكسار
وكل مادخلت موضوع او شي القى عبارة " سعره مو فيه "
والوالد الله يحفظه عاجبه الفكسار وانا حبيت اني اقنعه بالباترول
بس قلت قبل اقنعه اجي استشيركم هنا وباذن الله راح ترسى الشغلة على الباترول

وبالنسبة للسعر ان شاء الله السيارة ماراح تنباع استخدام شخصي بحت
يهمني الامان والراحة لأن السيارة لأهلي وبيكون الحامي بعد الله لهم هي
وكان في التخطيط السكويا
لكن فيه نفس مشكلة الفكسار في الخفة في الطارة
وابو واحد من الشباب قبل فترة سوا فيه حادث وانقلب لكن الحمدلله ربي نجاه والحمدلله انه كان لحاله

والله يارجال مابيعوضك عن راحتك وامانك ولاشي :)

والله يحفظ الجميع يارب
وشاكرلكم تواجدكم



وللمعلومية بس عندي الهايلوكس في اللفات والكفرات جديدة يفحط
بعد ماقدمت شوي صار ماشاء الله يزحف ههههههه
مدري عن الددسن صراحة لكن حبيت اقولكم معلومة :P

نيسان ما يعيش مثل التويوتا أبداً

وغير كذا شكله سقيم من الخلف

وغير كذا وكيل تويوتا أفضل من وكيل نيسان

http://www.youtube.com/watch?v=spHGyKuiNuo

اخوي انا اشوفك جاوبت نفسك يعني موضوعك يسأل عن الرساوه
وانت ماشالله مجرب وشايف ولوتدقق على اللي باللون الاحمر بتلقاك راد على نفسك

شفو حبيبي نصيحه لك اذا مايهم الا السياره كم نقصت من قيمتها فاشوفك تاخذ vxr
اما اذا بتاخذ سياره وبتستخدمها وتنبسط فيها وتتمتع وشكل جديد وقوه وفخامه ورساوهومافيها اكسسوارات صينيه وشغل تلفيق( انا مايضحكني صح غير مسجلات تايوتا اللي ماهي متناسقه مع الديكور الداخلي نهائيا ) فانصحك بالباترول

واحب ازيدك تجربه شخصيه لي مع سيارات تويوتا والناس اللي ازعجونا خذ سياره تمسك سعرها وشيك في الجيب والكلام اللي يجيب الهم
انا شريت سياره عام 2005 من شركه غير تويوتا بسعر 85 الف وفيها زيها من تويوتا بنفس السعر ووجدت معارضه من كثير اللي يقول ليش تضيع فلوسك وحرام تحط ريال برى تويوتا
والحمدلله استخدمت السياره 5 سنوات وانا مرتاح 100% من السياره لان الصراحه اكثر مايمني في السياره الجوده والخامات اللي االسياره مصنوعه منها ولاننسى الشكل احسن من التويوتا
وبالعربي حللت السياره والان السياره اقل سعر من التايوتا ب 5 الاف ريال في السوق
يعني عشان 5 الاف في خمس سنوات يعني السنه الف واحد اشتري سياره ماهي معجبتني ولاداخله مزاجي ولا انا مرتاح فيها في حريقه ال5000

هاللحين وش طاري الشاص ( انا اقصد الفكسار )والا الشاص تراه دينه مع احترامي لك <<<< لاتنسى طيط طيط اذا رجع ريوس
ولاتجي هاللحين وتقول الشاص راسي
وبالنسبه للنسافات فالموديلات الجديده كلها مشكله ما انصح احد يقرب من الارصفه
بس لوتلاحظ الموديلات من ال90 - 97 مثلا بتلقى غير النسافات اللي هو الدعاسات الالمينيوم
مصقعه ومعفطه من بعد النسافه ب30 سم

وبالنسبه للهايلكس اسمحلي اقولك جانبك الصواب في هذه النقطه
يارجل الهايكلس ماتخذ اللفه على سرعه 20 الا وهي تفحط

ابو محمد

مانقدر نحكم ياعزيزي من ناحية الهيدروليك لأن السيارة جديدة
ونظامها مختلف تماما على حسب علمي عن اي سيارة
ومعذرة لكن ماتوقع الفكسار يوصل لنظام هيدروليك الباترول
لأن جربت هيدروليك اللكزس وماتوقع انه نفس الباترول
ورساوة اللكزس طيحته من عيني والله والطارة الخفيفة عيب من ايام اللاندكروزر 99 < اول لاندكروزر نمتلكه
وبنفس السرعة اللي هي 180 تقريبا مجرب واحد من الشباب ثقة رساوة الارمادا كانت افضل من اللكزس
ويعلم الله ياجماعة الخير اني مابالغ لكن هذي الحقيقة
والارمادا 2007 واللكزس 2010
وهذا الشي رفع نيسان في عيني كثير ,


والشاص يابو محمد حالة ثااانية ماحد يقدر يتكلم عليه ;)
ويعطيك خيره ويكفيك شره ان شاء الله


شاكرلكم الحوار الجميل

volume


صح عليك نفس اللي اعرفه
ويعطيك العافية على ذكرها
ومن ناحية النسافات صار هذا الموقف قدامي
لكن سيارة بقيمة الباترول حرام اطلع فيها ارصفة الا اذا كنت مضطر

شاكرلك مرورك عزيزي

ياحيّ الله ابو محمد
وعليكم السلام ورحمة الله وبركاته
مم اول شي السيارة للوالد الله يحفظه
و استخدامه ناعم جداً ماشاء الله ولاهو راعي بر ولاشي
وبالنسبة للارصفة فيه الهايلوكس :P

وبالنسبة للامان اتوقع النيسان افضل
خصوصا وانه ارسى في الخط " من بعد مقارنة بين سكويا وارمادا "
وطارة الفكسار عن تجربة خفيفة مدري عن النيسان اتمنى احد يفيدني في هذي النقطة
والزينون يعتبر من الكماليات ما اهتم فيه كثير
ومهمة نقطة تثبيت الحساست وكذا
واريح في المطبات ما ادري للاسف
وعليكم السلام ,
شاكرلك مرورك الجميل جداً ويعطيك العافية

بعض السيارات..

الحق ينقال.. الهايلكس أرسى أكثر.. وأمان أكثر ..

وش دخل الأحصنة الحين..
الهيدروليك في الفكسار أفضل بكثير من الباترول...

على فكرة أنا معي شاص.. يا كثر ما طامرت أرصفة ولا شفت إلا العافية.. والنسافات مافيه أحسن منها..

مشكور على حوارك

اللي اعرفه ان النيسان ارسى من التويوتا
كمثال في فئات غير فئه السيارتين اللي ذكرتها
الددسن ارسى من الهايلوكس
الباثفايندر ارسى من عديم الرساوه البرادو
200L -240 ارسى من الكرسيدا
الجيب النيسان الموديل القديم باب واحد ارسى من الربع التويوتا
طبعا ذكرتبعض موديلات قديمه متعمد عشان صاحب الموضوع تكونه نظرته اوسع واشمل

وبالنسبه للاخ اللي يقول ان تفجير وركوب ارصفه خذ VXR
لاتنسى ان النيسان 400 حصان
وترى التايوتا تعرفه اذا طلع رصيف من نسافاته تلقاها متقطعه