كيف تتصرف في حال وقوع حادث لا قدر الله

كيف تتفاعل مع الإصابات؟ هل تحرك المصابين؟ أم تنتظر الإسعاف؟ أحيانا تحريك المصاب يسبب مضاعفات خطيرة خاصة لما تكون هناك كسور في الظهر أوالرقبة

السلام عليكم

أولا بخصوص الاستفسار الأول: يعتمد على الحادث نفسه يعني لو كان قوي شوي لا تحرك سيارتك حتى لو كان الشارع زحمة

أما لو كان حادث بسيط مثل دعمة من الخلف أو حكه أو المراية في المراية هذي ما يحتاج لها مرور

الدعمة تنزل وتشيك على سيارتك وغالباً السيارة ما تتأثر بس عشان تتأكد
الحكة على حسب صاحب السيارة كثير يسامحون وبعضهم يستقعدون لك لازم تدفع
أما المراية هذي على حسب إذا كنت مطيرها كاملة الله يعينك تدفع للرجال حق المراية (على حسب نوع السيارة وغالباً تكون الأسعار من 400 ريال وأنت طالع). لكن إذا انكسرت القزازة برضوا على حسب صاحب السيارة، مرة من المرات كنت مسرع مع شارع ضيق وفجأة طلع لي ددسن وطقت مراية موتري في مراية موتره وطبعاً الغلط مني لأني أنا مسرع وهو مهدي ويحاول يبعد عني لكن ما قدر. المهم نشب لي إلا أعطيه حق المراية عطيته 20 ريال وافتكيت من شره.

من ناحية التفاهم مع صاحب السيارة الثانية وفي حال كان الغلط مو منك، نصيحة لوجه الله ابعد عن وجع الراس

السالفة هذي صارت لأخوي، مرة من المرات كان ماشي على الشارع العام ويبغى يدخل للحارة، المهم طلع له واحد من الحارة وعكس الخط (كويس إنهم كلهم كانوا ماشيين شوي شوي تقريباً كلهم كانوا ماشيين تقريباً 30 كم)، المهم تصادموا وجه لوجه وللعلم سيارة أخوي كابرس كلاسيك 2006 وسيارة الرجال كابرس صابونه، الكابرس حق أخوي الصدام حقه طاح وانعدم وتكسرت الأنوار الأمامية أما الصابونه تأثرت بشكل بسيط (تعرفون المواتر القديمة حديد). الولد طلعت السيارة مو له لأبوه وتورط على طول نزل من السيارة ودق على أبوه شوي إلا أبوه جاي. يوم وصل أبوه جا يسلم على أخوي، طبعاً أخوي دق على المرور أول ما صار الحادث لكن جلسوا تقريباً أكثر من ساعة ولا جا المرور على قولهم ما عرفوا الوصف، شوي الا جا الشايب لأخوي ويقوله خلنا نحل الموضوع بينا هذا رقم جوالي سجله عندك وخذ مني (كلمة رجال) كلها يومين بالكثير وأدبر مبلغ تصليح موترك، بعد يومين يدق على أخوي وتسمع أنواع الشكاوي أنا حالتي المادية تعبانه وأنا وأنا وأنا ومن هالكلام، بعد ما سمع أخوي كلامه سكر في وجهه وقال حسبي الله ونعم الوكيل، راح صلح الموتر من جيبه

خذوا نصيحة مني لوجه الله، الحوادث البسيطه مثل ما ذكرت فوق حكة أو طقة مراية في مرايه هذي تتفاهم مع الرجال ما يحتاج لها مرور ووجع راس، لكن إذا كان الحادث شوي قوي هذي ما يبيلها تفاهم يجي المرور ويحل المشكلة وصلى الله وسلم لا تتفاهم معي ولا أتفاهم معك حتى لو الخطأ علي.

لاحظوا إني ركزت على نقطة التفاهم، لأن في هذي الأيام ماعاد فيه ناس ثقة (إلا من رحم الله)

أما فيما يخص الاصابات اترك الموضوع لذوي الاختصاص

اعذروني على الاطالة لكن حبيت أفيدكم من واقع تجربة

وفي النهاية يعطيك ألف عافية يا أخ محمد على الموضوع المفيد والمهم، بانتظار باقي الردود

الله يعطيك العافية اخوي محمد
وجهدك واضح يالغالي

اذا كان الحادث يعيق السير فيلزم تحرك السيارات المشتركة في الحادث اذا كان بسيط
ويعاني رجال المرور من هذه المشكلة اذ تبقى سيارتين في وسط طريق رئيسي بسبب حادث بسيط


يجب عدم تحريك اي مصاب ونقله وحتى اخراجه من السيارة لان ذلك قد يتسبب لمضاعفة الاصابة لاقدر الله
ويستثنى من ذلك من له خبرة كافية وتدريب معتمد في عمليات الانقاذ والاسعاف الاولي

وتقبل خالص شكري وتقديري
اخوك
VIP 111
المصمم 911 سابقا

سأجاوب فقط عن هذا السؤال:



المتعارف عليه هو عدم تحريك السيارة، واذا كانت سيارتك وسيارة الطرف الثاني مؤمنة لدى اي شركة تأمين، فاتصل على شركة نجم على الهاتف رقم 920000560 ثم تتبع التعليمات وسيقومون بارسال مندوبهم ليرسم الحادث ويقدر الاضرار ثم تتابع معهم.

اما في حالة ان كلا السيارتين غير مؤمنتين، فقم بالاتصال على المرور على رقم 993.


موضوع جميل جداً شكراً ابو حسن.