والله يا أخوان انا في نظري انه ماله داعي انك تتابع سيارتك عند الوكاله هذه وجهة نظر والله ما عندهم غير النصب والكلام الفاضي ,,,
إذا انت ملزم تبي ترتاح روح عند ورشه تثق فيها ويكون عندهم فحص بالكمبيوتر وشوف وش تحتاج تغيير وغير ,والله الوكالات غير ضحك على الدقون ,,,
انا والحمدالله هذا فضل من ربي عندي كامري 2000 وما شيه 560000 تقريبا وماشاء الله زي الحلاوة اللهم لك الحمد كل بداية إجازة اروح عند البريدي لفحص السيارات ( الي عند معارض النسيم) وافحص بالكمبيوتر بـ 150 ريال ويعلمني وش تحتاج تغير وبعض الاحيان ما أغير عنده لأنه بعض الاحيان يبالغ بالسعر لكن الفحص ممتاز واروح للوكاله وأشتري قطع الغيار واركبها عند بعض الورش الموثوقه وصلى الله وبارك ,,,
يا جماعة الخير والله الوكالات بهذلونا في الاسعار الخيالية في الفحص هذا غير سوء الخدمه الله المستعان ,,,
انا الان مقبل على شراء سيارة جديدة ,,, ومريح راسي من قضية حجز وخرابيط بإذن الله اخذ السيارة وما يشوفون وجهي الا في دفع القسط او قطع الغيار,,,
فكروا بعقل يعني كل السيارات الي موجوده في الشوراع تفحص عند الوكالات!!!
صحيح بعض الاحيان تكون ملزم في الذهاب للوكاله خاصة عندما تكون السيارة جديده ولكن ليس للفحص بل عندما يكون هناك عيب مصنعي بالسيارة وتغيره عن طريق الضمان ,, فلهذا يجب ان نفكر سويا في الابتعاد عن الوكالات قدر المستعان وخذها قاعده يا جماعة الخير ( ما يحك جلدك مثل ظفرك),,,,
أخوكم ابو نوره,,,
