كنت في قمة السعادة وانا اقرا ردود الاخوان واشوف الحيادية بالطرح لين جا رد اخونا العزيز
SierraGMC واحبطني صراحة وماودي اخوض بالتفاصيل معه اذا هو مقتنع بكلامه 100% الله يوفقه بموتره بس لا ينقص من قدر المواتر الثانية
اخوي صاحب الموضوع انا باعلمك تجربتي مع الموتر بشكل شفاف وواضح
طلعت الموتر بشهر 12 الماضي وباقي يومين ويكمل الموتر معي 4 شهور بالضبط
ماشي 14 الف وشوي و يعتبر معدل مرتفع مقارنة ب 4 اشهر فلذلك اعتبر ان تجربتي كشفت لي اغلب ملامح السيارة ولله الحمد الله يتمم لنا ولكم
من ناحية القوة الارقام تتحدث , العزم بالاكسبديشن اعلى من التاهو والاحصنة بالتاهو اعلى من الاكسبديشن
القوة متقاربه حيل بينهم من ناحية المقاومات حسب تجربة الكثيرين واولهم واحد من الاخوة الافضل بهالموضوع أكد على هالنقطة مع ان جنط موتره 20 انش الا ان الاداء كان متقارب على حد كلامه
وبالتأكيد ارتفاع العزم ميزة ممتازة بالجيوب بشكل عام لذلك ارشح لك الاكسبديشن من ناحية القوة
من ناحية الفخامة انت الفيصل , اركب هذي واركب هذي وشف وش انسب لك
بس للمعلومية الاكسبديشن اقل نوع مليان بالمواصفات , حساسات ومثبت سرعة وتحكم بالمسجل من الدركسون ونظام SYNC
من ناحية الامان والرساوة دمجتهم بنقطة وحده لأنهم متقاربين , راح اقولك تجربتي الخاصة بهذا الجانب , الاسبوع الماضي مسكت خط الرياض - حريملاء - رغبه - القصب - شقراء ( 200 كيلو تقريبا ) وتخاويت مع يوكن اقل نوع بدون قصد ولا اعرفه حتى , هو أمامي وانا خلفه طول الطريق وممشانا مانزل عن 160 , كان هدفي اضرب عصفورين بحجر واحد اجرب مرونة ورساوة سيارتي واقارنها بنفس الوقت مع اليوكن , والله وبالله وتالله ان السيارتين متقاربتين جداً جداً جداً من ناحية الرساوة بشكل عجيب , تحس ان نظام التعليق فيهم واحد نفس درجة الميلان باللفات القوية ونفس التسارع من جديد اذا اصطلب الخط , يعني تجربة ماراح انساها ابد خلتني افكر ليه الناس تتعصب بشكل مقيت بين السيارات وهي ماتجرب وتشوف ؟
بالنسبة للأعطال خلال 4 شهور زرت الوكالة 3 مرات , الأولى صوت طقة بالقير يحدث عند التهدئه والتغيير من الثاني للأول وحلوها عن طريق برمجة وكانت السيارة ماشيه اقل من 5000 كيلو , الثانية صيانة 8000 كيلو اخذت ساعه فقط و مبلغ 545 تقريباً اذا ماني واهم , والثالثه نفس مشكلتي الأولى حقت القير رجعت لي مره ثانية عند ممشى 10 الاف وسويت لهم قضية ان المشكلة تكررت وحلوها لي , وحاليا المشكلة راجعه بشكل خفيف ولكن غير مزعج وبخليها لين صيانة الـ 16 الف ولو ما انحلت ياويلهم مني :D
غير كذا ماشاء الله سمعة السيارة ممتازة وماسمعنا باعطال قوية ودورية بين المستهلكين
قوة الدبل مايختلف عليه اثنين يجمل ويأدي الواجب وزيادة ماشاء الله بس الله الله بالتنسيم الى 20 بالقليل
هذي تجربتي المختصرة لسيارتي الله يتمم لنا ولكم
و ارشحها لك بسبب الوكيل وليس قصور بالتاهو لأن بقية الامور جداً متشابهة ومشتركة بين السيارتين
وبالتوفيق
