تنبيه خطير لطلاب و موظفين جامعة الملك سعود انتبهوا على سيارتكم

صباح الخير يا شباب المنتدى..
انا ترددت صراحة في طرح الموضوع.. لكن اقسم بالله ان هذا ماحصل لي و حصل لزميل لي من قبل و لكثير من الطلاب و الموظفين و المارة بالقرب من جامعة الملك سعود و بالتحديد في مواقف التميمي و مقابل مراكز التصوير و مقابل محطة الجامعة سابقا"الدريس حاليا"... بسرد لكم السالفة كما هي

الاسبوع الماضي يوم الاثنين طلعت فترة الغداء من المستشفى الجامعي مكان عملي قاصد واحد من المطاعم اللي بين التميمي و محطة الجامعة كل من يسكن او يدرس او يعمل في الجامعة يعرفها..

وقفت السيارة مقابل المحطة في الخارج على الشارع عند صراف الراجحي بالضبط نزلت انا و زملاي من السيارة نوعها فورد كراون فكتوريا قصدنا المطعم و جلسنا حوالي الساعة طلعت الساعة وحدة و نص الظهر و عطيت الشباب مفتاح السيارة يركبون لحد ماجيب لي حاجة من البقالة اللي في المحطة

جيت عند السيارة و يقولون لي زملاي ان السيارة ماتشتغل!! ماكان فيها اي شي وفاتحها الصبح اشيك على الراديتر و الزيت وماكان فيها شي يذكر كيف تعطلت بهالسرعة ولا صارت تشتغل و البطارية جديدة!!!

فتحنا الغطاء و ناظرنا و حاولنا نشغل ماحولك احد السيارة ماتشتغل ... لكن لاحظت شي ان فيه سلك تحت البكرات مفصول اتوقع انه سلك الكمبيوتر الموصل بالمكينة كنت شايفة الصبح مشبوك كيف انفصل!!!!!! حاولنا نشبكه بس انه ماينشبك الا من تحت السيارة قلت للشباب لحد ينام تحت السيارة

رحت للصيانة اللي داخل المحطة و طلبت الكهربائي قالي واحد يشتغل غير الكهربائي وين السيارة اشرت له عليها قالي الفورد !!!!! استغربت من الموضوع فيه سيارات كثير في المكان اللي اشرت عليه كيف عرف انها الفورد المهم رحت عن السيارة و جاء الكهربائي معه سلك بيفحص السيارة و لاقلت له عن السلك المفصول لاني شكيت انهم هم اللي مسوين الحركة هذي و حدثت مع واحد من الزملاء نفس السيارة كان موقفها في مواقف التميمي ...

وصل الكهربائي و قام يفصل الكتاوت و الفيوز و يتعبث و قالي شغل ثم قالي هذي ::::


اول مره تسوي هالشي ولا عمري واجهت مشكلة في التشغيل مثل اليوم يعني في الموضوع شك كبير

قالي بغيرها لك اصليه بـ 350 ريال مع شغل اليد قلت له فيه طريقة تشتغل السيارة و جيبها لك بعد الدوام قالي مافيه الا تغير الطلمبة ... قالي تخلص المغرب لازم افك تانكي البنزين و من هالشكل

رحنا للدوام و انا اقول للشباب انهم هم اللي مخربين السيارة اقصد العمال اللي في ورشة محطة الجامعة قالوا لي لا توسوس قلت لهم ان السالفة صايره مع زميلي و هو بنفسه قايل لي عليها قبل 8 شهور و قالوا له طلمبة و لاصلحها عندهم شالها للصيانة اللي داخل الجامعة و قاله ان هذي ثامن او تاسع سيارة تجي لي في شهر من نفس المكان و فورد بعد و المشكلة بس السلك المفصول يشبكونه لهم و تشتغل السيارة بدون تغيير الطلمبة يعني فيه احد يفصلها و يروح و اكيد المستفيد من الموضوع العمال اللي في ورشة المحطة يعني اكيد هم اللي يسوونها..

رجعت له الساعة 4 و نص العصر قالي خلصت السيارة و فتحت الكبوت لقيت السلك مشبوك قلت له السلك هذا وشوله قالي حساس الزيت قلت افصله نزل تحت السيارة و قالي فصلته شغل السيارة و هو مازال تحت السيارة رحت اشغل السيارة و اشتغلت يعني فصله و يوم جيت اشغل السيارة شبكه

اخذت فاتوره مكتوب فيها تغيير طلمبة وكاله مع الضمان و شغل اليد و عطيته 350 ريال و مشيت

جا يوم الثلاثاء بعد السالفة بيوم وديتها لواحد اعرفه قلت له شف لي الطلمبة تغيرت ولا لا راح بها للحفرة و نزل و ناظر قالي مالمسها مفك و على تركيب المصنع ماعمرها غيرت

ما اقتنعت بكلامه مع اني اعرفه لاني ماناظرتها بنفسي اخذتها لواحد ثاني قلت له ارفعها و ناظرت و شفت نفس كلام الرجال الاول ماتغيرت ابدا سئلت الكهربائي التركي السلك هذا وش يسوي قال لو تفصله مستحيل السيارة تشتغل قلت له افصله فصله و نزل السيارة و حاولت اشغلها نفس المشكلة اللي امس شبكناه مره ثانيه و اتصلت على الحرامي اللي في ورشة محطة الجامعة و قلت له بجيك آخذ فلوسي ولا بجيب الشرطة لانك ماغيرت شي في السيارة و انت اللي فاصل السلك .... انكر و قالي مغير الطلمبه ... جبت له الشرطة و خذوه للقسم و عطيتهم الفاتوره و عطاني فلوسي كلها 350 ريال عدا و نقدا ... مدير الصيانة اللي داخل الجامعة اتصلت عليه يقولي تجيني في الشهر حوالي 10 سيارات من نفس المكان و كلها فورد و مفصول فيها السلك هذا و يقولون لهم عمال ورشة المحطة انها طلمبة

آسف جدا على الإطالة السالفة مملة لكن والله العظيم اني اقولها بصدق صايره معي شخصيا ولا اتمنى ان احد يقع في هالمصيدة .... انا أخذت فلوسي و سجلت تنازل في قسم المعذر جرجرته للقسم مع اني يوم اتصلت عليه قالي تعال خذ فلوسك بس ابي اعلمه ان في الديرة نظام .... لكن اجبروني القسم على التنازل و اخذ المبلغ ولا اعلم ان كان طلع او ماطلع من القسم للمعلومية جنسيته سوري

في الختام اقول لكم انتبهوا من المصيدة يا شباب تراه شغال ليل نهار تخريب في سيارات الناس و سرقهم عيني عينك و السلام عليكم.......