انا من سكان الدمام والحمدلله ماقد تعرضت لسوء المعامله وعدم النظام في مطاراتنا وموظفي خطوطنا المحليه لاني استخدم مطار البحرين لحد ماجا اليوم الموعود واشتغلت في الرياض وشهرين استخدمت فيها جميع خطوط الطيران المحليه خلوني احرم استخدم المطارات المحليه (باستثناء العمره والحج)
قررت استخدم سيارتي كل اسبوع على طريق الرياض والدمام
وشفت عجايب من شبابنا اكثر من عجايب شبابنا في المطار...
فيه بعض البلدان.. الحوادث المميته سببها القياده تحت تاثير المسكرات واحنا سبها غ.....ماراح اقول اخاف تزعلون مني
والله ياشباب اذا استمرينا في تصرفاتنا كذا مو بس في السواقه ..في كل شي... راح نجيب بلدنا لورا ولاتلوموا الحكومه لانه احنا اللي نشتغل في كل مكان واحنا اللي في يدنا نطور هالبلد
المهم خلينا في المووضوع الخاص بالسيارات...
ودي اذكر لكم بعض المشاهد اللي شفتها خلال الشهر اللي استخدمت فيه طريق الرياض - الدمام ولكم الحكم (قولوا لي يمكن انا غلطان)
1- الساعه 12 بالليل امشي 130-140 كم وسيارتين يطوفوني (اتوقع مو اقل من 160-180كم) المصيبه السياره الثانيه مطفي الانوار كلها ولازق في السياره اللي قدامه ... انا والله كنت باصدمه لاني اول ماشفت.. شفت سياره واحده بتطوفني وانتظرتها عشان اسقط وراها عشان اطوف سياره قدامي وتخرعت لما شفت مثل الشبح مطفي الانوار يمشي وراه (ولا يشغل الانوار الا قبل التفتيش) شفت هالحركه مرتين في اسبوعين ورا بعض (عشان يتفادى امن الطرق مايشوفه و يصيده وهو مسرع) يعني مو مكفيه انه مسرع لا مطفي الانوار عشان يخلي فرص الحادث اكثر
2- سياره جيب محمل فوق سقف السياره حموله (والله ماكذب عليكم) ارتفاع الحموله عن السقف يمكن مترين ويمشي على الاقل 160 كم....
3- امن الطرق في التفتيش اللي يمر عليه راعي الجيب الي تو ذاكره ويخليه يمشي (اي واحد يشوفه يعرف انه خطر عليه وعلى الي يسوقون في الطريق جنبه) المفروض يخالفه ويخليه ينزل من الحموله يشوف له حل
4-عند نقط تفتيش الزحمه في الدمام تمسك مسارك تنتظر دورك يجي ربع ساعه او اكثر وتجيك سيارات على الاكتاف يغبر على سيارتك وياخر مسارك ولاياخذه هو اكثر من خمس دقايق ...واللي يقهر اكثر العسكري وهو يشوفني اتهاوش مع راعي السياره اللي يبي يسقط علي من الاكتاف ولا يتحرك و اشتكي للعسكري اقوله المفروض يخالفه ..يقولي (وش فيك معصب مالي دخل) ويخليني انا والي سقط علي نمشي بدون مخالفه اذا الناس تستجري تخالف قدام الشرطه...افقد الامل انه اي شي يتعدل في هالبلد
5 ناس توقف لما تشوف حادث على طريق الرياض وبعضهم يساعد وينقل المصابين وبعد ربع ساعه الاقيه يطوفني بسرعه فوق ال 150 كم... لهالدرجه قفلنا عقولنا ونقول كل شي مقدر ومكتوب؟
تصرفاتنا في الطريق تعكس شخصيتنا وطريقه تفكيرنا واللي فوق كله يعكس عدم ادراك وقله ثقافه (وثقه بالنفس على الفاضي)
احس نحتاج غسيل مخ وتغيير في كل شي من طريقه تربيتنا الى تعليمنا الى نظام المحاسبه وننسى شي اسمه قريبي ومن جماعتي اتوسط له
اسف اذا ضايقتكم بس لازم نصحى ولا مستقبلنا بعد مايخلص البترول (وبيخلص قريب) مثل اي دوله من دول افريقيا الوسطى مجاعات وتخلف في كل مجال
الله يكون في العون كل يوم القى سبب يكرهني في العيشه هنا
سلامتكم
