يا شباب نصيحتي لاتصلحون سياراتكم بأي ورشة تشوفها بوجهك
وهذي من تجربة شخصية
عندي التاون كار اول ماشتريتها استخدامها ماشيه معاي مثل العسل والله الحمد
في يوم وانا جاي من الدوام صارت السيارة تقطع فوق سرعة 100 يعني وانا داعس
على البنزين احصل ان السيارة تندفع وكأن شئ يمسكها وتندفع مره ثانية
المهم انا على طول خفت يكون القير وديتها محل القيور والمحل مشهور عندنا بالشرقية
وقالي لازم توضب القير طبعا كلمة توضيب عند هذي الورشة سهل
تدرون ليه لأن نظامها يفك القير حق السيارة ويركب قير سيارة ثانية موضب وجاهز
ولمن يوضبون قير سيارتي يركبونه على سيارة ثانية وكذا الدوامه
أكيد مو مصدقيني
"وديت سيارت الوالد سوبر محل التوضيب وركبوا بسيارة قير المهم لمن ابدل القير على D1 D2 D3
مايبدل يعني حده D وD1 يعني شالوا قير سيارت الوالد القير السعودي وركبوا قير أمريكي
لأن قيور الأمريكي مايبدل على D2 D3 المهم لمن رحت لهم قال لي السوداني صحيح
وقالي هذا نظام الورشة علشان نمشي الزبون ومانعطله المهم تهاوشت معاه لمن جاب لي قير سعودي طبعا هذا الشئ يقهر لأن كانت مشكلة القير الي عند الوالد انه يفوت تفويت بسيط على الثالث اما القير الي ركبوه صار يحشر على الثاني والثالث يقوم القير ينتع يعني يعطي رفسه في اندفاع السيارة يعني حالت القير الي على سيارتنا قبل التوضيب كان مخبط تخبط جامد وقيرنا راح على سياره ثانية
وهذا اعتبره غش "
المهم نرجع لموضوع سيارتي لمن قالي نوضب القير تذكرتسالفتي معاهم
والله لولا الحاجه ماكان جيتهم لأنهم يعتبرون أفضل محلات القيور ماادري على ايش
المهم قلت بنفسي بودي السيارة عند واحد سعودي ما شاء الله عليه يعرف المشكلة من الوصف والصوت
تتوقعون لمن جرب السيارة وش قالي قالي غير فلتر البنزين وغير البواجي وحط محلول تنظيف البخاخ في تانكي البنزين
ونظف لي مجرى هواء الماكينه
البواجي والفلتر ومحلول منظف البخاخ كلفني 120 ريال
يعني الشغله كلها كلفتني 240 ريال مع شغل اليد
والناتج صار الموتر مثل الوكالة واحس بعد صار عزم الموتر جامد
لمن اوقف الموتر صافي ولا فيه اي رجفه او تقطيع
و الأخ محل القيور يقول لي وضب القير ومثل ماقلت لكم هذي كلمه سهلة عنده
علشان مايعور راسه في فحص السياره
اتمنى انكم تنتبهون من هذي النقطه ولا تلجئون في حل المشكلة بالأشياء الكبيرة والمكلفه
صدقوني اكثر خربات السيارة من اشياء بيسطه من حساس ولا كويل ولا بواجي
ولا فيوزات لأن السيارات الجديده الحمد الله عليها نظام برودكشن على القطع الغالية الي فيها
مثل سالفة الأرباق اذا جلس الراكب يشتغل واذا قام الراكب يفصل وهذا نظام حلو اذا صار حادث لسمح الله مايطلع ارباق الراكب لتقليل تكلفة التصليح
واسف على الأطالة