شوف أخي أبو جنى قالو لي في ورشه الوكاله إذا ماجبت السياره كل 5000 يروح عليك الضمان ، ما أدري هذا كلام اللي بالإستقبال أو أنه في دفتر الضمان لكن أنا ما أعتقد إن كلامه صحيح و لو صار شيء بالسياره و رفضو يصلحونه على الضمان بأتصل بالوكيل الإقليمي في دبي ( يعني بغثهم ) و بعدين السياره مشت 5000 يعني لو فيها شيء من التصنيع بيظهر .
بعدين هم حاطين هالنظام الجديد كل 5000 ب 350 ريال و كل 20000 ب 800 ريال تقريبا و كل 40000 كيلو أو 60000 كيلو بأكثر من 1200 ريال لأن أنا كان عندي موديل 2002 و لا قالو لي هالكلام من قبل و بصراحه أشوف أن الأمر مبالغ فيه كل 5000 أودي السياره شغله والله ، لا وخذ موعد و متى تطلع و اقعد يومين بدون سياره وش اللي بيسونه ينظفون البريكات و يشيكون على كذا نقطه يعني في نظري مالها داعي و بالأخير بتدفع 350 ، أنا وديتها بعد ال 5000 كيلو لان طلعت مشكله في المكيف قلت بالمره يشيكون عليها و طلبت أنهم ما يغيرون الزيت لأني بغيره برا ( المره اللي فاتت بعد الألف غيرو الزيت و لقيته زايد بالمره ) و دفعت لهم 250 ريال و الحمد لله المكيف ما طلع فيه شيء بس دخل فيه أوراق و شالوها و زبط المكيف .
نصيحتي لك غير الزيت كل 5000 و تقدر تغيره بعد ال 7500 كيلو لأن عندك كمبيوتر السياره ينبهك لوقت تغيير الزيت و حسب ما شفته في الكتالوج يقولون كل 7500 كيلو و السيفون يكفيك ل 15000 كيلو و تقدر تغيره مع كل مره يعني كلها عشرين ريال . وحتى صيانه العشرين الف كيلو تقدر أتسويها برا و هذي من مزايا الفورد إنك تلاقي ورش برا تصلحها يعني ماهي معقده مثل السيارات الأخرى مثل الكرايسلر أو حتى الكابريس .
أنا أشوف إنك تغير الزيت برا بس لا يزيدونه يعني أربع علب بدون السيفون و خمس مع السيفون أو أربع علب و نص مع السيفون لان اذا زاد الزيت عن المعيار يضر على ما أعتقد .
و بالبركه السياره الجديده الله يعطيك خيرها و يجنبك شرها
