والله انا اتوقع الناس ماعادت تهمااا دفع امامي او خلفي للاسف
الحين يشوفون الشكل الداخل والخارجي ودالديكوورات والجنوط ..................... وغيرها
وينسون قوه المكينه والتحمل والدفع الخلفي (( اللي يعتبر مريح ))
ياجماعه , انتوا شوي لخبطتوا الموضوع ...... غالبية الشباب هنا يتكلمون عن الدفع الامامي كأنه عيب شرعي في السياره , خلونا نتكلم بجديه شوي .....
مثل هالسيارات من ياخذها ؟؟ وليش ياخذونها ؟؟ وليش الاقبال زاد على الدفع الامامي اكثر من الدفع الخلفي !
اللي ياخذونها ناس استخدامهم عادي جدا للسيارات هذا , من البيت إلى العمل او إلى يروح بها إلى اهله او يسافر بها وطبعا كلها في حدود استخدام مثالي للسياره .... اغلب اللي ياخذون هالسيارات يهمهم جودة السياره وسعرها وإقتصاديتها (( يعني سياره توديه وجيبه بدون مايصرف $$ زياده )) هذي كلها موجوده في سيارات الوقت هذا سواء دفع امامي او خلفي ..... لكن كثير من الناس خصوصا اصحاب العائلات يفكرون بالسيارات المريحه اللي ماتطلب الكثير ...
الدفع الامامي حاليا صيانته اسهل من الدفع الخلفي
الدفع الامامي اخف وزن من الدفع الخلفي = صرفيه بنزين اقل
الدفع الامامي سواقته اسهل من الدفع الخلفي (( مش كل الناس طارات ))
الدفع الامامي عادة تجي شنطته الخلفيه أكبر لانه مافيه دفريشن في الخلف (( يعني ينفع للي يسافرون مع اهلهم اكثر من الدفع الخلفي ))
فيه اسباب كثيره خلت سيارات الوقت هذا اغلبها دفع امامي خصوصا السيارات اليابانيه لانها في الاصل سيارات مصممه لذوي الدخل المحدود بحيث تكون اقتصاديه ومريحه بالنسبه للسعر اللي يدفعه الواحد ........
انتوا تقولون انه الامريكي احسن لانه دفع خلفي وهو احسن بمليون مره من السيارات اليابانيه لانها دفع امامي ...... طيب انتوا شباب وللحين فيكم حب التفحيط واللعبه :D لكن اتنوا فقط تمثلون مايقارب الـ 2% من المجتمع ....... و 98% من المجتمع بس يبغون سياره سعرها زين وسواقتها زينه (( توديهم وتجيبهم )) وبس
غالبية صانعي السيارات ينتجون السياره حسب متطلبات السوق ....... يعني إذا 2% بس يبغون سيارات دفع خلفي و 98% يبغون سيارات اقتصاديه , هل تتوقعون انه الشركه راح تصنع سياراتها حسب رغبات الـ 2% وتخسر الـ 98% من القوة الشرائيه اللي تبغي سياراه اقتصاديه ؟؟! طبعا لا ...
تبغون سيارات دفع خلفي البديل موجود,,,, فيه شيء اسمه سيارات رياضيه ..... وطبعا معروف انه السيارات الرياضيه بيكون مستواها أقوى وافضل وتكون مفضله اكثر للطارات ...
عندك الهوندا S2000 وعندك المازدا RX8 و MX5 وعندك الزد الجديد وعندك الانفينيتني G35 وعندك الامبريزا وعندك الايفولوشن وعندك الـ MR2 وعندك اللكزس الـ IS300 و الـ SC430
لاتقولي مافيه ياباني دفع خلفي .....
بتقولي ليش الكامري ولا الالتيما ماتجي دفع خلفي! طيب حتى لو كانت دفع خلفي ؟؟! وش الفايده اللي بتجنيها الشركه المصنعه للسيارات هذي إذا كانت تكلفة تصنيعها اعلى و الاهم انه الشريحه العظمى من الناس بتشتري السيارات هذي وبتسوقها سواقه عاديه جدا مثل لو انها كامري او التيما دفع امامي وزيد عليها انها بتكون مش اقتصاديه مثل لما تكون دفع امامي لانها بتحتاج لمكينه أكبر ...... يعني صيانه اكثر وبنزين اكثر على نفس المشاوير اللي بتقضيها على كامري دفع امامي :confused:
|3| وفي الاخير السيارات اليابانيه للحين فيها خير ....... تبي دفع امامي موجود , تبي دفع خلفي موجود , تبي دفع رباعي موجود ....... ولكل سياره هدفها اللي صممت لاجله
حتى الشاصي شوفو السيارات الجديده اكثرها مع الحوادث ينكسر الشاصي نصفين
اذا دخل بعمود ( لقدر الله ) والعمود مايتحرك من كانه
<<<=== الى متى الوكالات يلعبون علينا ؟!!
والمشكله الاسعار كل مالها ترتفع على ايش مدري (( بلا جوده ))
ارجوو محد زعل مني لكن كلام الحق ينقال
تقبلوو تحياتي
بالنسبه لكلامك عن الشاصي ...... مدري إذا اقدر اوصل لك هالمعلومه ولا لا ..... لكن هذي انا اشوفها ميزه حلوه في السيارات الجديده لزياده الامان ...
السياره خلال الاصطدام تتهشم وتمتص قوة الضربه لتخفيف القوه على الركاب اللي داخل ....
لكن لو السياره كلها حديد وتصدم شيء معين , صحيح انه السياره ماراح يصيدها شيء لانه ماراح تمتص قوة الضربه , لكن مافكرت قوة الضربه هذي وين بتروح ؟؟!! :D
إذا مب مصدقني سو هالتجربه وشوف الفرق ...
خذلك سياره صدامها الامامي بلاستيك وحاول تصدم فيها شيء بسرعه 10 او 5 كم .... السياره اكيد بتتخفس شوي لكن تذكر كيف ردة فعل الضربه على جسمك
روح حق سياره ثانيه صدامها الامامي حدييييييييييد ( أمريكي ) واصدم فيها على سرعه 10 او 5 كم ..... اتوقع انه السياره ماراح يصيدها شيء , لكن اتوقع انه يدك بتنكسر او راسك بيضرب في الزجاج الامامي (( من جدي اتكلم )) لانه قوة الضربه ما امتصتها السياره لكن جسمك امتصها ......... ولو انه الصدام الحديد امتص الضربه كان على الاقل شفت السياره تكسرت شوي من الضربه
