هل تعطلت سيارتك وصلحتها بنفسك أو بأقل الخساير (شاركنا بتجربتك )

السلام عليكم ورحمة الله وبركاته

رائيت هذا الموضوع في احد المنتديات وكان ذو فائدة كبيرة جداً فاحببت ان قوم بعمل موضوع مشابة في منتدانا الغالي
وارجو الايغضب اخواني الفنيين مني:D

الموضوع ببساطة هو ان يطرح احد الاعضاء مشكلة حصلت له في سيارتة الحالية او السابقة وكيف قام بحلها او صلاحها واعتقد اننا بهذه الطريقة سنستفيد كثيراً من خبرات الاعضاء في المشاكل التي مرت بهم

وابدا باسم الله واقول

1- مشكلة لدى احد الزملاء قام باستيراد سيارة من امريكا وعند اخراجها من الميناء ظهر صوت عالي وضرب حديد فقام بطلب سيارة سحب وذهب بها الى الصناعية اغلب المورش قالو السيارة تحتاج الى توضيب وهذا صوت العامود

وعد سيرة بالسيارة والهم يكدرة ( صار فلم هندي ) اذا باحد الكهربائية من اخواننا المصرين يقولة افتح الكبوت يابيه

واكتشف المشكلة وكانت احد براغي المروحة محلول ويحك في المروحة وقام باصلاحها باقل من 200 ريال

2- المشكلة الثانية سيارة هوندا 92 كان في صوت من الكفرات الامامية عالي جداً
الحل تغيير بيرنقات للعكوس الامامية

في النهاية ارجو من الجميع المشاركة لتعم الفائدة

اخوكم صالح

فكرة الموضوع رائعة جدا اخ صالح
بالنسبة لي:
عندنا جمس 2001 كان فيه صوت خرش واحتكاك قوي لما تكسر الدركسون يمين وتلف (كانك بتدخل السيارة في موقف)
الوالد قال لي وده للوكالة (لأنه كان ناوي يسافر عليه للعمرة..وما وده يسافر على السيارة وفيها مشكلة)
المهم وديتها لوكالة العيسى..ركب معي المهندس وسمع الصوت...قال لازم تدخلها عندنا يومين للفحص..وبعدها مدة لا يعلمها الا الله للاصلاح...وتكاليف الفحص 150 (بدون اصلاح)
المهم كنت ناوي ادخلها..بس ما يمدي لأن الوالد بيسافر عليها قريب...قلت للمهندس ايش التشخيص المبدأي؟؟؟
قال : الأذرعة!!..قلت اقدر اسافر عليها...قال لا خطر
المهم رجعت ووديتها لميكانيكي تركي ممتاز وامين جدا الوالد يعرفه...يوم سمع الصوت نزل من السيارة وقال لي سو الحركة من جديد..(خذ لفة)
وبعدين قال لي وقف...وبعدها قال عد الحركة...يوم عدتها الا الصوت مختفي!!!!
قلت وش السالفة؟؟
طلع الجلدة اللي فوق الكفر نازلة شوي وتحك مع لفة الكفر..الرجال طعجها بيده وانهى الموضوع ..والتكلفة فري!!!

موضوع حلوو الله يعطيك العافيه
لان هذا الطرح يعطي الحلول ربما غير محتمله ولا تكلف شي و الي يقراء يمكن تكون صادفته مثل هذه الامور يطرحها ليستفيد الجميع

شكرا لك

موضوع أكثر من رائع ...

فعلاً بعض الخرابات تكون بسيطه جداً ولكن يجيك ميكانيكي واللى كهربائي ما في قلبه أمانه ويقول لك تكلف المبلغ الفلاني ويستغلون جهل الزبون بأعطال السياره، وتطلع الشغله ما تسوى.

من خلال خبرتي في الورش أنصح الجميع أنهم يأخذون رأي أكثر من شخص قبل أن يصلحوا السياره، وأيضاً (أحلى يا أيضاً:D ) لا تخليه يصلحها اللى وأنت على راسه.،منها تتعلم ومنها تشوف وش قاعد يسوي وهل تستاهل الشغله المبلغ اللي يطلبه.

أخوكم:


Accord_4_ever

بسم الله الرحمن الرحيم

اخي الكريم الفاضل / salehhd حفظه الله

السلام عليكم ورحمة الله وبركاته

اشكرك جزيل الشكر على هالموضوع القيم ، واسال الله ان يجعل عملك في ميزان حسناتك يوم لا ينفع مال ولا بنون الا

من اتى بقلب سليم .

موضوع جميل وراقي بكل ما تصفه الكلمة والله يحفظك

مشكلة حصلت لي مع كابرس صابونه وهي انني لما امشي بها يطلع صوت كل ماله يشتد اكثر واذا مسكت فرامل راح

الصوت رحت لاكثر من بنشر اللي قالي افتح الكبوت ويقعد لك كانه يعرف يحلها وهو ما يعرف وقمت وسكرت الكبوت

ورحت واحد غيره وقالي رقي السيارة على الرصيف وبصراحة خفت منه هههه خفت يلعب فيها لكن بعد دقائق معدودة

رفع السيارة وفك الكفرين اللي قدام وقام يلف الحديد وشوي الا والصوت طلع وارتحت وقلت له كم التكلفة ( فرحت كثراً

وقلت الرجال عرف المشكلة هههههه ) قال لي روح اشتر ... تتوقعون ايش يا اخواني ؟؟؟ تصدقون انها فحمات !!!

الله المستعان وجزاه الله خير وقام بالواجب وسوى المشكلة ودعيت له الله يجزيه بالخير ويطول في عمره " اللهم آمين "

والف شكر يا اخي الكريم الفاضل salehhd على طرحك الموضوع ، وراح اقوم بمتابعته اول بأول ان تيسر لي إن شاء الله تعالى

اخوكم / محمد العتيبي

والسلام عليكم ورحمة الله وبركاته

طلعنا كراون فكتوريا 2003 السنة هذي فل أوبشن من أمريكا ((قاعدة عجلات طويل))

المشكلة الوحيد ولله الحمد فقط مشاكل فيريائية وهي عملية التمدد والتقلص التي حصلت للكبوت جعلت هناك صرصرة تصدر الكبوت فخفت أن تكون في مشكلة في السيور أو نحوه ولكن ذهبت للفنيين وعملت وزن كبوت وتمت بحمد الله

شاكرك يا صالح على هذا الطرح المميز منك

جزاك الله خير والفكرة جميلة جداً

خالص تحياتي

مشكلة حصلت لي في اللومينا:
مرة كنت انا واخواني (اثنين) كنا مسافرين على الموتر
وكان اخوي العود متكي ورا وشابك جهاز كمبيوتر كفي على الشاحن حق الولاعة المخصصة للراكب الخلفي...
المهم الا شوي ويشوف لمبة الشاحن طافية...
امممممممممم
يا ربيه
وش المشكلة؟؟
جا اخوي الثاني وقال:
هذي اللومينا كلها مشاكل كهربائية!!!
المهم
جاء اخوي العود وقال عطني كتيب التعليمات حق السيارة
وطالع فيه
وقال وقف على جنب وانزل
وركب مكاني
وفك حاجة تحت الدركسون..وبدل فيوز بفيوز احتياطي
وشبك الشاحن واشتغل...
طلعت المسألة بس فيوز احترق وبدله بواحد احتياطي يجي مع السيارة

حياكم الله وبياكم وجعل الجنة مثواكم

وبصراحه يشرفني كثيراً مروركم على موضوعي المتواضع واحمد الله سبحانه اانه حاز على رضاكم |1|
وبالفعل هذا الموضوع قد يكون مرجع للاعضاء بأذن الله تعالي
واشكر الاخ كامري على هذه الدعوة الطيبة واسأل الله سبحانه ان يجمعنا جميعاً في جنات النعيم قول اميييين

المهم
احد المشاكل الي حصلت الي

كان عندي متسوبيشي جالنت موديل 89 وكان في صوت طقة مع قومة السيارة جاي من ورى وكل ما قمت بالسيارة ودعست طلع هذا الصوت
الحل رحت لاحد الزملاء في الصناعية وبعد ماركب السيارة وفحص الصوت فك الشنطة الا وعلبة الصبغ الصغيرة الي تجي من الوكالة نازلة عند الكفر وهي الي تطق مع قومة السيارة:D

انا صار عندي موقف من زمان مع سيارت عمي الله يعطيه العافيه

كنت من زمان ابي ابين نفسي اني فعلا اعرف حق السيارات و اعرف كيف اصلحها او على الاقل اعرف سبب العطل سيارة عمي مختربه في الطريق يطق سلف ماتشتغل جاب لها كهربائي عفس الماكينه ماعرف لها قال ان الكهربه موجوده و البطارية تمام
بس فيه شي انا مب عارفة يمكن تكون طلمبة البنزين و تحتاج ميكانيكي و سحب الى الكراج

عاد عمي قال يالله ياولد اخوي شوف السيارة اذا تعرف فيها شي قلت له يالله هذي فرصة على الاقل اشوف السبب حتى لو ماقدرت اصلح السيارة
طقينا سلف ماتشتغل
قلت يمكن البليتين قال عمي مافيه شي

قلت معليه خل نفتح ونشوف كيف يدور يعني المطرقة توزع صح او فيه التماس
وكانت المفاجئه ان مافيه شي يدور بالمرة
قلت حق عمي خلاص الصالفة معروفة المفروض ان عامود الكامات مع الدلكو و المطرقة تدور وهذا يعني ان سير الماكينة التايمنج مقطوع

قال معقوله
وفعلا طلع ان سير التايمنج مقطوع

ما شاء الله عليك يالفني من يومك فنان:D

احد المواقف الي حصلت معاي

كان عندي فولفو موديل 84 والسيارة ترتفع حرارتها ومش عارفين السبب لين ما احترق عندي ا لراس وصلحت السيارة بمبلغ وقدرة وبعد حوالي اسبوعين من التصليح رجعت نفس المشكلة وقام الوتر يخلط ماي وزيت وبعد ما طفتش من السيارة اكتشفت العلة


















غطى الرديتر خربان ويهرب ماي وهو الي يخلي الماي ينقص وقيمتة جديد ب65 ريال

مكشلة اغلب الورش عندن يحلون المشكلة لاكن ما يدورون السبب الاساسي في المشكلة

السلام عليكم

مشكلة جديدة

احز زملائي عندة لينكون تون كار وارد امريكا والسيارة فيها تأخير في القير على النمرة الاخيرة (4)

ودى السيارة لتغيير زيت القير وحصل فلتر القير غير مركب بشكل صحيح مما سبب سقوطة من مكانه الى الكارتير

وهذا كان سبب التأخير وغير الفلتر بجديد بسعر 150 ريال للفتر والزيت


وشكراً

ايضا هذه مشكلة تذكرتها:
الوالد معه لكزس ES ....
مع المطبات تطلع صوت غريب .......
وديناها عند ميكانيكي وفحصها...
قال المشكلة من المساعدات..يبغالها تغيير (4 الواحد بــ800 ريال)
ابوي قال مو مشكلة اتحمل هالمشكلة مؤقتا
وبعد فترة دخلناها صيانة عند عبداللطيف جميل
ويتذكر الوالد المشكلة وينبههم عليها..وقال لا تصلحونها الا اذا بعد ما تتصلون فيني..
خلصت السيارة ولا اتصلو.........
يوم رحنا نستلمها..طلعت المشكلو وش تتوقعون؟؟؟؟؟؟؟؟
استبنة الله يعزكم
الاستبنة بعد اخر تغييره ما ثبتت في مكانها...وكانت تتحرك مع المطبات وتصدر هالصوت.........
وسلامتك

السلام عليكم

اهلاً بك اهي نايت هوك وشكراً على اضافتك

بالفعل بعض الاحيان مشاكل بسيطة ونعتقدها مشكلة كبيرة والفنيين عندنا الله يسامحم اكثرهم ما يعرف شغلة مضبوط وجايين يتعلمون عندنا
فالله يعين

مواقف حلوة و الواحد فعلا يتعلم منها يعطيك العافيه

شكرا على الموضوع الجميل
وكانت معى مشكله باسياره اذا الحراره ترتفه واحيانا كانت توصل لاخر العداد,المهم رحنا بيها لكل الناس اللى يقوللك بص يا بيه العربيه دى محتاجه تغييى للردياتير علشان الردياتير بتاع بلادها وحش,وأخر يقوللك العربيه محتاجه تنظيف لدوره التبريد,رحنا للكهربائى قال دى عايزه ثرموستات 82/90 و تبقى 10/10 ,والمصيبه الكبرى واحد قاللك الموتور لازمله عمره و الفتيس يتغير(طبعا كل ده كلام فى العبيط)
المهم وديناها لواحد ميكنيكى ابن حلال وصلحها و طله العيب فى طلمبة المياه اللى تقلب المياه و تكلفت 80 جنيه بسسسسسسسسس

اخي فني سيارات


حياك الله هذا هو الغرض من الموضوع ان تعم الفائدة واتمنى ان تزيد المشاركات لتبادل الخبرات

اخي محمد

اشكرك على اظافتك المفيدة

ومثل ما قلت سابقاً بعض الاحيان المشكلة صغيرة جداً لاكن ما يقدر الفني يعرف مصدر الخلل وهذي هي المشكلة فالفني الشاطر يحط يدة على الجرح على طول

هذا الموقف حصل معي الأسبوع الماضي,,
طلب الوالد مني اني اودي سيارته اللكزس 99 لصيانة الوكالو علشان تشييك الـ90 الف (قولو ماشاء الله ,, ترا الوالد مو راعي لفلفات)
وقال لي نبههم ان البريك ضعيف جدا ولا يمسك
رحت انا على سيارتي والوالد على سيارته للوكاله,, بعدها اخر الوالد سيارتي ورجع للبيت وانا قمت اخلص اوراق السيارة علشان تدخل
نبهت المهندس عن مشكلة الفرامل انها ضعيفة جدا وقال راح نفحصها لك,,
من بكره دقو علي وقالو تعال استلمها,, يوم رحت قابلت المهندس أول شي وسألته ايش سويتو في الفرامل؟؟
قال حصلناها سليمة واحتياطا نظفناها لك,, المهم خلصت اوراقها واستلمتها,,
اول ما طلعت وعند الاشارة يوم ضربت بريك ما حصلته!!!!
شوي واصدم اللي قدامي,, بس ستر الله
والله يا حقدت عليهم:mad:
قلت يمكن اني ما ضغطت بقوة وانه مجرد احساس,, ومرة ثانية بطريق الملك فهد 5 مرات بغيت اكفخ اللي قدامي!!!!!!!!!!!!!!
قلت ايييييييييييه زين,, الوعد بكره الصبح , واليوم خمر وغدا أمر:D
الزبدة رحت لهم بكرة الصبح ودورت المهندس ما حصلته,, كلمت المدير قلت ما علي منكم ماني مستلمها الا والفرامل تشتغل مزبوط,, (انا بصراحة توقعت ان المشكلة من زيت الفرامل انه ناقص)
يوم نادى المدير فني وقال شف السيارة,, رحنا جربناها وحس بالمشكلة,, دخلناها ورشة الوكالة مرة ثانية,,
وقال الفني بغير لك زيت الفرامل,, قام فضى الزيت واعاد تعبئته وحصله اقل!!!
قام زوده واستلمت السيارة وكانت كذا|1| |1|
السبب كان وجود فقاعات من الهواء في الزيت,, واثناء الضغط فان هذه الفقاعات والجيوب الهوائية تنضغط بدل الزيت وتمتص قوة الضغط,,
الحمد لله انحلت المشكلة
حبيت اطلعكم عليها

السلام عليكم

اشكر لك اضافتك والحمد لله على السلامة وربك ستر

بعض الوكالات مع الاسف ما تقوم بالتأكد عملياً من سلامة التصليح وحل المشكلة
وفي بعض الاحيان المشكلة ما تطلع عند الوكاله او الورشة :D

أنا حصلت ليي مشكلتين في كهربة البيجو 307 وسببها التعديل واضافة الأجهزة على السيارة

البيجو معروف انه فيه مشاكل كهربائية بس بعد ما صارت ليي هالمشكلتين عرفت ان المشكلة مو بالسيارة .. المشكلة بالناس اللي كل ما صارت مشكلة صغيرة راحوا الوكالة .. والوكالة ماعندهم غير اعادة البرمجة

المهم المشكلة الأولى كانت بالأنوار ... إذا شغلت النور الواطي. النور الأيمن يطفي والإشارة تعلق والمشكلة صارت تروح وتجي بدون اسباب وطفشتني

والحل ما يآخذ أكثر من دقيقة ... فتحت الكبوت وفصلت شمعة النور الأيمن وبعدين شغلت السيارة وشغلت الأنوار لثواني وطفيتهم

وشبكت الشمعة مثل ما كانت ورجع كل شي مثل أول ... والمشكلة انتهت

وسبب المشكلة كان تشبيك الكشافات الإضافية مباشرة مع البطارية وهذا سبب خلل في السيارة

والمشكلة الثانية صارت يوم ركبت نافذة جديدة في باب الراكب ... ومن ميزات البيجو ان جميع نوافذها آتو ويرتدوا اذا فيه عائق

وبعد ما ركبت القزازة الجديدة صارت النافذة ترتفع عادي بس اذا اتسكرت بالكامل ترتد (بدون وجود عوائق)
الحل
رفعت النافذة حتى اتسكرت بالكامل وبعدين ضغط عليها بإيدي الثنتين قبل ما ترتد وقلت لأخوي يفصل بطارية السيارة
وانتظرنا خمس دقائق وشبكنا البطارية ورجعت النافذة تشتغل مثل أول

السلام عليكم

حياك الله اخي السفير واشكر لك افادتك القيمة وتجربتك الرائعة

والمشكلة الثانية الخاصة بالنفاذة طريقة حلك لها رائعة جداً لان اغلب السيارات الجديدة فيها ميزة الارتداد وعند تغييرها يضطر اغلب الناس الى استبدال محرك النافذة بمحرك جديد وقد حصلت معى باللكزس لاكن كان هناك فني شاطر وحل المشكلة بدون تغيير ولاكن بطريقة لم يفصح عنها بحكم انه الوحيد الذي يستطيع عملها

وفي انتظار المزيد من التجارب من الاخوة الاعضاء

اخوك
صالح

شكرا لكل القائمين على هذا الموضوع الرااااائع ...

أنا عندي مشكله وإن شاء الله الحل بيكون عندكم ...

سيارتي فولكس واجن بورا 2001 لما توقف السيارة يصير المكيف حار ويفصل الفريون لكن لما تمشي ما شاء الله المكيف باااااارد وأسمع صوت كأنه توه أشتغل المكيف ... ولا أدري ما السبب ...

السلام عليكم

موضوع جممميل حيل حيل و الي يشتغلون في الكراجات كلهم مكانيكيه بلفطره وهذا شئ مو زين ابداً

jetta_980

اخوي هذي مو مشكله هذا شئ عادي الكمبريسر يفصل

هذي في السيارات القديمه تقريباً

اكثر الشفر بهذه الطريقه

اما اذا صار حااااااااااار حيل فهذه مشكله .

شكرا لك أخوي المهندس ..

الحقيقه هذه المشكله ما كنت أعاني منها في السابق ..

السلام عليكم

مرحباً بكم اخواني الاعزاء ويشرفني مروركم

بالنسبة للكمبرس اعقد ان هناك خلل لديك في الاتمايك الخاص به والذي يقوم بوزن مقياس حرارة المقصورة
انصحك بمراجعة الوكالة او احد فنيي التكييف وان شاء الله تحل المشكلة
وياليت تخربنا كيف انحلت المشكلة وشكراً

اخوكم صالح

ارجوا عدم الخلط بين طرح موضوع مشكله صادفتك ووضع حل لها
وبين استفسارات في هذا الموضوع لان الاستفسارات و المشاكل الميكانيكية في منتدى الورشة بشكل مستقل
وليست في هذا الموضوع و ارجوا من الاجميع الاتزام بذلك

السلام عليكم ورحمة الله وبركاته
هذا الموضوع سبق وان نشرته في قسم ( ورشة السيارات ) ولكن نبهت انه من الافضل ان يكون هنا .
في يوم من الايام كان السويتش لسيارتي كابريس موديل 2000 فيه مشكلة وهي عدم تشغيل السيارة ( مفروط ) ويترك السويتش مفتوح حتى بعد تطليع المفتاح واحترت ان اترك السويتش مفتوح لانه بيخلص على بطارية السيارة قمت بعمل حركة اسميها بصراحه ( غباء مؤقت ) قمت بفتح الكبوت وقفلت السيارة مرتين اي تشغيل الخمول او التامين ( اذا ضغطت على الريموت مرتين متتالية للتقفيل ) المهم . رحت بعدها مباشرتا وفصلت اصبع البطارية وبعدها قفلت الكبوت .
جيت افتح الباب بالمفتاح فلم يفتح معي الباب لاني مأمنه بالريموت والكبوت مقفول ! كيف افتح الكبووووووووووووت وكيف اشبك البطارية علشان يشتغل الريموت ؟

1. سالت اكثر من كهربائي قالوا ما معك الا كسر اي قزازة من قزاز السيارة ومن ثم يفتح الكبوت من الداخل لتغيير البطارية . جيت باكسر المثلث سعرة ( 700 ) ريال قلت لا . جيت ابغى اكسر قزاز السائق لقيت القزاز ب( 600 ) ريال بالطبع كلها وكالة .
واخيرا فكرت اكسر قزاز الراكب واركّب تجاري ب ( 250 ) ريال . المهم نويت على الكسر حاولت والله يا اخوان بكل ما استطعت لكي اكسر قزاز الراكب ما انكسرت وكنت اضرب القزاز بماسورة بصراحة استحيت من الجيران الساعة 1 ليلا واكيد بيقولوا جارنا اكيد .......رايح فيها . المهم تركت القزاز الى الصباح ورحت لمحل قزازين وبغيت المشرط علشان يكسر القزاز قال لي القزاز يا اخي روح للكهربائي اللي بجنبنا قلت يالله توكلنا على الله رحت للكهربائي ( باكستاني ) قلت له القصة . قال افتح لك السيارة في عشر ثوان قلت بكم قال 100 ريال المهم اخذته الى البيت وعمل الاتي
ارجوا الاستفادة يا اصحاب الكابرسات .
1. بطارية سيارة .
2. سلكين بطول 3 متر
3. عفريته .
الطريقة رفع السيارة من جهة الراكب وشبك الاسلاك في البطارية اللي جابها معه ودخل تحت السيارة فشبك سلك بالسلف وسلك بالبودي وقال لي اضغط زر الريموت وفي لحظه يا اخوان فتحت ازارير السيارة بدون كسر اي قزاز علما بان القزازة اللي حاولت كسرها ما زالت مخدّشة الى تاريخه . ولم تاخذ منه العمليه اكثر من 10 ثوان .
حبيت اطرح هذه الطريقة لكم لكي تاخذوا حذركم وليس كل من قال اكسر القزاز كسرته .

الملخص : اشبك سلكين في اي بطارية خارجية وارفع السيارة بعفريته لان السيارة نازلة ما تستطيع الدخول تحتها وبعد ذلك قم بشبك سلك في السلف وسلك في البودي . بالطبع هذه الطريقة ايضا للسيارة اللي خلصت بطاريتها وقد امن السيارة بزر الخمول .

السلام عليكم

اهلا بك اخي البناوي واشكرك على مشاركتك الرائعة وهذه الفائدة

مشكلة حصلت قبل فترة في سيارتيالسابقة للكزس موديل 2003 السيارة رحت مع ا لاهل محل في السوق وطفيت السيارة
رجعت وحاولت تشغيل السيارة مارضت تشتغل والسلف ضعيف لاكن البوري والنور تمام

كلمت احد الزملاء ووديت الاهل البيت ولما رجعت حاولت فيها مرة ثاينة الا واحد من الاخوان الله يجزاه خير شافنا وجا ومعاه قاروة ماء وقالي انتو تشربون ماء وتنسون تشربون سياراتكم

وصب شوي ماء داخل البطارية اشتغلت على طول

فائدة :

البطاريات العادية اليابانية تحتاج الى صيانة دائمة وفحص للماء بين فترة واخرى

فائدة اخرى :
السيارات الجديدة بطارياتها عليها ضمان من الوكالة لاول سنة والوكيل يتحمل نصف قيمة البطارية بعد السنة الاولي لمدة سنة اخرى بمعنى اول سنة تغيير كامل ثاني سنة نصف القيمة

السلام عليكم


و هذا موضوع صارلي عشان salehhd ,,,,



المهم يوم من الايام قاعدين بلورشه و جا واحد قال سيارتي تقطع و ترجف عن الوضع علي N


و كلعاده تصفيه فلتر و ما اعرف ايش ...


المهم صفيناها و كلع البواجي وصخين و حالتها حاله ...



المهم شغلنه السياره و لله السياره تقطع و تقطع صارت اصفي بس فيها رجفه ؟؟؟


انا ويه المكانيكي :eek: يعني انصدمني اشلون و الرجال الحين راح يذبحني :D


الرجال قاط فلوس علي شان تتصلح بس ما ضبط ... :confused:



جان يجي شايب منتهي جا و دش علينا و قال ممكن تسون السياره فيها كيت وكيت


المهم انا مالي شغل فيه هههههه قاعد اعابل بسياره قبل لا يجي الرجال ...


وله جاء الشايب قال اشفيها قلناله السالفه و شنو بدلنه ...


قال تبون الحل قلنا له علي ايدك ..


قال شيلو الحديده الي علي الوايرات مثل الي بصوره




طبعاً هذي حق الومينا حقتي ...


المهم شلناهم كلهم و ركبنه الوايرات و دقيناه سلف و طلع الموضوع |1|



و انا تعجبت من الشايب طلع مو هين مره ههههههههههه


و اكتشفت في الاخير انه بعد مرور وقت علي السياره راح تتلاشي العازل و الحديد يسرب كهرباء و تضعف القوه .



و ارجو اني افدتكم |3|

السلام عليكم

حياك الله اخي المهندس واشكرك على طرح تجربتك

وصحيح بعض الاقات اشياء بسيطة تتسبب في مشاكل كثيرة

معليش يالمهندس عندي تفتفه بسيارتي وماخليت شي ماجربته

لو تشرح لي بالبسيط وش هي ..الوايرات بالضبط اللي يبي لها تغيير

(((قال شيلو الحديده الي علي الوايرات مثل الي بصوره ))))

الواير الي مرتبط في البواجي


سلك البواجي شيل الحديده طبعاً كلهم وشوف شنو راح يصير و الله كريم


و حاظرين لك مشرفنه :)

هذا موقف صار لي امس,,
وهو اني كنت ماشي بالسيارة (العصر) واشوف لمبة غريبة في الطبلون ولعت
حسيت ان المشكلة من الحرارة
شوي الا ويتغير صوت المكينة
وقفت وفتحت الكبوت وعايرت الرديتر, طلع مافيه ولا قطرة موية!!!!!!!
رحت على طول واشتريت علبتين مويه مقطرة ورجعت تمام

السلام عليكم

حياك الله اخ نايت وشكراً على مرورك واضافتك

والسيارات في الصيف تحتاج الى فحص الماء بشكل اسبوعي

سيارتي كامري فجاة السيارة وهى تشتغل تنتفض "اكيد مو بردانة" المهم رحت ل 10 مهندسين الى يقول البخاخات

والى يقول غير منظم الكهرباء الى واصل للمكينة وغيرت البواجي واسلاك البواجي وحالة

وفجاة طلع لى هواء مفصول من منظم الكهرباء الى البخاخات بالمكينة شبكناه وانتهت المشكلة,,,,,وكله بتوفيق الله

السلام عليكم

حياك الله اخ لكزس وشكراً على مروك وكتابه تجربتك وفي انتظار المزيد من باقي الاعضاء

في يوم من الايام تعطلت سيارتي الكابريس 2000 بدون سبب وكانت المشكلة ان السيارة لا تشتغل يعني تقول البطارية فارغة تماماً او مثل السيارة اذا كانت في d ما تشتغل معك . جيت باكثر من كهربائي قال المشكلة ليست بطارية لان لمبات الطبلون شغالة زي الحلاوة وليست المشكلة ايضا سلف لان السلف بيعطي مقدمات . احترت ويش اسوي وماهي المشكلة بالضبط خايف يكون الكمبيوتر تعطل المهم شحنت السيارة على الوكالة ب 300 ريال
ويا اخوان طلعت المشكلة بسيطة جداً جدا قبل ادخل سيارتي صيانة الوكالة لقيت فلبيني تابع للشركة قبل بدء الدوام عند البوابة فسالته ( قال المشلكة بسيطة اخذ عمود صغير وضرب السلف ضربه خفيفه وقال شغل السيارة ) طلعت السيارة زي الحلاوة وتمام ولم تعد المشكلة ابدا لي الان ما يقارب 9 اشهر . وقال لي الفلبيني اغلب الكابرسات من موديل 2000 الى موديل 2004 مشكلتها نفس الطريقة وقال لا يحتاج الى تغيير السلف لكن اذا سوت الحركة مرة اخرى اضرب السلف ثم شغل السيارة .
ملاحظة : في حركه حلوة جاتني مرة اخرى . السيارة بعد اسبوع ما اشتغلت رجعت نفس الحركة . سويت فيها اني عارف المشكلة واخرجت عمود العفريته وهات ضرب على السلف مر احد الزملاء وقال سلامات ويش المشكلة قلت عطل بسيط وان شاء الله يتصلح المهم قمت اضرب السلف ضرب مبرح وقلت لزميلي شغل السيارة .راح يشغل السيارة ورجع لي وقال يا اخي حرام عليك قاعد تضرب السلف ولعنت والدية . كيف تبغى السيارى تشتغل والقير في ( d ) حسيت ذلك الوقت طلعت لي اذان . انتهت النكته

خخخخخخخخخخخخخخخخخ

حياك الله اخ البناوي وشكراً على المعلومة واحتمال ان السبب ان السلف يعلق داخل وعند الضرب يتحرك من مكانة

بسم الله الرحمن الرحيم

اتمنى اني اكون قد وفقت في هذا المنتدى الرائع والهادف


وبعد ...

اريد ان اقدم لكم نصيحه انا شخصيا مجربها
اذا انت واحد تحب سيارتك وما تبي تعود للناس وتطلب سياراتهم لمشوار بسيط وبعض الاحيان تحرم نفسك مشوار لمطعم معين انت نفسك في لحظه من اللحظات تاكل فيه او انك تذهب لمكاتب الايجار وتبحث عن سياره تمشي حالك لما سيارتك تطلع من الورشه
كل هذه المتاعب الله يبعدنا عنها وانشالله ما فيه احد يواجهها من اعضاء هذا المنتدى الرائع

انا انسان اعمل حاجه تخدمني وتخدم سيارتي وتبعدني عن بعض المواقف او المواقف اللي مابي اواجهها في يوم من الايام
الا وهي كالتالي

رح المكتبه واشترلك نوته صغيره وقلم ( بشرط هالنوته والقلم تكون خاصه بسيارتك) وتخليها بدرج السياره مع الرخصه والاستماره وتسجل فيها كل مره تغير شي بالسياره او تغيير زيت وتكتب فيها الكيلو مترات اللي من المفترض اذا وصلتها السياره يتغير فيها شي معين ( مثلا تغيير الزيوت والفلاتر والسيور والكفرات )

وانشالله بهالشي راح تعرف سيارتك مالشي الذي تحتاجه قبل ما تطلب منك وراح تعرف سيارتك زين لأنك مشرف عليها من جميع النواحي وتعرف سيارتك وش تبي وش اللي ما تبي

واتمنى اني قدمت نصيحه لكم لاني مجربها ولا ابي ابخل عليكم فيها لانها تصب في مصلحتنا جميعا والاول والاخير في مصلحه سياراتنا

( رحم الله امرئ اهدى الي عيوبي)
اخوكم المحب

Black Victoria الكاتب .

السلام عليكم

اشكرك اخ المهندس على اهتمامك في الموضوع والنقل الرائع

احد المشاكل التي حصلت وهي بعد تغيير القماشات (وسادات البريك ) وهي ان البريك يمسك في الكفر ولا تستطيع تحريك السيارة والسبب هو وجود بعض الهواء في مجاري (مواصير ) البريك مع الزيت

الحل

هو تنسيم ماصورة البريك الموجودة عند الباكم ويفضل ان يقوم بهذه الطريقة فني مختص