موضوع جميل جدا الله يديك العافية لأنه فيه فايدة للجميع بالتعلم من خبرة كل فرد في المنتدى
أنا سيارتي بيجو 607 أشتريها من بالبيد أول ما نزلت في 2001 فل أوبشن
خلال 3 سنوات الضمان غيرت 6 مكاين شبابيك لأنه كل ستة أشهر كان لازم يعطل واحد من مكائن الشباك وطبعاً في حاجات تانية برضه خربت زي شاشة عرض المعلومات لكن خربت بعد إنتهاء الضمان بكم شهر وقيمتها 3000 ريال وما غيرتها من يومها لأنه حرام في شاشة بلون واحد يكون سعرها بالشكل المبالغ فيه دا
بالنسبة للوكيل صيانة سيئة جداً والسيارة تقعد بالأسبوع والإتنين في الصيانات الكبيرة مع إنه أسعاره في الصيانة معقولة يعني مثلاً صيانة الـ40 ألف قيمتها بالقطع 2500 ريال لكن المشكلة إنه لازم يكون فيها مشكلة تخلي الصيانة توصل لـ4 و5 آلاف ، وحتى قطع الغيار في أشياء معقولة زي القماشات مثلاً الأماية بـ400 ريال لكن مثلاً الشكمان بحساساته بـ7000 ريال لكن الحمد الله ما غيرته والله لا يحوجني أغيره ، وماكينة الشباك بـ1200 و200 قيمة التركيب
السيارة من ناحية تصميم داخلي وخارجي قمة في الروعة والهدوء من المكينة وصوت الهوا ممتاز لكن إذا الإسفلت قديم ولا محفر صوتها عالي من ناحية إحتكاك الكفرات بالإسفلت
سواقة السيارة جميلة جداً وهي سبب في إني حبيت السيارات الأوروبية بعد ما سقتها لأني ما أقدر أسوق سيارة ياباني ولا أمريكي بعد كده
بالنسبة ليه السيارة القادمة بإذن الله تكون ألماني يا مرسيدس يا أودي
لكن البيجو مع إنها رائعة وراسية جداً إلا إنه بمعدل تقريباً كل شهرين لازم يخرب فيها شي وأنا السيارة معايا 8 سنوات من 2001 إلى يومنا دا وماشية 100 ألف كيلو فقط صارف عليها صيانة قريب الـ50 ألف ريال ومشاكلها ما تنتهي غيرت فيها مساعدات ومروحة ماكينة ورادييتر والمكيف الآن يبغاله ثلاجة قيمتها 5000 ريال وبصراحة ما أنصح فيها أحد بالمرة ومع إني أنا مبسوط بفخامتها وسواقتها لكن لن أشتري فرنسي بعد الآن... بنظري أن الفرنسيين عندهم تصاميم جميلة لكن ما عندهم الخبرة في صناعة سيارات تتحمل بالذات أجواء بلدنا الحارة والمليانة حفر ... أنا أشتريت السيارة وفي نيتي أسوقها لمدة 10 سنوات لكن مع المشاكل في العامين الأخيرة مضطر أبيعها خلال الأشهر القادمة لأنه هلكتني روحات وجيات للوكيل لأنه مو أي أحد يقدر يصلحها وقطعها متوفرة أصلي عند الوكيل فقط
وآسف للإطالة لكن حبيت أفيد زي ما إستفدت من الموضوع
