المشاركة الأصلية كتبت بواسطة فايربيرد1982
السلام عليكم
شلونهم الشباب منورين المنتدى
هل الايام مفكر ابيع السيارة وناوي اشتري فور ويل طبعا هذي القضية من زمان اتمناها بس ماصايرة عندي فرصة ....على العموم اني مفكر بـ3 سيارات من فئة الفور ويل الي حجمه تقريبا متوسط ...والي تجي في باله خيارات اخرى اتمنى اسمع من الشباب
اني راح اذكر السيارات الي في بالي وايجابياتها و سلبياتها من وجهة نظري و اتمنى من الشباب يفيدوني باسعارهن (طبعا اني مفكر بموديل 2007 2008 لكل هذي السيارات +مرقم رقم بغداد او بصرة او اي محافظة جنوبية اخرى )
1- تويوتا فوتشنر
طبعا المحرك الي اريده 2.7
وهذي السيارة تعتبر خياري المفضل لعدة اسباب
1- توفر قطع الغيار لانو السيارة هي عبارة عن تويوتا هايلكس ستيشن بالاحرى !!!
بالتالي نظراً لانتشار الهايلكس اكيد قضية الصيانة و قطع الغيار لحد ما سهلة
2- سعر اعادة البيع جيد كون السيارة تويوتا و الكل يعرف سمعة تويوتا بالسوك العراقي حتى وان كانت الموديلات الجديدة لاترقى لاداء و سمعة تويوتا التسعينات و الثمانينات
3- حجم السيارة و ارتفاعها مناسب جدا لي على مستوى المساحة الداخلية و مقصورة الركاب
4- استهلاكها للوقود جيد لحد ما ما العلم انو اني ما افكر بالبانزين (مو لانهو اموري توب) بس لانهو ما اطلع هوايه بالسيارة
5- بصراحة شكلها يعجبني
سلبيات السيارة :
1- سعرها غالي مقارنة بالباقيات مع العلم اقدرهه تتراوح بين 22000و25000 دولار مقابل مواصفات فقيرة نوعا ما مقارنة بكثير من سيارات من نفس الفئة
2- مواصفات السيارة الداخلية و تصميمها الداخلي مطابق للهايلكس و هذي بحد ذاتها سلبية و ايجابية من حيث انو مواصفاتها فقيرة لحد ما من حيث التصميم و الخيارات
3- المحرك يجوز شويه نوعا ما ضعيف القدرة الحصانية 157 حصان لسيارة بهل الحجم
بينما المحرك الاخر الي يجي بيهه 4.0 بقدرة حصانية 235 حصان
2- الخيار الثاني
كيا سورينتو
طبع الكل يعرف السورنتو سيارة جيدة مع العلم انو ما سايقها
بس على مستوى كثير امور مثل توفر الصيانة و الادوات الاحتياطية و السعر عند اعادة البيع و الرغبة بالسوق اشوفها سيارة ناجحة و خيار جيد بس ما عندي فكرة بالضبط على سعرها
3- جيب ليبرتي 2007
او 2008
اعتذر عن كبر الصورة بس بصراحة عاجبتني هل الصورة !!!
طبعا الكل يعرف ايجابيات الجيب من قوة و تحمل و اني ارجح الـ2008 اكثر
بس اني شويه خايف من سلبياتها الي تتركز بالصيانة و قطع الغيار (
واسعار قطع الغيار)
لان الكل يعرف انو جيب تابعه لدوج ومحرك 3.7 هوه نفسه موجود بالدودج نيترو واني سامع اسعار
شويه نارية بالنسبة لقطع الغيار على الرغم من عدم دقة مصادري ولو بصورة عامة مثل مايعرف الكل انو كل السيارات الجديدة اسعار قطع غيارها عالية مقارنة بالقديمة و هذا فد شي لاغبار عليه
المهم... مقارنة بالسيارات الي ذكرتهن سابقا مع العلم انو يجوز هي ارخص وحدة بيهن
اني على مستوى الشكل الخارجي اشوفهها حلوة
شنو رأيكم اي وحدة ترشحولي !!
اني ولو تعبتكم و دوختكم
و اتمنى من الاخ سبورتاج الي ما شاء الله موطبيعي قاموس الاسعار بصراحة يفدنه بالاسعار و لايهونون كل الاخوان الاعزاء الباقين
و شكرا واسف على الاطالة