هل الكامري تهرب زيت

جزاكم الله خير
يعني تنصحوني ما آخذ الكامري
وممكن يقول لا تأخذ يبين لي السبب عشان أرتاح نفسيا لأني خلاص بديت أصرف النظر

هلا بكم رغم اللقافه الزايده فيني سألت واحد من العيال معاه 2003 مطلعها وكاله يقول كانت تصرف اذا مشيت عليها اكثر من 600 كم فوق ال160 نقص اذا اقل من 140 عادي بعد سنتين يقول شفت الويل كل مشوار علبتين او كل اسبوع اذا ماسافر عليها من زود الخساير والله انه يعبيها زيت 50 ابو 6 ريال الثقيل مرة هههههههههه والله حاله وبعدها كل شوي خربان راس المكينه وسألت ثاني معاه 2005 يقول نفس المشكله بس كل يوم ازيد نصف عليه رغم ان المكينه ماعليها زيوت وين يروح الزيت؟ مدري بعكس الموديلات القديمه بالكامري والله انها سيارة يمدحووووووووووووون الامريكي اشتر راحتك وبالتوفيق للجميع........

أخوي من وقت ما ركبت تويوتا محرك VVTI من سنة 2003 حتى الآن وهذي المشكلة ظاهرة في 65% من سيارات الكامري وخصوصا حسب 2005 بصراحة أنا شريت وحدة وكمان أخي وبنفس اليوم من الوكالة ودربناهم بنفس الفترة تقريبا ولكن أخي كا يرص عليها من البداية
ماعلينا وبعد 8 أشهر سيارة أخي صار يلاحظ ويشتكي من نقص الزيت وخصوصا الفلتر تغير لونه أما سيارتي ماتنقص أبدا علما أني أقطع اسبوعيا 2000 كم
والوكالة ماعندهم ماعند جدتي مايدرو وش يعملون فحصوها وعقدو أخي وبالآخر سيم سيم وأنا بعت سيارتي من 6 أشهر وماعليها شي وأول ماسألني يلي شراها عن الزيت وطمنته
وبصراحة كمان شريت كامري 2010 من 6 أشهر وماشاء الله عليها مانقص الزيت نقطة ..... بس أنا أستعمل زيت بترومين SLخفيف مثل لون الموية شفاف ورائع

اولا الف شكر على ثقتكم بي الاسدي 2010 و صاحب الموضوع (هاي) فانا زي ماقلت لك اذا انت تتحمل السيارات الصغيره خذها ولكن راح تقول ليتني ماخذت الكامري وشخصيا لقيت واحد في الوكاله جاء وقف السيارة ونزل يهايط على المدير وعلى سياراتهم من باب الفضول سألته قلتله سلامات ايش فيه قال انت تصبر على سيارة اذا رحت على بطناج او مطاب السيارة تلعب لعب والله مااقدر امسك الدركسون من قوة الرجه جاء المدير وشيك وقال راح نرسلها على الضمان فقال الرجال والله لو يمديني ابكي بكيت من القهر وتويوتا كان زمان .
فانت حاول تتصبر وتمسك لك قرشين حتى يفرجها الله عنك واسال الله يفرجلك كل مافيه الخير .
في النهايه انصحك بالاستخاره .

لا أنا تفكيري من ناحية ثانية بصراحة يعني خلاص السيارة لها تقريبا 5 سنوات ونصف يعني أتوقع منها أي خراب في أي وقت وبعدين ماتصلح للسفر حوالي 1200 كيلو كل 5 شهور تعبتني مرة في السفر وأنا أشكركم جميعا على الردود الأكثر من رائعة وأخص أخونا محبكم 2010 والأسدي 2010 لازم أبيع السيارة لأنه معي ظروف فما حصلت سيارة أحسن من الكامري في تويوتا ولا تنسون إنها بدون مقدم قسط شهري 1500
وألف ألف شكر لكم

اقول ما شفت احد ناصح مثل محبكم 2010 فأسل الله أن يغفر لك ولوالديك ونصيحتك غالية جدا وثمينة واسمع نصيحته يا هاي وطبقها بحذافيرها والكرولا 2005 مالها مثيل .وخلك من الكامري.

زي ماقالو الاخوان وانا سمعت كثير يقولون تهرب والله واحد من اقاربي اخ كامري 2008 وسافر عليها مسافت ممكن اكثر من1000 كم وبعدها تضايق منها يقول مو مريحة والسيارة جديده والملاحظه الثانيه لو احد معه كامري موديل 2007 وفوق وتمشيي من 120 الى 140 او 160 كم راح تسمع صوت المكينه عندك بتنفجر فالكامري خلاص كانت اول اما اليوم خلاص .
واسف اا دخلت عليك عرض انا شفت موضوعك مع الكرولا2005 للبيع انصحك لا تبيعها وتاخذ الكامري لانك راح تندم وايضا محتار بنيسان التيما اخوي انا عارف انك محتار ولكن شوف سعر الكامري كم وانت با السعر لو تزود عليه شويه وتاخذ سيارة كبيره مثل يوكون او تاهو او اكسبيدشن او ايكسبلورر لاتستعجل زود شويه وبعدها بترتاح ان شاء الله نصيحه من اخ اذا انت تداوم اكثر من 30 دقيقه راح تتعب مع السيارات الصغيره وانا مجرب اذا داومت بالسيارة الكبيره (يوكون) والله ارررررررررررررتااااااااااح اسمع شوري.

خذ مني العلم الاكيد ومن تجربة في 2003 وفي 2007 ومع خوي 2009

القير العادي في السفر فوق 1000 كيلو حط في بالك رح تزود من نصف الى ربع علبه بحكم المحرك المنيوم ويبخر وهذي في كل محركات اللمنيوم ولك في حجم 500 و560 و600 في المرسيدس اكبر مثال لانها نفس الميزة سلندر المنيوم ...
وبخصوص القير الاتوماتيك اخف في الصرفيه للزيت بحكم انه مايجيب حيل المكينة في الخط الطويل يعني اريح للميكنة واسمه تبخير ياغالي مو تهريب ...
وحتى لو كانت ماشيه الف كيلو توها جديده ومسكت خط رح تزود زيت بعد السفر .....

ما فيه شيء اسمه تهرب زيت كذا و السيارة سليمة,, إلا يكون فيها علة مثلها مثل أي سيارة.
أو الاحتمال الثاني: عيب مصنعي. لكن ما سمعت بهذا الشيء.

مكينة الكامري تجيها حرارة غير طبيعية و هذا السبب اللي يخليها تبخر الزيت

أيضاً من شد الحرارة تسبب تكسر السلندرات

اعرف شخص معه كامري 2003 حتى الان غير مكينة سيارته 3 مرات

يحصل كسر في السلندر و لا يمكن تلحيمه و لا توضيبه

الحمد لله

معي كامري 2008 ماشية 83 الف

ماعمري اشتكيت من تنقيص الزيت رغم اني سافرت عليها كدا مرة وماشفتها تنقص

التنقيص اذا كانت السيارة جديدة ومافيها خلل في المكينة يكون من وعية الزيت او السيفون تجاري

صديق لي معه كامري 2009 كان يغير زيت سوبر جي تي ويحصل الزيت متبخر ويندي على المكينه وبعد كذا غير زيت تويوتا وسافر على السياره 6 ألف كيلو والحمد لله الزيت مانقص شي :smilie16:

انا مع الأخوان ايضا سمعت وقرأت انها تبخر زيت ايضا

الكامري من أكثر السيارات تبخيرا للزيت , تصل في بعضها الى أكثر من علبه , وحتى الجدييييده , وأصحاب الكوامري اللي يقولون ماتنقص عندهم فهذا في حالتين , إما أنه يغير الزيت قبل 2000 كلم , أو واقفه مايحركها كثير ويمسك فيها خطوط أو انها تنقص وهو مو داري عنها

ماتهرب ولكنها تبخر زيت يعني تنقص واسئل ابويمن في محلات تغيير الزيت عندهم علم واسئل اهل الورش

اي والله صحيح وتنقص وكل مازاد عدد الكيلوا مترات مقطوعة زاد النقص ولتاكيد كلامي روح اي بنشر واسأله عن الكامري لانهم يغروا لها زيت وهم عارفين شي وراح يقولك تنقص والي يقول غير كلام هاذا فهو ماعنده سالفة

الكامري سيارة جيده وتحتاج الى صيانه دورية مثل باقي السيارات
ولا ارى فيها عيب واضح

والله اعلم